ലോകം യുദ്ധ ഭീതിയിലായിരിക്കെ അമേരിക്കയ്ക്ക് കനത്ത തിരിച്ചടി ഉണ്ടാകുമെന്ന് റിപ്പോര്‍ട്ട്. ഉത്തര കൊറിയയും അമേരിക്കയും തമ്മിലുള്ള യുദ്ധമാണ് നാശത്തിലേക്ക് വഴിതെളിക്കുമെന്ന് കണക്കാക്കുന്നത്. ഉത്തരകൊറിയ അമേരിക്കയ്‌ക്കെതിര ഇത്രയൊക്കെ ഭീഷണി മുഴക്കിയിട്ടും ട്രംപ് തിരിച്ചടിക്കാത്ത ഉത്തരകൊറിയയുടെ കൈയിലുള്ള അണുബോംബുകളെ കുറിച്ചുള്ള ആശങ്ക കാരണമാണെന്നാണ് റിപ്പോര്‍ട്ട്. ഉത്തരകൊറിയയുടെ കൈവശം മിസൈലുകള്‍ക്കുള്ളില്‍ ഒളിപ്പിച്ച് അയക്കാന്‍ പറ്റിയ 60 അണുബോംബുകളുണ്ടെന്നാണ് അമേരിക്ക ആശങ്കപ്പെടുന്നത്. ഇവ ഇന്റര്‍കോണ്ടിനെന്റല്‍ മിസൈലുകല്‍ ഘടിപ്പിച്ച് അമേരിക്കയിലേക്ക് അയക്കുമെന്ന ഭയവും പെന്റഗണെ അലട്ടുന്നുണ്ട്.

കിം ഇത്തരത്തിലുള്ള അണുബോംബുകള്‍ വികസിച്ചിട്ടുണ്ടോയെന്ന് അമേരിക്കന്‍ ഒഫീഷ്യലുകള്‍ക്ക് ഇനിയും ഉറപ്പായിട്ടില്ല. എന്നാല്‍ ജൂലൈ 28ന് ഡിഫെന്‍സ് ഇന്റലിജന്‍സ് ഏജന്‍സി പുറത്തിറക്കിയ റിപ്പോര്‍ട്ട് ഇക്കാര്യം ഉയര്‍ത്തിക്കാട്ടുന്നുണ്ട്. ഈ അടുത്ത മാസങ്ങളിലായി ഉത്തരകൊറിയ വികസിപ്പിച്ചെടുത്ത മിസൈലുകളിലൊന്നില്‍ ഇത്തരം ആണവ ബോംബുകള്‍ അഥവാ വാര്‍ഹെഡുകള്‍ ഘടിപ്പിച്ച് അമേരിക്കയിലെ ലക്ഷ്യങ്ങള്‍ക്ക് നേരെ തൊടുത്ത് വിടുമെന്ന ആശങ്കയും ഡിഫെന്‍സ് ഇന്റലിജന്‍സ് ഏജന്‍സി ഉയര്‍ത്തുന്നുണ്ട്. ലക്ഷ്യത്തിലേക്ക് ഡസന്‍ കണക്കിന് ആണവ ബോംബുകളെത്തിക്കാന്‍ ശേഷിയുള്ള മിസൈലുകളാണിവ.

ഡിഫെന്‍സ് ഇന്റലിജന്‍സ് ഏജന്‍സി പുറത്തിറക്കിയ റിപ്പോര്‍ട്ട് ചൊവ്വാഴ്ച വാഷിങ്ടണ്‍ പോസ്റ്റ് പുറത്ത് വിട്ടിരുന്നു. കിം ഏത് വിധത്തിലാണ് പടിഞ്ഞാറിന് നേരെ ഭീഷണിയുമായി മുന്നോട്ട് പോകുന്നതെന്ന് ഇതില്‍ വിവരിക്കുന്നുണ്ട്. ബാലിസ്റ്റിക്ക് മിസൈലില്‍ അയക്കാന്‍ സാധിക്കുന്ന ആണവായുധങ്ങള്‍ നോര്‍ത്തുകൊറിയ വികസിപ്പിച്ചെടുത്തിരിക്കുന്നുവെന്നാണ് ഇന്റലിജന്‍സ് സമൂഹം അനുമാനിക്കുന്നതെന്നും ഇന്റര്‍ കോണ്ടിനെന്റല്‍ ബാലിസ്റ്റിക് മിസൈലില്‍ അയക്കാന്‍ സാധിക്കുന്ന അണുബോംബുകളും ഇതില്‍ ഉള്‍പ്പെടുന്നുവെന്നും ഈ റിപ്പോര്‍ട്ട് മുന്നറിയിപ്പേകുന്നു.

ഇതിലൊരു ബോംബിന് 1945ല്‍ ഹിരോഷിമയില്‍ ഇട്ട അണുബോംബിനേക്കാള്‍ ഇരട്ടി ശക്തിയുണ്ടെന്നും ഈ റിപ്പോര്‍ട്ട് മുന്നറിയിപ്പേകുന്നു. 2006 മുതല്‍ നോര്‍ത്തുകൊറിയ അഞ്ച് ആണവ പരീക്ഷണങ്ങളാണ് നടത്തിയിരിക്കുന്നത്. മിസൈല്‍ വാര്‍ഹെഡുകള്‍ എവിടെ വച്ചാണ് പരീക്ഷിച്ചിരിക്കുന്നതെന്ന് വ്യക്തമല്ല. എന്നാല്‍ തങ്ങള്‍ക്കെതിരെ ആഗോളതലത്തില്‍ വര്‍ധിച്ച് വരുന്ന കടുത്ത സമ്മര്‍ദം പരിഗണിച്ച് കിം ഇത്തരം ആയുധങ്ങള്‍ വികസിപ്പിക്കുന്നതില്‍ മുമ്പില്ലാത്ത വിധം ധൃതി പ്രകടിപ്പിച്ചിരുന്നുവെന്നാണ് വ്യക്തമായിരിക്കുന്നത്. അമേരിക്കന്‍ തീരങ്ങളില്‍ അനായാസകരമായി എത്താന്‍ സാധിക്കുന്ന ഇന്റര്‍ കോണ്ടിനെന്റല്‍ ബാലിസ്റ്റിക് മിസൈലുകള്‍ നോര്‍ത്തുകൊറിയ വിജയകരമായി പരീക്ഷിച്ചിരുന്നു.

അലാസ്‌കയില്‍ സ്ഥിതി ചെയ്യുന്ന അമേരിക്കയുടെ മിസൈല്‍ ഡിഫെന്‍സ് സിസ്റ്റംസും ഈ മിസൈലുകളുടെ ലക്ഷ്യങ്ങളുടെ പരിധിയില്‍ വരുന്നുവെന്നത് യുഎസിന്റെ ആശങ്ക വര്‍ധിപ്പിക്കുന്നുണ്ട്. തങ്ങള്‍ക്ക് മേല്‍ യുഎന്‍ സെക്യൂരിറ്റി കൗണ്‍സില്‍ കടുത്ത സാമ്പത്തിക ഉപരോധം ഏര്‍പ്പെടുത്തിയതിനെ തുടര്‍ന്ന് ഇക്കഴിഞ്ഞ വീക്കെന്‍ഡില്‍ കിം അമേരിക്കക്കെതിരെ നേരിട്ട് ഭീഷണി മുഴക്കിയിരുന്നു. ഈ ഉപരോധം തങ്ങള്‍ക്ക് മേല്‍ അടിച്ചേല്‍പ്പിക്കാന്‍ മുന്നിട്ടിറങ്ങിയ അമേരിക്കയോട് പ്രതികാരം ചെയ്യുമെന്നായിരുന്നു കിമ്മിന്റെ ഭീഷണി.