യുനാന്‍: മക്കളെ ശിക്ഷിക്കാതെ വളർത്താനാകുമോ എന്ന് ചോദിച്ചാൽ ഉത്തരം കാണില്ല എന്നാൽ ഇത്തരത്തിൽ മക്കളെ ശിക്ഷിക്കുന്നവരെ എന്താണ് ചെയ്യേണ്ടത് ?....സ്വന്തം മകനെ സ്കൂട്ടറിന്റെ പിറകില്‍ കയര്‍ കൊണ്ട് കെട്ടി നിലത്തിട്ട് വലിക്കുന്ന യുവതിയുടെ വീഡിയോ സോഷ്യല്‍ മീഡിയകളില്‍ വൈറലാകുന്നു. മകനെ സ്കൂട്ടറിന് പിന്നില്‍ കെട്ടി വാഹനം മുന്നില്‍ നിന്നും തള്ളിയാണ് യുവതി തന്റെ ശിക്ഷാ രീതി നടപ്പാക്കുന്നത്. ചൈനയുടെ തെക്ക് ഭാഗത്തുള്ള യുനാന്‍ പ്രവിശ്യയിലെ സൗട്ടോംഗ് നഗരത്തില്‍ വെച്ചാണ് സ്വന്തം മകനെതിരെ ഒരു യുവതിയുടെ ഇത്ര അപകടകരമായ ശിക്ഷാ രീതി അരങ്ങേറിയത്.

വീഡിയോ സോഷ്യല്‍മീഡിയയില്‍ വൈറലായതോടെ രൂക്ഷ പ്രതിഷേധവുമായി നിരവധി പേരാണ് രംഗത്തെത്തിയിരിക്കുന്നത്. പത്ത് വയസ്സിന് താഴെ മാത്രം പ്രായം തോന്നിക്കുന്ന പയ്യനോടാണ് യുവതിയുടെ ഈ ക്രൂരമായ പെരുമാറ്റം. മകന്‍ വികൃതി കാണിക്കുന്നത് കൊണ്ടാണ് താന്‍ ഇത്തരത്തില്‍ ചെയ്യുന്നതെന്നാണ് ഈ പ്രവൃത്തി കണ്ട് നിന്നവരോടും എതിര്‍ത്തവരോടും യുവതി പറഞ്ഞത്. മാത്രമല്ല കഴിഞ്ഞ കുറച്ച്‌ ദിവസങ്ങളായി താന്‍ മകനെ സ്ഥിരമായി ഇത്തരത്തില്‍ ശിക്ഷിക്കാറുണ്ടെന്നും യുവതി എതിര്‍ക്കാനെത്തുന്നവരോട് പറയുന്നുണ്ട്.