കഴിഞ്ഞ വര്‍ഷം മെയ് 30-ന്, ഇംഗ്ലീഷ്  ഗായകനായ ജോണ്‍ ലെനന്റെ ലിവര്‍പൂളിലുള്ള പഴയവീട്ടില്‍ വച്ച്, സ്വന്തം ഭാര്യയെയും മക്കളെയും കൊലപ്പെടുത്തിയ ലിവര്‍പൂളിലെ ഏഷ്യക്കാരനായ സമി സാലെം എന്ന 30-കാരന് ലിവര്‍പൂള്‍ ക്രൗണ്‍ കോടതി ചുരുങ്ങിയത് 31 വര്‍ഷത്തെ തടവ് ശിക്ഷ വിധിച്ചു. തന്റെ ഭാര്യയായ അരീന സയിദിനെ(30) ശ്വാസം മുട്ടിച്ച് കൊന്ന സമി, മക്കളായ ഷാദിയ(7), റാമി(4) എന്നിവരെ ബാത്ത് ടബില്‍ മുക്കിപ്പിടിച്ചാണ് വകവരുത്തിയതെന്ന് വിചാരണക്കിടെ ബോധിപ്പിക്കപ്പെട്ടിരുന്നു. എന്നിട്ടും കലി തീരാതിരുന്ന ഈ യുവാവ് സ്വന്തം വീടിന് തീയിടുകയും ചെയ്തിരുന്നു.

ഈ കൊടും ക്രൂരന്‍ ചെയ്ത് കൂട്ടിയ പാതകങ്ങളുടെ ഗൗരവം കണക്കിലെടുത്താണ് കോടതി ദീര്‍ഘകാലത്തേക്ക് തടവ് ശിക്ഷ വിധിച്ചിരിക്കുന്നത്. കൊലപാതകങ്ങള്‍ നിര്‍വഹിച്ച ശേഷം സമി യാതൊരു കൂസലുമില്ലാതെ ടിവി കണ്ട് ഡിന്നര്‍ കഴിച്ചിരുന്നുവെന്നും റിപ്പോര്‍ട്ടുണ്ട്.തുടക്കത്തില്‍ താന്‍ കുറ്റമൊന്നും ചെയ്തിട്ടില്ലെന്ന് ഇയാള്‍ തറപ്പിച്ച് പറഞ്ഞിരുന്നുവെങ്കിലും കഴിഞ്ഞ ദിവസം നടന്ന വിചാരണയില്‍ ഇയാള്‍ കുറ്റക്കാരനാണെന്ന് നിസംശയം തെളിയുകയായിരുന്നു.ഇന്നലെയാണ് സമിക്ക് തടവ് ശിക്ഷയേകാനുള്ള നിര്‍ണായക വിധിയുണ്ടായത്.

കൊലപാതകങ്ങള്‍ നിര്‍വഹിച്ച ശേഷം ഇയാള്‍ അധികം വൈകാതെ തങ്ങളുടെ ഫ്‌ലാറ്റിന് പെട്രോള്‍ ഒഴിച്ച് തീകൊടുക്കുകയും ചെയ്തിരുന്നു. ഫ്‌ലാറ്റിന് തീ ആളിപ്പടര്‍ന്നതിനെ തുടര്‍ന്ന് സമീപത്തെ ഫ്‌ലാറ്റുകളിലുള്ളവരെ അടിയന്തിരമായി ഒഴിപ്പിച്ചിരുന്നു.കുടുംബക്കാര്‍ സമിയുടെ ഫ്‌ലാറ്റ് തുറന്ന് നോക്കിയപ്പോള്‍ മൂന്ന് മൃതദേഹങ്ങളും ബെഡില്‍ കിടക്കുന്ന നിലയിലായിരുന്നു. അതിനടുത്ത് ലഹരിയടിച്ച് അബോധാവസ്ഥയില്‍ കിടക്കുന്ന സമിയെയും കണ്ടെത്തിയിരുന്നു.

സമി അഷ്‌വര്‍ത്തിലെ സൈക്യാട്രിക് ഹോസ്പിറ്റലില്‍ നാല് ജീവനക്കാരുടെ അകമ്പടിയിലാണ് ഇപ്പോള്‍ കഴിയുന്നതെന്ന് വിചാരണക്കിടെ ബോധിപ്പിക്കപ്പെട്ടിരുന്നു.കടുത്ത മാനസികപ്രശ്‌നങ്ങളാണ് കൊലപാതകത്തിലേക്ക് നയിച്ചിരിക്കുന്നതെന്നും കോടതിക്ക് മുന്നില്‍ ബോധിപ്പിക്കപ്പെട്ടു. 2009-ല്‍ യെമനില്‍ വച്ച് വിവാഹം ചെയ്ത ഭാര്യയോട് കടുത്ത പൊസസിവ്‌നെസായിരുന്നു സമിക്കുണ്ടായിരുന്നതെന്ന് ജസ്റ്റിസ് ഹോല്‍ഗേറ്റ് പറയുന്നു.

ഭാര്യ ഇന്റര്‍നെറ്റും മൊബൈലും ഉപയോഗിക്കുന്നതിന് സമി കടുത്ത നിയന്ത്രണമേര്‍പ്പെടുത്തുകയും ചെയ്തിരുന്നു.കഴിഞ്ഞ വര്‍ഷം മെയില്‍ ഭാര്യയില്‍ നിന്നും വിവാഹമോചനവും സമി ആവശ്യപ്പെട്ടിരുന്നുവെന്ന് റിപ്പോര്‍ട്ടുണ്ട്. കൊലപാതകം നടക്കുമ്പോള്‍ സമിക്ക് സ്‌കിസോഫ്രീനിയ എന്ന മാനസികരോഗം ഉണ്ടായിരുന്നുവെന്നാണ് താന്‍ കരുതുന്നതെന്നാണ് ഫോറന്‍സിക് സൈക്യാട്രിസ്റ്റായ ഡോ. മുഹമ്മദ് റഹ്മാന്‍ ലിവര്‍പൂള്‍ക്രൗണ്‍ കോടതിക്ക് മുന്നില്‍ ബോധിപ്പിച്ചിരിക്കുന്നത്.