സ്‌പെയിനില്‍ വീണ്ടും ആക്രമണം നടത്താനുള്ള ശ്രമം പൊലീസ് വിഫലമാക്കി, നാലു ഭീകരരെ വധിച്ചു
സ്‌പെയിനിലെ രണ്ടാമത്തെ വലിയ നഗരമായ ബാഴ്‌സലോണയില്‍ രണ്ടാമതും ഭീകരാക്രമണം നടത്താനുള്ള ശ്രമം ചെറുത്തായി പൊലീസ് അറിയിച്ചു. പ്രാദേശിക സമയം വ്യാഴാഴ്ച ഉച്ചയോടെ വാഹനം ഓടിച്ചു കയറ്റി ഭീകരര്‍ നടത്തിയ ആക്രമണത്തില്‍ 13 പേര്‍ കൊല്ലപ്പെട്ടിരുന്നു. അതിന് പിന്നാലെയാണ് കാംബ്രില്‍സ് എന്ന സ്ഥലത്ത് ആക്രമണം നടത്താന്‍ ഭീകരര്‍ ശ്രമിച്ചത്. ഇത്തവണയും വാഹനം ഓടിച്ചു കയറ്റിയുള്ള ആക്രമണത്തിനാണ് ഭീകരര്‍ ശ്രമിച്ചത്.
ഭീകരര്‍ സ്‌ഫോടകവസ്തുക്കള്‍ നിറച്ച ബെല്‍റ്റ് ധരിച്ചിരുന്നതായി മാഡ്രിഡ് പൊലീസ് പറഞ്ഞു. ഏറ്റുമുട്ടലില്‍ നാലു ഭീകരരെ വധിച്ചതായും പൊലീസ് വെളിപ്പെടുത്തി. അഞ്ചാമത്തെ ഭീകരനെ പരിക്കുകളോടെ പിടികൂടിയിട്ടുണ്ട്. ഇയാളെ രഹസ്യാന്വേഷണ ഏജന്‍സികള്‍ക്ക് കൈമാറി.
ബാഴ്‌സലോണ നഗര മദ്ധ്യത്തിലെ ലാസ് റംബ്ലസില്‍ ജനക്കൂട്ടത്തിനു നേരെ ഭീകരന്‍ വാഹനം ഓടിച്ചു കയറ്റിയാണ് ആദ്യം ആക്രമണം നടത്തിയത്. ലാസ് റാംബ്ലാസ്, ഏറ്റവും തിരക്കേറിയ തെരുവും പ്രധാന വിനോദ സഞ്ചാരകേന്ദ്രവുമാണ്. വാഹനങ്ങള്‍ക്കു പ്രവേശനമില്ലാത്ത ഈ മേഖലയില്‍ കാല്‍നടക്കാര്‍ക്കിടയിലേക്കു വാന്‍ ഓടിച്ചുകയറ്റുകയായിരുന്നു. ഭീകരരുടേതെന്നു കരുതുന്ന രണ്ടാമതൊരു വാന്‍ കൂടി പൊലീസ് നഗരപ്രാന്തത്തില്‍നിന്നു കണ്ടെത്തി.
അതേസമയം, രണ്ട് ആയുധധാരികള്‍ സമീപമുള്ള ടര്‍ക്കിഷ് റെസ്‌റ്റോറന്റിലേക്ക് ഓടിക്കയറിയതായും തുടര്‍ന്ന് അവിടെ നിന്നും വെടിയൊച്ച കേട്ടതായും റിപ്പോര്‍ട്ടുണ്ട്. ആക്രമണം ഉണ്ടായ സിറ്റി സെന്ററിലേക്കുള്ള ട്രെയിന്‍ സര്‍വീസുകള്‍ നിറുത്തിവച്ചിരിക്കയാണ്. ജനങ്ങളോട് വീടുകളില്‍ തന്നെ കഴിയാനും ജാഗ്രത പുലര്‍ത്തണമെന്നും അധികൃതര്‍ നിര്‍ദേശം നല്‍കി.
https://www.facebook.com/Malayalivartha
