കസബിന്റെ പിഴവുകള് ആവര്ത്തിക്കാതിരിക്കാന് ലഷ്കറെ ത്വയിബയുടെ പഠനക്ലാസ്
2008ലെ മുംബൈ ഭീകരാക്രമണക്കേസില് അറസ്റ്റിലാകുകയും പിന്നീട് തൂക്കിലേറ്റപ്പെടുകയും ചെയ്ത അജ്മല് കസബിനു സംഭവിച്ച പിഴവുകളെക്കുറിച്ച് പുതിയ അംഗങ്ങള്ക്ക് തീവ്രവാദി സംഘടനയായ ലഷ്കറെ ത്വയിബയുടെ ക്ലാസ്. കസബിന് പറ്റിയ പിഴവുകള് മറ്റുള്ളവര് ആവര്ത്തിക്കാതിരിക്കാനാണ് ക്ലാസ്. കഴിഞ്ഞമാസം അവസാനം തെക്കന് കാശ്മീരില് നിന്നും അറസ്റ്റിലായ പാക്കിസ്ഥാന് ഭീകരനും മുള്ട്ടാന് സ്വദേശിയുമായ മുഹമ്മദ് നവീദ് ജട്ട് എന്ന അബു ഹന്സാലയെ ചോദ്യം ചെയ്തതില് നിന്നാണ് അന്വേഷണസംഘത്തിന് പഠനക്ലാസുകളെക്കുറിച്ച് വിവരം ലഭിച്ചത്. പാക്കിസ്ഥാന് സൈന്യത്തില് നിന്നും വിരമിച്ച ഡ്രൈവറാണ് നവീദിന്റെ പിതാവ്. നവീദും സഹോദരന്മാരും പാക്കിസ്ഥാനിലെ നിരോധിത സംഘടനയായ ലഷ്കറെ ത്വയിബയുടെ പോഷകസംഘടനയായ ജമാത്-ഉദ്-ദവയുടെ മദ്രസകളിലാണ് പഠിച്ചിരുന്നത്. ചോദ്യം ചെയ്യലില്, കസബിനെ താന് കണ്ടിട്ടുണ്ടെന്ന് സമ്മതിച്ച ആദ്യ ലഷ്കറെ ഭീകരന് നവീദാണ്.
മുംബൈ ഭീകരാക്രമണത്തില് കസബിനു പറ്റിയ പിഴവുകളുടെ വീഡിയോ ദൃശ്യങ്ങള് 2009ലെ മക്സര് അക്സര് ക്യാംപില് വച്ച് മറ്റ് റിക്രൂട്ടേഴ്സിന് കാണിച്ചു കൊടുത്തിരുന്നുവെന്നും നവീദ് അന്വേഷണ ഉദ്യോഗ്സഥരോട് വെളിപ്പെടുത്തി. മുംബൈ തീരത്ത് എത്തിയതിനു ശേഷം കസബും കൂട്ടാളികളും സഞ്ചരിച്ച ബോട്ട് നശിപ്പിക്കാന് കഴിയാതിരുന്നതും സ്വന്തം വ്യക്തിത്വം മറച്ചുവയ്ക്കാതെ സാറ്റലൈറ്റ് ഫോണുകളിലൂടെ സംസാരിച്ചതും, ആരേയും ബന്ധികളാക്കാന് കഴിയാതിരുന്നതും കസബിന്റെ വീഴ്ചയായി ക്ലാസില് ചൂണ്ടിക്കാട്ടിയെന്നും നവീദ് പറഞ്ഞു. അഞ്ചാംക്ലാസില് വച്ച് ഔദ്യോഗിക വിദ്യാഭ്യാസത്തിന് വിരാമമിട്ട നവീദ് വടക്കന് കശ്മീരിലെ കേരന് സെക്ടറിലൂടെയാണ് 2012 ഒക്ടോബറില് ഇന്ത്യയിലെത്തിയത്. തെക്കന് കശ്മീരില് നിരവധി പൊലീസുകാരെ കൊലപ്പെടുത്തിയ കേസിലെ പ്രതിയാണിയാള്. പൊലീസുകാരെയും അര്ധസൈനിക വിഭാഗങ്ങളെയും കൊലപ്പെടുത്തുകയാണ് തന്റെ ദൗത്യമെന്നും നവീദ് ജട്ട് അവകാശപ്പെട്ടതായി അന്വേഷണ വൃത്തങ്ങള് പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
