ഒരു നായ മനുഷ്യനെ കടിച്ചാൽ അത് വാർത്തയല്ല എന്നാൽ ഒരു മനുഷ്യൻ നായയെ കടിച്ചാൽ അത് വാർത്തയാണ്. അത്തരത്തിലൊരു ഗംഭീര സംഭവമാണ് അങ്ങ് അമേരിക്കയിൽ നടന്നത്. എന്നതാണെന്നല്ലേ സംഭവം?...

ന്യൂഹാംപ്ഷയറിലെ ബോസ്കേവനില്‍ ഒരാള്‍ക്ക് വെടിയേറ്റിട്ടുണ്ടെന്ന റിപ്പോര്‍ട്ടുകളെ തുടര്‍ന്നാണ് പോലീസ് ഇവിടെയെത്തിയത്. ഇവിടെ താമസിക്കുന്ന രണ്ടുപേര്‍ക്കെതിരേ നേരത്തെ തന്നെ അറസ്റ്റ് വാറന്റ് നിലവിലുണ്ട്. ഇരുവരെയും അറസ്റ്റ് ചെയ്യാന്‍ കൂടിയാണ് പോലീസ് ഇവിടെയെത്തിയത്.

ഇവരോട് വീട്ടിന് പുറത്തേക്ക് വരാന്‍ പോലീസ് ആവശ്യപ്പെട്ടെങ്കിലും ഇരുവരും തയ്യാറായില്ല. പോലീസ് നിലപാട് കടുപ്പിച്ചതോടെ ഇരുവരും വീട്ടിനുള്ളില്‍ ഒളിച്ചിരുന്നു. ഇതോടെ പോലീസ് വീട്ടിനകത്ത് തിരച്ചില്‍ ആരംഭിച്ചു. കൂട്ടിയിട്ട തുണികള്‍ക്കുള്ളില്‍ ഒളിച്ചിരുന്ന ഒരു പ്രതിയെ വേദ എന്ന പോലീസ് നായ കണ്ടുപിടിക്കുമെന്ന് ഉറപ്പായതോടെ ഇയാള്‍ പോലീസുകാര്‍ക്കൊപ്പം ഉണ്ടായിരുന്ന നായയെ കടിക്കുകയായിരുന്നു.

യുവാവിനെതിരെ നായയെ കടിച്ചതിനും അറസ്റ്റ് തടയാന്‍ ശ്രമിച്ചതിനും കേസെടുത്തിട്ടുണ്ട്. ഉദ്യോഗസ്ഥനെ ആക്രമിച്ച കേസ് വേറെയുമുണ്ട്. അതേസമയം ഇയാളുടെ കടിയേറ്റ നായ പ്രാഥമിക ചികിത്സ ശേഷം സുഖംപ്രാപിച്ച്‌ വരികയാണെന്ന് പോലീസ് അറിയിച്ചു.