യാത്രാവേളയില് വന് സുരക്ഷയോ ബുള്ളറ്റ് പ്രൂഫ് കാറോ വേണ്ടെന്ന് മാര്പാപ്പ
ആക്രമണ ഭീഷണി നേരിടുന്നെങ്കിലും യാത്രാവേളയില് വന് സുരക്ഷയോ ബുള്ളറ്റ് പ്രൂഫ് കാറുകളോ സ്വീകരിക്കാന് താന് തയ്യാറല്ലെന്നു ഫ്രാന്സിസ് മാര്പാപ്പ. ജനങ്ങളുമായി സമ്പര്ക്കത്തിലേര്പ്പെടാന് കഴിയുന്നില്ലെങ്കില് അങ്ങനൊരു യാത്ര വേണ്ടെന്നാണു താന് ആദ്യം മുതല് സ്വീകരിച്ചിട്ടുള്ള നിലപാടെന്നും മാര്പാപ്പ വ്യക്തമാക്കി.
റോമിലെ പള്ളികള് സന്ദര്ശിക്കുമ്പോഴും മാര്പാപ്പ തന്റെ സാധാരണ ഫോര്ഡ് ഫോക്കസ് കാറിലാണു സഞ്ചരിക്കുക. വിദേശത്തു പോകുമ്പോഴും വെടിയുണ്ടയേല്ക്കാത്ത വാഹനങ്ങളിലല്ല, സാധാരണ കാറുകളിലാണു സഞ്ചരിക്കുക. താന് ആക്രമിക്കപ്പെടാന് സാധ്യതയുണ്ടെന്നു അറിയാമെന്നും എന്നാല് ജനങ്ങളോട് അടുത്തിടപഴകുവാന് ആഗ്രഹിക്കുന്നതുകൊണ്ടാണ് ഇവ നിരസിക്കുന്നതെന്നും പാപ്പ പറഞ്ഞു. ഈ വര്ഷം ഇനി ഇന്ത്യയും പോര്ച്ചുഗലും അദ്ദേഹം സന്ദര്ശിക്കുമെന്നാണു കരുതുന്നത്.
2013ല് സ്ഥാനമേറ്റശേഷം 17 യാത്രകളിലായി 25 രാജ്യങ്ങള് ഇതുവരെ സന്ദര്ശിച്ചിട്ടുള്ള മാര്പാപ്പയുടെ യാത്രകളെക്കുറിച്ച് ആന്ഡ്രിയ ടൊര്ണീലി എന്ന ഇറ്റാലിയന് എഴുത്തുകാരന് രചിച്ച 'ട്രാവലിങ്' എന്ന പുസ്തകത്തിന്റെ അവതാരികയിലാണ് ഇക്കാര്യം പാപ്പ വിശദീകരിച്ചത്.
https://www.facebook.com/Malayalivartha
