സിറിയയില്‍ നടത്തിയ ആക്രമണത്തെ അപലപിച്ച റഷ്യന്‍ പ്രസിഡന്റ് വ്‌ളാഡിമിര്‍ പുടിന്‍ യുഎന്‍ രക്ഷാസമിതിയുടെ അടിയന്തര യോഗം ഉടന്‍ ചേരണമെന്നാണ് ആവശ്യപ്പെട്ടത്. ആക്രമണത്തിലൂടെ യുഎസ് ചെയ്തത് സിറിയയിലെ സാധാരണക്കാരുടെ ജീവിതം ദുരന്തപൂര്‍ണമാക്കുന്നതരത്തിലുള്ള ഹീനമായ പ്രവര്‍ത്തിയാണ്. സാധാരണക്കാര്‍ക്കാണ് ഇതിന്റെ മുഴുവന്‍ തിരിച്ചടിയും നേരിട്ടേണ്ടിവന്നത്. രാജ്യാന്തര ബന്ധങ്ങളെ തകിടം മറിക്കുന്ന നീക്കമാണ് വ്യോമാക്രമണത്തിലൂടെ യുഎസ് നടത്തിയതെന്നും പുടിന്‍ വ്യക്തമാക്കി. സിറിയന്‍ പ്രസിഡന്റ് ബാഷര്‍ അല്‍ അസദിനു കീഴിലുള്ള സൈന്യത്തിനു റഷ്യയും ഇറാനുമാണ് നിലവില്‍ പിന്തുണ പ്രഖ്യാപിച്ചിരിക്കുന്നത്.

അതിനിടെ യുഎസ്, ബ്രിട്ടന്‍, ഫ്രാന്‍സ് സഖ്യസേനയുടെ ആക്രമണത്തിലും 'പാഠം' പഠിച്ചില്ലെന്നു വ്യക്തമാക്കുന്നതായിരുന്നു റഷ്യയുടെ മറ്റൊരു നീക്കം. സിറിയയ്ക്കും ആവശ്യക്കാരായ മറ്റു രാജ്യങ്ങള്‍ക്കും എസ് 300 മിസൈല്‍ പ്രതിരോധ സംവിധാനം നല്‍കാനാണു തീരുമാനമെന്നു റഷ്യ വ്യക്തമാക്കി. കേണല്‍ ജനറല്‍ സെര്‍ഗെയ് റുഡ്‌സ്‌കോയ് ആണ് ഇക്കാര്യം പുറത്തുവിട്ടത്. സിറിയന്‍ വ്യോമാക്രമണത്തെത്തുടര്‍ന്നു ലോകം രണ്ടു ചേരിയിലായതാണ് റഷ്യയെ പുതിയ നീക്കത്തിനായി പ്രേരിപ്പിച്ചത്.

മിസൈല്‍ പ്രതിരോധ സംവിധാനം വില്‍ക്കാനൊരുങ്ങുന്നുവെന്ന റഷ്യയുടെ പ്രഖ്യാപനത്തിനു പിന്നാലെ പരോക്ഷ 'വെല്ലുവിളി' ഉയര്‍ത്തി ഫ്രാന്‍സും രംഗത്തെത്തിയിട്ടുണ്ട്. മുന്നറിയിപ്പിന്റെ 'ചുവപ്പുവര' വീണ്ടും മറികടക്കാനാണു സിറിയയുടെ ശ്രമമെങ്കില്‍ ഒരുതവണ കൂടി ഇടപെടല്‍ ഉണ്ടാകുമെന്നാണു ഫ്രഞ്ച് വിദേശകാര്യ മന്ത്രി ഴാങ് യെ ലേ ഡ്രിയാന്‍ വ്യക്തമാക്കിയത്. മേയ് അവസാനം ഫ്രഞ്ച് പ്രസിഡന്റ് ഇമ്മാനുവല്‍ മാക്രോ റഷ്യയിലേക്കു നടത്താനിരിക്കുന്ന സന്ദര്‍ശനത്തിനു മാറ്റമില്ലെന്നും ഡ്രിയാന്‍ അറിയിച്ചു. ആക്രമണത്തിനു മുന്നോടിയായി റഷ്യയെ വിവരം അറിയിച്ചിരുന്നതായി അതിനിടെ ഫ്രഞ്ച് പ്രതിരോധമന്ത്രിയും വ്യക്തമാക്കി.

റഷ്യയും ഇറാനും സിറിയയും ലബനനിലെ ഹിസ്ബുള്ള വിഭാഗവും ഒരുപക്ഷത്തു നില്‍ക്കുമ്പോള്‍ യുഎസ്, ഫ്രാന്‍സ്, ബ്രിട്ടന്‍, തുര്‍ക്കി, ജര്‍മനി, ഇസ്രയേല്‍ തുടങ്ങിയ രാജ്യങ്ങളാണു മറുപക്ഷത്ത്. ഈ രാജ്യങ്ങളെല്ലാം സിറിയന്‍ ആക്രമണത്തില്‍ പരസ്യമായി തങ്ങളുടെ നിലപാട് വ്യക്തമാക്കിയതുമാണ്. രാസായുധങ്ങള്‍ ഒഴിവാക്കണമെന്നു യൂറോപ്യന്‍ യൂണിയനും സിറിയയോട് ആവശ്യപ്പെട്ടു കഴിഞ്ഞു. 

അതേസമയം, യുഎസ് ആക്രമണം മേഖലയിലെ നിലവിലെ അവസ്ഥയെ അസ്ഥിരപ്പെടുത്താനേ ഉപകരിക്കുകയുള്ളൂവെന്നും സെര്‍ഗെയ് വ്യക്തമാക്കി. സിറിയന്‍ തലസ്ഥാനമായ ദമാസ്‌കസിലും മറ്റു നഗരങ്ങളിലും നിലവില്‍ സ്ഥിതി ശാന്തമാണെന്നും അദ്ദേഹം അറിയിച്ചു.

അതുപോലെതന്നെ എസ്-300 മിസൈല്‍ പ്രതിരോധ സംവിധാനം വ്യാപിപ്പിക്കാനുള്ള റഷ്യയുടെ നീക്കവും ഐക്യരാഷ്ട്ര സഭയ്ക്കു പുതിയ തലവേദനയാണ്. രാജ്യാന്തര തലത്തില്‍ ആയുധവ്യാപനം കുറയ്ക്കാനുള്ള ശ്രമങ്ങള്‍ യുഎന്‍ ശക്തമാക്കിയ സാഹചര്യത്തില്‍ പ്രത്യേകിച്ച്. റഷ്യ തനതായി വികസിപ്പിച്ചെടുത്തതാണ് ഈ മിസൈല്‍ പ്രതിരോധ സംവിധാനം. ആകാശത്തു വച്ചു മിസൈലുകളെയും യുദ്ധവിമാനങ്ങളെയും മറ്റും തകര്‍ക്കുന്നതില്‍ ഇന്നു ലോകത്ത് നിലവിലുള്ളതില്‍ ഏറ്റവും കരുത്ത മിസൈല്‍വേധ വിന്യാസത്തിലൊന്നാണ് എസ്-300. ഭൗമോപരിതലത്തില്‍ നിന്ന് ആകാശത്തേക്കു മിസൈലുകള്‍ തൊടുക്കാവുന്ന ഈ സംവിധാനം എന്‍പിഒ അല്‍മാസ് എന്ന റഷ്യന്‍ കമ്പനിയാണു നിര്‍മിക്കുന്നത്.