ലോകം ഞെട്ടലോടെ കേട്ട ബ്ലൂ വെയില്‍ എന്ന അപകടകരമായ ഗെയിമിന് ശേഷം ടൈഡ് പോഡ് ചലഞ്ച് എന്ന പേരില്‍ മറ്റൊരു ഭീകരന്‍ ഗെയിമും ലോകം മുഴുവന്‍ പ്രചരിക്കുന്നു. വിചിത്രമായ നിയമാവലികളാണ് ഈ ഗെയിമിലുള്ളത്. വസ്ത്രങ്ങള്‍ അലക്കുന്നതിനുപയോഗിക്കുന്ന സോപ്പുപൊടി തിളപ്പിക്കലാണ് കളിയുടെ ആദ്യ ഘട്ടം. പിന്നീട് ഇത് വായിലിട്ട് തുപ്പണം അതിനു ശേഷം വീണ്ടും അകത്തേക്കിറക്കണം .

ഈ ഭാഗം സമൂഹ മാധ്യമങ്ങളില്‍ ലൈവായി പോസ്റ്റ് ചെയ്യണം. തുടര്‍ന്ന് മറ്റു സുഹൃത്തുക്കളെ ഈ ഗെയിം കളിക്കാനായി ലൈവിലൂടെ തന്നെ വെല്ലുവിളിക്കണം. അമേരിക്കയിലെ ഒരു 17 കാരന്‍ ഇത്തരത്തില്‍ മൂന്നു സോപ്പു പൊടികള്‍ വിഴുങ്ങി. കടുത്ത ശ്വാസ തടസവും ഛര്‍ദ്ദിയും പിടിപെട്ട ആളെ ഉടന്‍ തന്നെ ആശുപത്രിയിലെത്തിച്ചു. കടുത്ത കെമിക്കലുകള്‍ ഉള്ളില്‍ ചെന്നതു കൊണ്ടു ആമാശയവും അന്നനാളവും കരിഞ്ഞു തുടങ്ങിയ അവസ്ഥയിലായിരുന്നു അയാള്‍. രക്തത്തില്‍ ഓക്സിജന്റെ അളവു കുറഞ്ഞിരുന്നു.

പെട്ടന്നു തന്നെ ആശുപത്രിയിലെത്തിച്ചതു കൊണ്ടാണ് ജീവന്‍ രക്ഷിക്കാനായത്. കൗമാരപ്രായത്തിലുള്ള നിരവധി കുട്ടികള്‍ അത്യന്തം അപകടകരമായ ഈ ചലഞ്ച് ഏറ്റെടുക്കുന്നു. ബോധക്ഷയത്തില്‍ തുടങ്ങി കോമയോ മരണമോ വരെ ഇതിലൂടെ സംഭവിക്കാമെന്നാണ് പഠനങ്ങള്‍ പറയുന്നു.