അമേരിക്കയ്ക്ക് കടുത്ത ഭീഷണിയുമായി ഉത്തരകൊറിയ
അമേരിക്കയ്ക്ക് കടുത്ത ഭീഷണിയുമായി ഉത്തരകൊറിയ. കിം ജോങ്ങ് ഉന്നിനെ അട്ടിമറിക്കാന്‍ ശ്രമിച്ചാല്‍ ആണവായുധം പ്രയോഗിക്കാന്‍ തങ്ങള്‍ മടിക്കില്ലെന്നാണ് ഉത്തരകൊറിയയുടെ പുതിയ ഭീഷണി. ഉത്തരകൊറിയയുടെ ഔദ്യോഗിക വാര്‍ത്താ ഏജന്‍സിയായ കെ.സി.എന്‍.എയാണ് ഇക്കാര്യം റിപ്പോര്‍ട്ട് ചെയ്തത്. ഉത്തരകൊറിയയുടെ പരമാധികാരത്തില്‍ കടന്നുകയറാന്‍ ശ്രമിക്കുന്നവര്‍ക്കുള്ള മറുപടിയായിരിക്കും ആണവായുധം.
ഉത്തരകൊറിയന്‍ ഭരണാധികാരിക്കെതിരെ നീങ്ങാനുള്ള ഏതെങ്കിലും തരത്തിലുള്ള ശ്രമം ട്രംപിന്റെ ഭാഗത്തുനിന്നുണ്ടായാല്‍ യാതൊരു ദയവുമില്ലാതെ അമേരിക്കയുടെ ഹൃദയഭാഗത്ത് തന്നെ ആണവായുധം പ്രയോഗിക്കും. കൊറിയന്‍ വിദേശകാര്യ വക്താവിനെ ഉദ്ദരിച്ച് കെ.സി.എന്‍.എ പറയുന്നു.
ഉത്തരകൊറിയന്‍ സ്വേച്ഛാധിപതി കിം ജോങ്ങ് ഉന്നിനെ അധികാരത്തില്‍ നിന്ന് മാറ്റാനുള്ള മാര്‍ഗങ്ങള്‍ ട്രംപ് ഭരണകൂടം കണ്ടെത്തണമെന്ന സി.ഐ.എ ഡയറക്ടര്‍ മൈക്ക് പോംപിയോയുടെ പ്രസതാവനയ്ക്ക് മറുപടിയായാണ് വിദേശകാര്യ വക്താവ് ഇക്കാര്യം പറഞ്ഞത്.
ഈ മാസം ആദ്യം ആണവായുധം വഹിക്കാന്‍ ശേഷിയുള്ള ഭൂഖണ്ഡാന്തര മിസൈല്‍ ഉത്തരകൊറിയ പരീക്ഷിച്ചിരുന്നു. അമേരിക്കയെ ലക്ഷ്യം വച്ചുള്ളതാണ് ഇവയെന്ന് റിപ്പേര്‍ട്ടുകള്‍ ഉണ്ടായിരുന്നു.
https://www.facebook.com/Malayalivartha
