പാക് ടെലിവിഷന്‍ ചാനലില്‍ വാര്‍ത്താ വായനയ്ക്കായി അവതാരക എത്തിയത് ഒരു പെണ്‍കുഞ്ഞുമായി. പ്രേക്ഷകര്‍ ആദ്യം ഒന്ന് ഞെട്ടിയെങ്കിലും ഉദ്ദേശ്യം അറിഞ്ഞപ്പോള്‍ അത്ഭുതമായി. വാര്‍ത്ത വായിക്കാനെത്തിയ സമാ ടി.വി അവതാരക കിരണ്‍ നാസിമാണ് കുഞ്ഞുമായി വാര്‍ത്ത വായനയ്‌ക്കെത്തിയത്. പാകിസ്ഥാനിലെ കസൂറില്‍ എട്ടുവയസുകാരിയെ ക്രൂരമായി മാനഭംഗപ്പെടുത്തി കൊലപ്പെടുത്തിയ സംഭവത്തില്‍ പ്രതിഷേധിച്ചാണ് തന്റെ സ്വന്തം പെണ്‍കുഞ്ഞിനെയും അവര്‍ കൂടെ കൂട്ടിയത്.

''ഇന്ന് ഞാന്‍ അവതാരക കിരണ്‍ നാസ് അല്ല. ഞാനൊരു അമ്മയാണ്. അതിനാലാണ് എന്റെ മകളുമായി ഇന്നിവിടെ എത്തിയിരിക്കുന്നത്.'' ബുള്ളറ്റിന്‍ ആരംഭിക്കും മുന്‍പ് കിരണ്‍ പറഞ്ഞു. രാജ്യത്ത് വര്‍ദ്ധിച്ചുവരുന്ന പീഡനങ്ങളെ കുറിച്ച് ഒന്നരമിനിട്ട് അവര്‍ സംസാരിച്ചു. പെണ്‍കുഞ്ഞുങ്ങള്‍ ആക്രമിക്കപ്പെടുമ്‌ബോള്‍ രാജ്യമാകെ അപമാന ഭാരത്തിലാവുകയാണെന്നും കിരണ്‍ പറഞ്ഞു. ഇത് കേവലം ഒരു പെണ്‍കുട്ടിയുടെ കൊലപാതകം മാത്രമല്ല, സമൂഹമാകെ കൊലചെയ്യപ്പെട്ടിരിക്കുകയാണ്. മനുഷ്യത്വമാണ് മരിച്ചിരിക്കുന്നത് എന്ന പ്രസ്താവനയോടെയാണ് കിരണ്‍ നാസ് വാര്‍ത്ത വായന അവസാനിപ്പിച്ചത്.

പഞ്ചാബ് പ്രവിശ്യയിലെ റോഡ്‌കോട്ടില്‍ എട്ടുവസുകാരിയെ തട്ടിക്കൊണ്ടുപോയി പീഡിപ്പിച്ച് കുപ്പത്തൊട്ടിയില്‍ തള്ളിയ സംഭവത്തില്‍ പാകിസ്ഥാനിലാകെ വ്യാപക പ്രതിഷേധമാണ് നടക്കുന്നത്. ഒരു വര്‍ഷത്തിനിടെ കസൂറില്‍ നടക്കുന്ന 12ാമത് ബാലപീഡനമാണിതെന്ന് പ്രാദേശിക മാദ്ധ്യമങ്ങള്‍ റിപ്പോര്‍ട്ട് ചെയ്തു. ഈ മേഖലയുമായി ബന്ധപ്പെട്ട് വലിയൊരു ബാലപീഡന ശൃംഖല തന്നെ പ്രവര്‍ത്തിക്കുന്നതായും റിപ്പോര്‍ട്ടില്‍ പറയുന്നു.