ഉത്തര കൊറിയയുടെ ആണവ പരീക്ഷണങ്ങള്‍ നടത്തുന്ന സ്ഥലത്ത് തുരങ്ക നിര്‍മ്മാണം നടക്കുന്നതായി റിപ്പോര്‍ട്ട്. ആണവ പരീക്ഷണങ്ങള്‍ നടക്കുന്ന സ്ഥലത്ത് മനുഷ്യരും തുരങ്ക നിര്‍മിക്കാനുപയോഗിക്കുന്ന കാര്‍ട്ടുകളും സ്ഥിരമായി വന്നുപോകുന്ന ഉപഗ്രഹ ചിത്രങ്ങള്‍ പുറത്ത് വന്നിട്ടുണ്ട്.
ഉത്തര കൊറിയയിലെ പുന്‍ഗി റിയില്‍ മേഖലയിലെ ചിത്രങ്ങളാണ് 38നോര്‍ത്ത് വെബ്‌സൈറ്റ് പുറത്ത് വിട്ടത്. ഉത്തരകൊറിയയുടെ ആറു ആണവ പരീക്ഷണങ്ങളില്‍ അവസാനത്തെ അഞ്ചും പുന്‍ഗിറിയില്‍ വച്ചാണ് നടന്നത്.
ഭൂമിക്കടിയില്‍ സ്ഥാപിച്ച തുരങ്കങ്ങളില്‍ നിന്നാണ് ഉത്തരകൊറിയയുടെ എല്ലാ പരീക്ഷണങ്ങളും നടന്നത്.
ആണവ പരീക്ഷണങ്ങള്‍ നടത്തിയതിന്റെ ഫലമായി മേഖലയിലെ പാറകള്‍ക്ക് വിള്ളലുണ്ടാക്കിയിട്ടുണ്ടെന്നും ഏത് നിമിഷവും തകരാവുന്ന അവസ്ഥയിലാണെന്ന് റിപ്പോര്‍ട്ടില്‍ പറയുന്നു. കഴിഞ്ഞ ഒക്ടോബര്‍ മാസം 38നോര്‍ത്ത് വെബ്‌സൈറ്റ് പുറത്ത് വിട്ട റിപ്പോര്‍ട്ടില്‍ ഭൂഗര്‍ഭ അന്തരീക്ഷം മാറുകയാണെന്ന് പറഞ്ഞിരുന്നു.

പരീക്ഷണം നടക്കുന്ന മേഖലയില്‍ 120ഓളം ആളുകള്‍ എത്തിയതായി ഉപഗ്രഹചിത്രത്തില്‍ നിന്ന് മനസിലാക്കാന്‍ സാധിക്കുമെന്നും ചിത്രങ്ങള്‍ ഡിസംബറില്‍ എടുത്തതാണെന്നും റിപ്പോര്‍ട്ടില്‍ പറയുന്നു.