സാന്റിയാഗോ: പല തരത്തിൽ വിവാഹം കഴിക്കുന്നവരുണ്ട് എന്നാൽ എയര്‍ലൈന്‍ ജീവനക്കാരായ കാര്‍ലസ് കുഫാഡിയും പോളാ പോഡെസ്റ്റിയും തങ്ങളുടെ കല്യാണം ആകാശത്തു വച്ച് മാർപാപ്പയുടെ കാർമ്മികത്വത്തിൽ നടത്തിയ സന്തോഷത്തിലാണിപ്പോൾ.

ലാറ്റിനമേരിക്കന്‍ വിമാന കമ്പനിയായ ലറ്റാം എയര്‍ലൈന്‍ ജീവനക്കാരായ ഇരുവരും 2010ല്‍ വിവാഹം നടത്തിയിരുന്നുവെങ്കിലും വിവാഹം നടത്താനായി നിശ്ചയിച്ചിരുന്ന പള്ളി ഭൂകമ്പത്തിൽ തകര്‍ന്നിരുന്നു. അതിനാല്‍ കത്തോലിക്കാ വിശ്വാസമനുസരിച്ചായിരുന്നില്ല വിവാഹം നടന്നത്.

ചിലിയില്‍ ഔദ്യോഗിക സന്ദര്‍ശനത്തിനെത്തിയ മാര്‍പാപ്പയ്ക്കൊപ്പം വിമാനത്തില്‍ ഒരുമിച്ചുള്ള ചിത്രമെടുക്കാന്‍ എത്തിയ കാര്‍ലസിനോടും പോളയോടും മാര്‍പാപ്പ വിവാഹിതരാണോ എന്നന്വേഷിച്ചു.
മതാചാര പ്രകാരം വിവാഹിതരായിട്ടില്ലെന്ന് ഇരുവരും അറിയിക്കുകയുമുണ്ടായി. തുടര്‍ന്നാണ് മാര്‍പാപ്പയുടെ സാന്നിധ്യത്തിൽ 36,000 അടി ഉയരത്തില്‍ ഇരുവരും വിവാഹിതരായത്.

വിമാനക്കമ്പനിയിലെ രണ്ടുപേര്‍ വിവാഹപത്രത്തില്‍ സാക്ഷികളായി ഒപ്പിട്ടു അതോടൊപ്പം തന്നെ ഫ്രാന്‍സിസ് എന്ന ലളിതമായ ഒപ്പു നല്‍കി വിവാഹം നടന്നതായി മാര്‍പാപ്പയും ഓദ്യോഗിക സാക്ഷ്യം നല്‍കി.