ചാള്‍സ് - ഡയാന രാജദമ്പതികളുടെ രണ്ടാമത്തെ പുത്രന്‍ ഹാരി രാജകുമാരനും യുഎസ് ചലച്ചിത്ര താരവും കാമുകിയുമായ മേഗന്‍ മാര്‍ക്കിളും ഏറെനാളത്തെ പ്രണയത്തിനുശേഷം വിവാഹിതരാകാൻ പോകുകയാണ്. ഇതിനുപിന്നാലെ രാജകുടുംബത്തിൽ മറ്റൊരു വിവാഹം കൂടി നടക്കാൻ പോകുകയാണ്. എലിസബത്ത് രാജ്ഞിയുടെ മകൻ ആൻഡ്രൂവിന്റെ രണ്ടാമത്തെ മകളായ യൂജനി രാജകുമാരിയാണ് വിവാഹിതയാകുന്നത്.

ഏഴു വർഷത്തെ പ്രണയത്തിനുശേഷം കാമുകനും നിശാക്ലബ് മാനേജരുമായ ജാക്ക് ബ്രൂക്സ് ബാങ്കാണ് വരൻ. ജനുവരി ആദ്യം നിക്കരാഗ്വയിൽ വച്ച് യൂജനിയുടെ വിവാഹനിശ്ചയം നടന്നിരുന്നു. വിൻസർ കൊട്ടാരത്തിലെ സെന്റ് ജോർജ് ചാപ്പലിൽ ഈവർഷം അവസാനമായിരിക്കും വിവാഹം. വിവാഹതീയതി പുറത്ത് വിട്ടിട്ടില്ല. മേയ് 19ന്, ഹാരി രാജകുമാരനും യു.എസ് നടി മേഗൻ മർക്കിളും തമ്മിലുള്ള വിവാഹവും സെന്റ് ജോർജ് ചാപ്പലിലാണ് നടക്കുന്നത്.