ഈജിപ്തില് 529 പേര്ക്ക് പ്രാഥമിക വിചാരണ കോടതി വധശിക്ഷ വിധിച്ചു
ഈജിപ്തില് മുന് പ്രസിഡന്റ് മുഹമ്മദ് മുഹമ്മദ് മുര്സിയുടെ അനുയായികളായ 529 പേര്ക്കു പ്രാഥമിക വിചാരണക്കോടതി വധശിക്ഷ വിധിച്ചു. വിധിയറിഞ്ഞ് ബന്ധുക്കള് പൊട്ടിക്കരഞ്ഞു. ഇത്രയധികം പേര്ക്ക് ഒരുമിച്ചു വധശിക്ഷ വിധിക്കുന്നത് ആധുനിക നീതിന്യായ ചരിത്രത്തില് അപൂര്വമാണ്. മുര്സി പുറത്താക്കപ്പെട്ട ശേഷമുള്ള പ്രക്ഷോഭങ്ങളില് മിന്യ പ്രവിശ്യയില് പോലീസ് സ്റ്റേഷന് ആക്രമിക്കുകയും ഒരു പോലീസ് ഉദ്യോഗസ്ഥന് കൊല്ലപ്പെടുകയും മറ്റ് അക്രമങ്ങള് നടക്കുകയും ചെയ്ത കേസിലാണ് 529 പേര്ക്ക് വധശിക്ഷ വിധിച്ചത്.
545 പ്രതികളാണ് ഈ കേസില് ഉള്പ്പെട്ടിരുന്നത് . വിചാരണ ശനിയാഴ്ചയാണ് ആരംഭിച്ചത്. കാര്യമായ വാദങ്ങളൊന്നും നടക്കാതെ അന്നു കേസു മാറ്റിവച്ചു. ഇന്നലെ വിധിയും പ്രഖ്യാപിച്ചു. 16 പേരെ വെറുതെ വിട്ടു. ബാക്കിയുള്ളവര്ക്കാണ് വധശിക്ഷ. അക്രമത്തിനു പ്രേരിപ്പിച്ചുവെന്ന പേരില് മുസ്ലീം ബ്രദര്ഹുഡിന്റെ ആത്മീയ നേതാവ് മുഹമ്മദ് ബദീ ഉള്പ്പെടെ 682 പേര്ക്കെതിരെയുള്ള വിചാരണ ഇന്ന് ആരംഭിക്കും.
പ്രാഥമിക വിചാരണകോടതിയുടെ വിധിക്കെതിരെ ഉന്നത കോടതിയില് അപ്പീല് നല്കാം.. തുടര്ന്ന് ഗ്രാന്ഡ് മുഫ്തി അംഗീകാരം നല്കിയാല് മാത്രമേ ശിക്ഷ നടപ്പാക്കുകയുളളൂ. ഈ കേസില് അപ്പീലിനുമാത്രമല്ല പുനര്വിചാരണയ്ക്കും സാധ്യതയുണ്ടെന്ന് നിയമവിദഗ്ദ്ധര് ചൂണ്ടിക്കാട്ടുന്നു. ഈജിപ്തില് വധശിക്ഷ വിധി സാധാരണമെണെങ്കിലും നടപ്പാക്കല് അപൂര്വ്വമാണ്. ആയതിനാല് ഇപ്പോഴത്തെ 529 പേര്ക്കെതിരെ ശിക്ഷ നടപ്പാക്കാന് സാധ്യതയില്ല. ഇതേസമയം രാജ്യത്തെ സൈനിക ഭരണനേതൃത്വം മുസ്ലീംബ്രദര്ഹുഡ് അനുയായികളും തമ്മിലുള്ള സംഘര്ഷം വര്ദ്ധിക്കാന് ഈ വിധി കാരണമായേക്കും.
ഇന്നലെ വധശിക്ഷ വിധിക്കുമ്പോള് 147 പ്രതികള് മാത്രമാണുണ്ടായിരുന്നത്. ബാക്കിയുള്ളവരില് ചിലര് ജാമ്യത്തിലാണ് , മറ്റു ചിലര് പിടികിട്ടാപുള്ളികളാണ്. പെട്ടെന്നുള്ള ഈ വിധിയെ പ്രതികളുടെ ബന്ധുക്കളും അഭിഭാഷകരും വിമര്ശിച്ചു.
https://www.facebook.com/Malayalivartha
