അന്താരാഷ്ട്ര രാസായുധ നിരോധന അന്വേഷണ സംഘത്തെ ഇന്ന് സിറിയന്‍ നഗരമായ ദൂമയിലേക്ക് പ്രവേശിപ്പിക്കുമെന്ന് റഷ്യ അറിയിച്ചു. ദൂമയില്‍ ബശ്ശാര്‍ സൈന്യം വിമതര്‍ക്കെതിരെ രാസായുധം പ്രയോഗിച്ചുവെന്ന റിപ്പോര്‍ട്ടുകളെ തുടര്‍ന്നാണ് സംഘം അന്വേഷണത്തിനായി വരുന്നത്.

അതേസമയം, ഇവരെ ദൂമയിലേക്ക് സിറിയയും റഷ്യയും കടത്തിവിടുന്നില്ലെന്ന് ആരോപണമുയര്‍ന്നിരുന്നു. അതിനിടെ വിമതരുടെ മേഖലയില്‍ രാസായുധപ്രയോഗം നടത്തിയെന്ന രീതിയില്‍ പ്രചരിക്കുന്ന ചിത്രങ്ങള്‍ വ്യാജമാണെന്ന് റഷ്യ വ്യക്തമാക്കി. ആക്രമണത്തില്‍ നിരവധി പേര്‍ കൊല്ലപ്പെട്ടിരുന്നു. റോഡുകളില്‍നിന്നെടുത്ത ബോംബുകളുടെയും മറ്റും അവശിഷ്ടങ്ങള്‍ യു.എന്‍ സുരക്ഷ വിഭാഗത്തിലെ ഉന്നതതലസംഘം പരിശോധിക്കുമെന്ന് റഷ്യന്‍ അധികൃതര്‍ പറഞ്ഞു.

സിറിയയിലെ രണ്ട് വ്യോമതാവളങ്ങളെ ലക്ഷ്യംവെച്ച രണ്ട് മിസൈലുകള്‍ പ്രതിരോധ സേന വെടിവെച്ചിട്ടു. ഡമസ്‌കസിലെയും ഹിംസ് പ്രവിശ്യയിലെ ശയ്‌റാത് വ്യോമതാവളത്തിലുമെത്തിയ രണ്ട് മിസൈലുകളാണ് തകര്‍ത്തത്. യു.എസ് സഖ്യരാജ്യങ്ങളുടെ വ്യോമാക്രമണം നടന്നതിനു പിന്നാലെയാണ് മിസൈലുകള്‍ തൊടുത്തതെന്ന് സംശയിക്കുന്നു.

ആക്രമണം തങ്ങളുടെ പരമാധികാരത്തിനെതിരായ കടന്നുകയറ്റമാണെന്ന് സിറിയന്‍ സര്‍ക്കാര്‍ പ്രതികരിച്ചു. ആക്രമണത്തെ കുറിച്ചുള്ള കൂടുതല്‍ വിവരങ്ങള്‍ പുറത്തുവിട്ടിട്ടില്ല. മിസൈല്‍ ആക്രമണം നടത്തിയിട്ടില്ലെന്ന് യു.എസ് വ്യക്തമാക്കി. പ്രതികരിക്കാനില്ലെന്ന് ഇസ്രായേലും അറിയിച്ചു.