അമേരിക്കൻ പ്രസിഡന്റ് ഡൊണാൾഡ് ട്രംപിന് അൽപ്പം പൊണ്ണത്തടി ഉണ്ടെന്നേ ഉള്ളൂ. ആള് നല്ല ആരോഗ്യവാനാ. അദ്ദേഹം പൂർണ ആരോഗ്യവാനെന്നാണ് വൈദ്യപരിശോധനാഫലം പറയുന്നത്. എഴുപത്തിയൊന്നുകാരനാണെങ്കിലും ട്രംപ് ആഹാരകാര്യത്തിലൊന്ന് ശ്രദ്ധിച്ചാൽ 200 വയസ് വരെ ജീവിക്കുമെന്നാണ് ഡോക്ടർമാരുടെ വിലയിരുത്തൽ. പ്രസിഡന്റായതിന് ശേഷമുള്ള ട്രംപിന്റെ ആദ്യ വൈദ്യപരിശോധനയാണ് നടന്നത്.

അല്പം പൊണ്ണത്തടി ഉണ്ടെന്നും ഇതൊഴിച്ചു നിറുത്തിയാൽ കാര്യമായ ആരോഗ്യപ്രശ്നങ്ങൾ ഒന്നും തന്നെ ട്രംപിനില്ലെന്നും റിപ്പോർട്ടിൽ പറയുന്നു. ട്രംപിന് മതിയായ വ്യായാമം ഇല്ലെന്നും റിപ്പോർട്ടിലുണ്ട്. എന്നാൽ,​ ആറടി മൂന്നിഞ്ച് ഉയരവും 108 കിലോഗ്രാം തൂക്കവുമുള്ള ട്രംപിന്റെ ആരോഗ്യരഹസ്യം പാരമ്പര്യമാണെന്നും ഡോക്ടർ പറയുന്നു.

മദ്യപാനം, പുകവലി തുടങ്ങിയ ദുശീലങ്ങൾ ഇല്ലാത്തതിന്റെ ഗുണങ്ങളും ശരീരത്തിൽ കാണാം. നാലര മുതൽ ആറു വരെ കിലോഗ്രാം വരെ ശരീരഭാരം കുറയ്ക്കാൻ ഒരുങ്ങുകയാണ് ട്രംപ്. ഇതിനോടൊപ്പംതന്നെ ഓർമശേഷിയും ധാരണാശേഷിയും വിലയിരുത്തുന്ന കോഗ്നിറ്റീവ് പരിശോധനയ്ക്കും ട്രംപ് സ്വയം വിധേയനായി. 30ൽ 30 ആണ് ഈ പരിശോധനയിൽ ട്രംപിനു ലഭിച്ച സ്കോർ.