രോഗികളെ ചികിൽസിച്ച് മരണത്തിൽനിന്നും ജീവിതത്തിലേക്ക് കൈപിടിച്ചുയർത്തുന്നതിൽ ഡോക്ടറെ സഹായിക്കേണ്ട നേഴ്‌സ് ബോറടി മാറ്റാൻ ചെയ്യുന്നത് കൊലപാതകം. 2015ൽ നടന്ന രണ്ടു കൊലപാതകങ്ങളുടെ അന്വേഷണം പുരോഗമിക്കുമ്പോൾ നഴ്സിനെകുറിച്ച് ലഭിക്കുന്നത് ഞെട്ടിപ്പിക്കുന്ന വിവരങ്ങളാണ്. ജർമ്മനിയിലെ വടക്കൻ നഗരമായ ബ്രമെനിലെ ദെൽമെൻഹോസ്റ്റ് ആശുപത്രിയിൽ നഴ്‌സായിരുന്ന നീൽസ് ഹോഗെൽ എന്ന 41 കാരനാണ് ഏവരെയും അമ്പരിപ്പിച്ചിരിക്കുന്നത്. ബോറടി മാറ്റാൻ തന്റെ രോഗികളെ കൊലപ്പെടുത്തിയ നീൽസ് 97 കൊലപാതകങ്ങളിൽ കൂടി കുറ്റക്കാരനാണെന്ന് പ്രോസിക്യൂഷൻ.

ആറ് രോഗികളെ കൊന്ന കേസിൽ ജീവപര്യന്തം ശിക്ഷ അനുഭവിക്കുന്ന ഇയാൾ ഈ കേസുകളിൽ കൂടി വിചാരണ നേരിടണമെന്ന് കോടതി വക്താവ് അറിയിച്ചു. ഈ കേസുകളിലെ വിചാരണ ഈ വർഷം അവസാനം തുടങ്ങുമെന്നും അദ്ദേഹം പറഞ്ഞു. ഇയാൾക്ക് ബോറടിക്കുമ്പോൾ രോഗികളിൽ ഹൃദയാഘാതത്തിനും രക്തചംക്രമണത്തിനും തടസമാകുന്ന കൊടും വിഷാംശം കലർന്ന മരുന്ന് കുത്തിവയ്ക്കും. തുടർന്ന് രോഗികൾ മരണ വെപ്രാളം കാണിക്കുമ്പോൾ മറുമരുന്ന് നൽകി രക്ഷിക്കാൻ ശ്രമിക്കുകയും ചിലതിൽ വിജയിക്കുകയും ചെയ്തിരുന്നു. പരീക്ഷണത്തിൽ ഭൂരിഭാഗം പേർക്കും ജീവൻ നഷ്ടപ്പെടുകയാണുണ്ടായത്. ഇതുവരെ നീൽസ് 06 പേരുടെ മരണത്തിന് കാരണക്കാരനായിട്ടുണ്ട്. ജർമനിയുടെ ചരിത്രത്തിലെ ഏറ്റവും വലിയ സീരിയൽ കില്ലറായാണ് നീൽസ് അറിയപ്പെടുന്നത്.