ലോകത്തിലെ ഏറ്റവും ഉയരമുള്ള മനുഷ്യനും ഏറ്റവും ഉയരം കുറഞ്ഞ സ്ത്രീയും തമ്മിൽ കണ്ടു മുട്ടിയാൽ എന്തായിരിക്കും അവസ്ഥ. എങ്കിൽ അത്തരത്തിലുള്ളൊരു സംഭവത്തിനു സാക്ഷ്യം വഹിച്ചിരിക്കുകയാണ് ഈജിപ്ത്.

സംഭവം ഇങ്ങനെ...കഴിഞ്ഞ വെള്ളിയാഴ്ച്ച ഒരു ഫോട്ടോഷൂട്ടിനു വേണ്ടിയാണ് ഈജിപ്തില്‍ ഇരുവരും ഒരുമിച്ചെത്തിയത്. രാജ്യത്തെ ടൂറിസത്തിന് ഉണര്‍വേകാനായി ഈജിപ്ഷ്യന്‍ ടൂറിസം പ്രോമോഷന്‍ ബോര്‍ഡിന്റെ ക്ഷണം സ്വീകരിച്ചാണ് ഇരുവരും ഈജിപ്തില്‍ എത്തിയത്.

തുര്‍ക്കിയിലെ മാര്‍ഡിനിലാണ് സുല്‍ത്താന്‍ കോസന്റെ ജനനം. സുല്‍ത്താന്‍ കോസന് പൊക്കം 2.51 മീറ്റര്‍ (എട്ട് അടി ഒന്ന് ഇഞ്ച്) ആണ്. ലോകത്തിലെ ഉയരം കൂടിയ മനുഷ്യന്‍ എന്ന വിശേഷണത്തിനൊപ്പം കോസന്റെ കൈകളാണ് ലോകത്തിലെ ഏറ്റവും വലുതും. 25.8 സെന്റീമീറ്റര്‍ (11.22 ഇഞ്ച്) നീളമുണ്ട് കൈകള്‍ക്ക്.

കോസന്റെ ഉയരം ഒരു തരം വളര്‍ച്ചാ വൈകല്യമായ പിറ്റിയൂറ്ററി ജിജാന്റിസം എന്ന രോഗത്തിന്റെ പരിണിത ഫലമാണ്. 2009 ലാണ് ലോകത്തിലെ ഏറ്റവും ഉയരമുള്ള മനുഷ്യന്‍ എന്ന റെക്കോര്‍ഡ് കോസനെ തേടിയെത്തിയത്.

മഹാരാഷ്ട്രയിലെ നാഗ്പൂരിൽ ജനിച്ച മിസ് അംഗേ ആണ് ലോകത്തിൽ ഏറ്റവും പൊക്കം കുറഞ്ഞ സ്ത്രീ. 62.8 സെ.മി ആണ് ഇവരുടെ ഉയരം. 2011 ലാണ് അംഗേ ലോകത്തെ ഏറ്റവും ഉയരം കുറഞ്ഞ സ്ത്രീയെന്ന ഗിന്നസ് റെക്കോര്‍ഡിന് ഉടമയായത്.

ഡ്വാര്‍ഫിസം അഥവ അക്കോണ്ട്രോപ്ലാസിയ എന്ന അവസ്ഥയാണ് ആംഗേ യുടെ വളർച്ച മുരടിപ്പിക്കാൻ കരണമായത്. രണ്ടു വയസ് മാത്രം പ്രായമുള്ള കുട്ടിയെക്കാലും ചെറുതാണ് അംഗേ. ബിഗ് ബോസ്, അമേരിക്കന്‍ ഹൊറര്‍ സ്റ്റോറി തുടങ്ങിയ ടിവി ഷോകളില്‍ അംഗേ പങ്കെടുത്തിട്ടുണ്ട്.