ഇറ്റലി: ഫേസ്ബുക്കിലൂടെ നമ്മുക്ക് ആരുടെ ഫോട്ടോ വേണമെങ്കിലും പോസ്റ്റ് ചെയ്യാൻ കഴിയും. എന്നാൽ ഇനി ഒന്നു ചിന്തിക്കണം ! കാരണം മക്കളുമൊത്തുള്ള ചിത്രങ്ങളോ അവരുടെ ജീവിതത്തിലെ സവിശേഷമുഹൂര്‍ത്തങ്ങളോ അവരോട് ചോദിക്കാതെ ഫേസ്ബുക്കിലും ഇന്‍സ്റ്റഗ്രാമിലും മറ്റും പോസ്റ്റ് ചെയ്യുന്നവര്‍ അമ്പരക്കേണ്ട ഒരു സംഭവമാണ് അരങ്ങേറിയിരിക്കുന്നത്. ഇറ്റലിയിൽ ഒരമ്മ തന്റെ മകന്റെ അനുവാദമില്ലാതെ മകന്റെ ഫോട്ടോസ് ഫേസ്ബുക്കില്‍ പോസ്റ്റ് ചെയ്തുവെന്ന പരാതിയുമായി 16-കാരൻ കോടതിയിലെത്തിയിരിക്കുകയാണ്.

അമ്മയുടെ സോഷ്യല്‍ മീഡിയ അക്കൗണ്ടില്‍ തന്റെ ചിത്രങ്ങള്‍ അനുവാദമില്ലാതെ പോസ്റ്റ് ചെയ്യുന്നുവെന്ന 16-കാരന്റെ പരാതി ഗൗരവമുള്ളതാണെന്ന് കോടതി നിരീക്ഷിച്ചു. ചിത്രങ്ങള്‍ ഉടനടി നീക്കം ചെയ്യണമെന്നാവശ്യപ്പെട്ട കോടതി അല്ലാത്തപക്ഷം 10,000 യൂറോ പിഴയടക്കേണ്ടിവരുമെന്ന മുന്നറിയിപ്പും നല്‍കി. അമ്മയുടെ സോഷ്യല്‍ മീഡിയ ഭ്രമം കാരണം അച്ഛന്‍ അകന്നതും മറ്റും കണ്ടുവളര്‍ന്ന മകനാണ് അമ്മയ്ക്കെതിരേ കോടതിയിലെത്താന്‍ തയ്യാറായത്.

അനുവാദമില്ലാതെ മകന്റേതാണെങ്കില്‍ക്കൂടി ചിത്രങ്ങള്‍ പരസ്യപ്പെടുത്തുന്നത് ഇറ്റാലിയന്‍ പകര്‍പ്പവകാശ നിയമത്തിന് വിരുദ്ധമാണെന്ന് കോടതി നിരീക്ഷിച്ചു. മകനുള്‍പ്പെടുന്ന ചിത്രങ്ങളും വീഡിയോകളും പരാമര്‍ശങ്ങളും ഉടനടി നീക്കം ചെയ്യണമെന്നാണ് കോടതിയുടെ ഉത്തരവ്.