നേപ്പാളില്‍ യാത്രാബസ്‌ നിയന്ത്രണംവിട്ടു നദിയില്‍ മറിഞ്ഞ്‌ 16 പേര്‍ മരിച്ചു. 58 പേര്‍ക്ക്‌ പരിക്കേറ്റു. പ്യൂത്തന്‍ ജില്ലയിലെ ഗോത്തിബാംഗിലാണ്‌ സംഭവം. ഇന്ത്യന്‍ തീര്‍ഥാടകരെയും വഹിച്ചുകൊണ്ടുപോകുകയായിരുന്ന ബസാണ്‌ മാഡി നദിയില്‍ മറിഞ്ഞത്‌.

ഭിംഗ്രിയില്‍ നിന്നു തീര്‍ഥാടനകേന്ദ്രമായ കപിലവസ്‌തുവിലെ കൃഷ്‌ണനഗറിലേക്കു പോകുകയായിരുന്നു ബസ്‌.
ഒമ്പതുപേര്‍ സംഭവസ്ഥലത്തുതന്നെ മരിച്ചു. രണ്ടുപേര്‍ ആശുപത്രിയിലേക്കു പോകുന്ന വഴിയും അഞ്ചുപേര്‍ പ്യൂത്തന്‍ ജില്ലാ ആശുപത്രിയില്‍ വച്ചുമാണ്‌ മരിച്ചത്‌. മരിച്ചവരില്‍ ഏറെയും ഇന്ത്യയിലെ യുപിയില്‍ നിന്നുള്ളവരാണ്‌. ഗുരുതരമായി പരിക്കേറ്റ 19 പേരെ ഭൈരഹാവ മെഡിക്കല്‍ കോളജ്‌ ആശുപത്രിയില്‍ പ്രവേശിപ്പിച്ചു.
അതേസമയം, അപകടസമയത്ത്‌ ഡ്രൈവര്‍ മൊബൈല്‍ ഫോണ്‍ ഉപയോഗിക്കുകയായിരുന്നുവെന്ന്‌ രക്ഷപെട്ട യാത്രക്കാര്‍ ആരോപിച്ചു.