ബ്രിട്ടനിൽ പങ്കാളികളെ കണ്ടെത്തി മനഃപൂര്‍വം​ എയ്​ഡ്​സ്​ രോഗം പരത്തിയ യുവാവിന്​ ജീവപര്യന്തം ശിക്ഷ വിധിച്ചതായി റിപ്പോർട്ടുകൾ. ഇത്തരത്തിലൊരു കുറ്റത്തിന് ഒരാളെ ആദ്യമായാണ്​ ബ്രിട്ടനില്‍ ശിക്ഷിക്കുന്നത്.

ഡാറില്‍ റൗ എന്ന ബ്രിട്ടീഷ് പൗരനാണ് അഞ്ചു പേര്‍ക്ക്​ രോഗം പരത്തിയതിന്​ ശിക്ഷിക്കപ്പെട്ടത്​. രോഗം പടർത്തിക്കഴിഞ്ഞും ഇൗ രോഗം മാരകമല്ലെന്നാണ്​ ഡാറിലി​​​ന്റെ വാദം. അതേസമയം ഡാറിലിനെ ശിക്ഷിക്കുന്നത്​ എയ്​ഡ്​സ്​ രോഗികളെ അപമാനിക്കുന്നതിന്​ തുല്യമാണെന്ന്​​​ ഡാറിലി​​ന്റെ അഭിഭാഷകനും വാദിച്ചു.

എന്നാല്‍ ഡാറില്‍ രോഗം സംക്രമിപ്പിച്ചവരുടെ വാദം കൂടി കേട്ട ശേഷമാണ്​ കോടതി ഇയാളെ ജീവപര്യന്തം ശിക്ഷക്ക്​ വിധിച്ചത്​. 2015 ലാണ്​ ഡാറിലിന്​ രോഗമുണ്ടെന്നു​ സ്ഥിതീകരിച്ചത്​. എന്നിട്ടും ചികിത്​സ​ തേടാനോ ഡോക്​ടര്‍മാരുടെ നിര്‍​ദേശപ്രകാരം ജീവിക്കാനോ ഡാറില്‍ തയാറായില്ല. പകരം മൊബൈല്‍ ആപ്പ്​ വഴി പരിചയപ്പെട്ടവരുമായി ലൈംഗിക ബന്ധത്തിലേര്‍പ്പെട്ട്​ രോഗം വ്യാപിപ്പിക്കാനാണ്​ തുനിഞ്ഞത്​. സുരക്ഷാ മുന്‍കരുതലെടുക്കാതെയായിരുന്നു ഇയാള്‍ ലൈംഗിക ബന്ധം പുലര്‍ത്തിയിരുന്നത്​. മുന്‍കരുതലെടുക്കാന്‍ നിര്‍ബന്ധിക്കുന്നവ​രെ കോണ്ടത്തി​​ന്റെ അറ്റത്ത്​ ദ്വാരമിട്ടും വഞ്ചിച്ചു.

ലൈംഗിക ബന്ധം പുലര്‍ത്തിയ ശേഷം അടുത്ത ദിവസം ഇവര്‍ക്ക്​ ഇതേകുറിച്ച്‌​ സന്ദേശമയക്കാനും ഡാറില്‍ മറന്നില്ല. "നിങ്ങള്‍ക്ക്​ പനിക്കാം... എനിക്ക്​ എച്ച്‌​.ഐ.വിയുണ്ട്​" എന്നും "ഞാന്‍ കോണ്ടം കീറി, നിങ്ങളെയും പിടികൂടി" എന്നും സന്ദേശങ്ങള്‍ അയച്ചിട്ടുണ്ട്​. ആറാഴ്​ച നീണ്ട വിചാരണയില്‍ മുഴുവനും ഡാറില്‍ നിര്‍വികാരനായിരുന്നു. ജീവപര്യന്തം വിധിച്ചപ്പോഴും പ്രത്യേകിച്ച്‌​ വികാരങ്ങളൊന്നും ഡാറില്‍ പ്രകടിപ്പിച്ചില്ല.