പോണ്‍ നായിക സ്‌റ്റോമി ഡാനിയേല്‍സും ട്രംപുമായുള്ള ഇടപാടുകളുടെ നിര്‍ണായക രേഖകള്‍ പ്രസിഡന്റിന്റെ അഭിഭാഷകന്റെ ഓഫീസില്‍ റെയ്ഡ് നടത്തി എഫ്.ബി.ഐ. പിടിച്ചെടുത്തു. ദീര്‍ഘകാലമായി തന്റെ അറ്റോണി ജനറലായ മൈക്കല്‍ കോഹന്റെ ഓഫീസില്‍നടന്ന പരിശോധന, രാജ്യത്തിനുനേരെയുള്ള ആക്രമണത്തിന് സമാനമാണെന്ന് പറഞ്ഞ് ട്രംപ് പ്രതികരിച്ചു. ഭരണത്തലവന്റെ രഹസ്യങ്ങള്‍ അദ്ദേഹത്തിന്റെ ഓഫീസില്‍നിന്ന് രാജ്യത്തെ പരമോന്നത അന്വേഷണ ഏജന്‍സി റെയ്ഡ് ചെയ്ത് പിടിച്ചെടുക്കുന്ന സമാനതകളില്ലാത്ത സംഭവമാണ് അമേരിക്കയില്‍ അരങ്ങേറിയതെന്ന് വിലയിരുത്തപ്പെടുന്നു.

അവിഹിത ബന്ധത്തെക്കുറിച്ച് പുറത്തുപറയാതിരിക്കുന്നതിന് കോഹന്‍ വഴി ട്രംപ് സ്‌റ്റോമി ഡാനിയേല്‍സിന് പണം കൈമാറിയെന്നാണ് ആരോപണം. തിരഞ്ഞെടുപ്പ് പ്രചാരണവേളയില്‍ സ്‌റ്റോമി താനും ട്രംപും കിടപ്പറ പങ്കിട്ട കഥ വെളിപ്പെടുത്തുമെന്നായിരുന്നു ട്രംപിന്റെ ആശങ്ക. ആരോപണം ട്രംപ് കൂടെക്കൂടെ നിഷേധിച്ചെങ്കിലും എഫ്.ബി.ഐ. ഇതേക്കുറിച്ച് അന്വേഷണം ആരംഭിച്ചിരുന്നു. റോബര്‍ട്ട് മ്യൂളറുടെ നേതൃത്വത്തിലുള്ള സ്വതന്ത്ര സംഘമാണ് ഇതേക്കുറിച്ച് അന്വേഷിക്കുന്നത്. സംഭവം പുറത്തുപറയാതിരിക്കുന്നതിന് സ്‌റ്റോമിക്ക് 1,30,000 ഡോളര്‍ ട്രംപ് കൈമാറിയെന്നാണ് ആരോപണം.

മ്യൂളറുടെ വാറണ്ടിന്റെ അടിസ്ഥാനത്തിലാണ് എഫ്.ബി.ഐ. സംഘം കോഹന്റ് ഓഫീസ് റെയ്ഡ് നടത്തിയതെന്ന് ന്യുയോര്‍ക്ക് ടൈംസ് റിപ്പോര്‍ട്് ചെയ്യുന്നു. സ്‌റ്റോമിയെ സംബന്ധിച്ച് കോഹനും ട്രംപുമായി നടത്തിയ ആശയവിനിമയത്തിന്റെ നിര്‍ണായക രേഖകള്‍ പിടിച്ചെടുത്തതായായാണ് സൂചന. ഫോണ്‍, പേഴ്‌സണ്‍ കംപ്യൂട്ടര്‍, ബാങ്ക് രേഖകള്‍ തുടങ്ങിയവ പിടിച്ചെടുത്തവയില്‍പ്പെടുന്നു. ബാങ്ക് തട്ടിപ്പും തിരഞ്ഞെടുപ്പ് പ്രചാരണവേളയിലെ നിയമലംഘനങ്ങളും എഫ്.ബി.ഐ. പ്രത്യേകം അന്വേഷിക്കുന്നുണ്ട്.

സിറിയയില്‍ വിമതര്‍ക്ക് ആധിപത്യമുള്ള മേഖലയില്‍ നടന്ന രാസായുധ പ്രയോഗത്തെ എങ്ങനെ നേരിടണമെന്നാലോചിക്കാന്‍ ട്രംപിന്റെ നേതൃത്വത്തില്‍ ചേര്‍ന്ന മന്ത്രിസഭാ യോഗത്തിലാണ് പ്രസിഡന്റ് തന്റെ അറ്റോണിയുടെ ഓഫീസില്‍ റെയ്ഡ് നടന്ന വിവരം വെളിപ്പെടുത്തിയത്. ഇതൊരു നാണക്കേടാണെന്നും രാജ്യത്തിന് നേര്‍ക്ക് നടന്ന ആക്രമണത്തിന് സമാനമാണെന്നും അദ്ദേഹം പറഞ്ഞു. മാന്‍ഹട്ടനിലെ കോഹന്റെ ഓഫീസിലേക്ക് ഇരച്ചുകയറിയ എഫ്.ബി.ഐ., രേഖകളും മറ്റും പിടിച്ചെടുക്കുകയായിരുന്നു.