ഭ്രാന്തുണ്ടെങ്കില്‍ പിടിച്ചു ചങ്ങലയ്ക്കിടണമെന്ന് പറയാറുണ്ട്. എന്നാല്‍ ആ ചങ്ങല കൂടി ഭ്രാന്തമായി പെരുമാറാന്‍ തുടങ്ങിയാല്‍ പിന്നെ ആരെ ആര്‍ക്കു നിയന്ത്രിക്കാനാവും എന്ന പരിതാപകരമായ സ്ഥിതിയായിരിക്കും ഉണ്ടാവുന്നത്. നിയമം നടപ്പാക്കാന്‍ ഉത്തരവാദിത്തമുള്ള നിയമപാലകര്‍ നിയമലംഘനം നടത്തിയാല്‍ അതീവ ഗുരുതരമായ സ്ഥിതി വിശേഷമായിരിക്കും സംജാതമാവുന്നത്.

യു.കെയിലെ മെട്രോപൊളിറ്റന്‍ പോലീസില്‍ ലൈംഗിക കുറ്റകൃത്യങ്ങളുടെ വിഭാഗത്തിലെ ഉദ്യോഗസ്ഥ ആയിരുന്നു 33-കാരിയായ ഷാര്‍ലെറ്റ് പീറ്റേഴ്‌സ്. ലൈംഗിക കുറ്റകൃത്യങ്ങള്‍ക്ക് വിധേയരാകുന്ന ഇരകളെ പ്രത്യേക അഭയസ്ഥാനങ്ങളിലാണ് പോലീസ് പാര്‍പ്പിക്കാറുള്ളത്. അവിടെ താമസിക്കുന്ന ഇരകള്‍ക്കും പോലീസ് അന്വേഷണ സംഘത്തിനും ഇടയിലുള്ള മധ്യവര്‍ത്തിയായി പ്രവര്‍ത്തിക്കുക എന്നതായിരുന്നു ഷാര്‍ലെറ്റിന്റെ ചുമതല.

എന്നാല്‍ ഇന്നലെ ലണ്ടനിലെ സൗത്ത്‌വാര്‍ക്ക് ക്രൗണ്‍ കോടതിയില്‍ നിന്നും ഷാര്‍ലെറ്റ് 22 മാസത്തെ ജയില്‍ ശിക്ഷ ഏറ്റുവാങ്ങി. ബലാല്‍സംഗത്തിനിരയായി തന്റെ ചുമതലയില്‍ അഭയ ഭവനത്തില്‍ കഴിഞ്ഞിരുന്ന ഒരു യുവതിയുമായി ആ വനിതാ പോലീസുദ്യോഗസ്ഥ ലൈംഗിക ബന്ധം പുലര്‍ത്തി എന്ന കുറ്റത്തിനാണ് അവരെ 22 മാസത്തെ തടവിന് ശിക്ഷിച്ചത്.

ബലാല്‍സംഗം ചെയ്യപ്പെട്ട യുവതികളുടെ മാനസികനില മനസ്സിലാക്കി അവരോട് ഇടപെടേണ്ട രീതി എങ്ങനെയാണെന്ന കാര്യത്തില്‍ പരിശീലനം നേടിയിട്ടുള്ള ഷാര്‍ലെറ്റ്, ആ യുവതിക്ക് തന്റെ മേലുള്ള വിശ്വാസത്തെ ചൂഷണം ചെയ്യുകയായിരുന്നുവെന്ന് കോടതി വിലയിരുത്തി.

ഇക്കഴിഞ്ഞ ഫെബ്രുവരി മുതലാണ് ആ യുവതിയുമായി ഷാര്‍ലെറ്റ് അടുപ്പം കാട്ടിത്തുടങ്ങിയതെന്ന് യുവതി കോടതിയോടു പറഞ്ഞു. തുടര്‍ന്ന് ഷാര്‍ലെറ്റ് അവളെ ചുംബിച്ചത്രേ. അത് അവള്‍ക്ക് ഇഷ്ടമായതിനാല്‍ ഷാര്‍ലെറ്റുമായി സ്വവര്‍ഗ്ഗാനുരാഗ ബന്ധത്തിലാകാന്‍ യുവതി താത്പര്യം പ്രകടിപ്പിക്കുകയും അത് പ്രോത്സാഹിപ്പിക്കുകയും ചെയ്യുകയായിരുന്നു. പിന്നീട് ഒരു മാസത്തിനിടെ നാലു തവണ ആ അഭയ ഭവനത്തില്‍ ഷാര്‍ലെറ്റ് ഡ്യൂട്ടിയിലുണ്ടായിരുന്ന അവസരത്തില്‍ ഉഭയസമ്മതത്തോടെ അവര്‍ ലൈംഗിക ബന്ധത്തിലേര്‍പ്പെട്ടിട്ടുണ്ടെന്ന് യുവതി പറഞ്ഞു. ഷാര്‍ലെറ്റിനോട് അവള്‍ക്ക് പ്രണയമുണ്ടായിരുന്നുവെന്ന് അവള്‍ കോടതിയോടു പറഞ്ഞു.

എന്നാല്‍ സ്വവര്‍ഗ്ഗാനുരാഗിയായ ഷാര്‍ലെറ്റിന് സ്ഥിരമായ മറ്റൊരു വനിതാ പങ്കാളിയുണ്ട്. ഷാര്‍ലെറ്റ് ഒരിക്കലും തന്റെ പങ്കാളിയെ ഉപേക്ഷിച്ചിട്ട് തന്നെ സ്വീകരിക്കില്ല എന്ന് തിരിച്ചറിഞ്ഞതോടെയാണ് യുവതി ഷാര്‍ലെറ്റുമായുള്ള ബന്ധം അവസാനിപ്പിച്ചത്. ഷാര്‍ലെറ്റുമായുള്ള ബന്ധം നിര്‍ത്തിയെന്ന് യുവതി അഭയ കേന്ദ്രത്തിലുള്ള മറ്റൊരു പോലീസുദ്യോഗസ്ഥയോടു തുറന്നു പറഞ്ഞപ്പോഴാണ് സംഗതി പ്രശ്‌നമായത്. ഷാര്‍ലെറ്റിന്റെ ഒരു 'വൃത്തികെട്ട രഹസ്യം' മാത്രമായി തുടരാന്‍ തനിക്കു താത്പര്യമില്ലാത്തതിനാലാണ് ബന്ധം അവസാനിപ്പിച്ചതെന്ന് ആ യുവതി ഉദ്യോഗസ്ഥയോടു വെളിപ്പെടുത്തി.

അവസാനിച്ചതിനെ തുടര്‍ന്ന് ഷാര്‍ലെറ്റ് യുവതിക്കയച്ച ടെക്സ്റ്റ് മെസേജുകളെല്ലാം യുവതിയുടെ ഫോണില്‍ നിന്നും ഡിലീറ്റ് ചെയ്തുകളയണമെന്ന് ഷാര്‍ലെറ്റ് ആവശ്യപ്പെട്ടുവെന്നും അത് അപ്രകാരം ചെയ്തുവെന്നും യുവതി കോടതിയില്‍ പറഞ്ഞു.

ബലാല്‍സംഗത്തിനു വിധേയയായ ഒരു വ്യക്തിയുടെ മനചാഞ്ചല്യം ഏറെയായിരിക്കുമെന്നറിയാവുന്ന ഷാര്‍ലെറ്റ് അധികാര ദുര്‍വിനിയോഗം നടത്തി അവളുടെ സമ്മതം പിടിച്ചു വാങ്ങുകയായിരുന്നു എന്നാണ് കരുതേണ്ടത് എന്ന് മെട്രോ പൊളിറ്റന്‍ ഡെപ്യൂട്ടി അസിസ്റ്റന്റ് കമ്മീഷണര്‍ റിച്ചാര്‍ഡ് മാര്‍ട്ടിന്‍ പറഞ്ഞു. ഷാര്‍ലെറ്റിന്റെ പ്രവൃത്തികള്‍ അവളുടെ ജോലി നഷ്ടപ്പെടുത്തുമെന്നും അദ്ദേഹം വ്യക്തമാക്കി.