താന്‍ ഗര്‍ഭിണിയാണെന്ന സത്യം ലോകത്തെ അറിയിച്ച് ന്യുസിലന്‍ഡ് പ്രധാനമന്ത്രി ജസീന്ദ അര്‍ഡേണ്‍. താനും പങ്കാളി ക്ലാര്‍ക്കെ ഗേഫോര്‍ഡും കുഞ്ഞിനെ കാത്തിരിക്കുകയാണ്. ജൂണില്‍ കുഞ്ഞ് എത്തുമെന്നാണ് പ്രതീക്ഷിക്കുന്നത്. കുഞ്ഞിന്റെ ആരോഗ്യത്തിനായി ആറ് ആഴ്ചത്തേക്ക് താന്‍ അവധിയില്‍ പ്രവേശിക്കുകയാണ്. 2017 ഒരു മഹത്തായ വര്‍ഷമാണെന്ന് തങ്ങള്‍ കരുതുന്നതായും 37കാരിയായ പ്രധാനമന്ത്രി ഇന്‍സ്റ്റഗ്രാമില്‍ കുറിച്ചു. 

അധികാരത്തിലിരിക്കേ അമ്മയാകുന്ന ലോകത്തെ രണ്ടാമത്തെ തെരഞ്ഞെടുക്കപ്പെട്ട ഭരണാധികാരിയാണ് ജസീന്ദ. 1990ല്‍ പാകിസ്താന്‍ പ്രധാനമന്ത്രിയായിരുന്ന ബേനസീര്‍ ഭൂട്ടോയാണ് ഈ നേട്ടത്തിന്റെ ആദ്യ ഉടമ. രാജകുടുംബാംഗങ്ങളായ അമ്മമാരെ പരിഗണിക്കാതെയാണിത്.1856 നുശേഷം ന്യുസിലാന്‍ഡിന് ലഭിക്കുന്ന ഏറ്റവും പ്രായം കുറഞ്ഞ പ്രധാനമന്ത്രിയാണ് ജസീന്ദ. ഒക്‌ടോബറിലാണ് മധ്യ-ഇടത് സഖ്യ സര്‍ക്കാര്‍ ഇവര്‍ രുപീകരിച്ചത്. സമൂഹ മാധ്യമത്തില്‍ തന്റെ പോസ്റ്റ് ഇട്ടതോടെ ജസീന്ദയ്ക്ക് കക്ഷി രാഷ്ട്രീയമില്ലാതെ അഭിനന്ദന പ്രവാഹമാണ് ഇപ്പോള്‍ ലഭിക്കുന്നത്.