സ്‌കൂള്‍ വാഹനത്തിനുള്ളില്‍ വിദ്യാര്‍ത്ഥി ഉണ്ടെന്നറിയാതെ ആയ പൂട്ടിക്കൊണ്ടുപോയി, വാഹനത്തില്‍ കുടുങ്ങിയ ആറുവയസ്സുകാരന് ദാരുണാന്ത്യം
സ്‌കൂള്‍ വാഹനത്തിനുള്ളില്‍ വിദ്യാര്‍ത്ഥി ഉണ്ടെന്നറിയാതെ ആയ പൂട്ടിക്കൊണ്ടുപോയി. വാഹനത്തിനുള്ളില്‍ കുടുങ്ങിക്കിടന്ന ആറു വയസ്സുകാരന്‍ മരിച്ചു. മധ്യപ്രദേശിലെ ഹോഷങ്കാബാദിലാണ് സംഭവമുണ്ടായത്. ദൊലാരിയയിലെ സായ് ഇന്റര്‍നാഷണല്‍ സ്‌കൂളിലാണ് സംഭവം. ഈ മാസം 20നാണ് നൈതിക് ഗൗര്‍ എന്ന വിദ്യാര്‍ത്ഥിയെ അബോധാവസ്ഥയില്‍ സ്‌കൂള്‍ കാറിനുള്ളില്‍ നിന്ന് കണ്ടെത്തിയത്.
ഭോപ്പാലിലെ ആശുപത്രിയില്‍ പ്രവേശിപ്പിച്ചുവെങ്കിലും പിറ്റേന്ന് മരിക്കുകയായിരുന്നു. ശ്വാസസംബന്ധമായ ബുദ്ധിമുട്ടുകള്‍ ഉള്ള കുട്ടിയായിരുന്നു ഇത്. സുന്ദര ഗൗര്‍ എന്നയാളുടെ മകനാണ് മരിച്ചത്. തന്റെ മകനെ സ്‌കൂള്‍ അധികൃതര്‍ കൊല്ലപ്പെടുത്തിയെന്ന് ഗൗര്‍ പറയുന്നു. നാലു മണിക്കൂറോളം മകനെ കാറിനുള്ളില്‍ പൂട്ടിയിട്ടുവെന്നും ഗൗര്‍ ആരോപിച്ചു.
സാധാരണ സ്‌കൂളിലെ ആയയാണ് കുട്ടികളെ കാറില്‍ നിന്നും ഇറക്കികൊണ്ടുപോകുന്നത്. അന്നേ ദിവസം കുട്ടിയുടെ കാര്യം ആയ മറന്നുപോയതാണ് അപകടത്തിന് ഇടയാക്കിയതെന്ന് സായ് സ്‌കൂള്‍ അധികൃതര്‍ വ്യക്തമാക്കി. സ്‌കുള്‍ ഡയറക്ടര്‍ നിതിന്‍ ഗൗറിന്റെ കാറിലാണ് നൈതിക് കുടുങ്ങിപ്പോയത്. സ്‌കൂള്‍ വാന്‍ ലഭിക്കാത്തതിനെ തുടര്‍ന്ന് നിതിന്‍ ഗൗറിന്റെ കാറിലാണ് നൈതികും ചില അധ്യാപകരും അന്നേ ദിവസം സ്‌കൂളില്‍ എത്തിയത്. എന്നാല്‍ കാറില്‍ നിന്ന് നൈകിതിനെ കൂട്ടിക്കൊണ്ടുപോകാന്‍ അറ്റന്‍ഡര്‍ മറന്നുപോയതാണെന്നും ഡയറക്ടര്‍ പറയുന്നു
https://www.facebook.com/Malayalivartha
