ഡോക്​ടര്‍മാരെ അകറ്റാന്‍ ഒരു ദിവസം ഒരാപ്പിള്‍ ആകാമെന്നത് പഴയ കഥ. ഒരാപ്പിള്‍ കൈവശം സൂക്ഷിച്ചതിന്​ 500 ഡോളര്‍ പിഴ നല്‍കേണ്ടി വന്നിരിക്കയാണ്​ കൊളറാഡോയിലെ ക്രിസ്​റ്റല്‍ ടാഡ്​ലോക്ക് എന്ന യുവതിക്ക്.

ബുധനാഴ്​ച പാരീസില്‍ നിന്ന്​ ഡെല്‍റ്റ വിമാനത്തില്‍ യു.എസിലെ ഡെന്‍വറിലേക്ക്​ യാത്ര തിരിച്ചതായിരുന്നു​ ക്രിസ്​റ്റല്‍. യാത്രക്കിടെ വിമാനത്തില്‍ നിന്ന്​ ലഭിച്ച ആപ്പിള്‍ പിന്നീട്​ കഴിക്കാമെന്ന്​ കരുതി പൊതിഞ്ഞ്​ കൈയില്‍ സൂക്ഷിച്ചു. വിമാനമിറങ്ങിയപ്പോള്‍ നടത്തിയ പരിശോധനയില്‍ കസ്​റ്റംസ്​ ഉദ്യോഗസ്​ഥര്‍ ആപ്പിള്‍ പിടികൂടുകയായിരുന്നു.

ഒരുപാട്​ ചെലവ്​ വരുന്ന യാത്രയാണോ ഇതെന്ന് കസ്​റ്റംസ്​ ഏജന്‍റ്​ തന്റെ അടുത്തെത്തി അന്വേഷിപ്പോള്‍​ തനിക്ക്​ കാര്യം പിടികിട്ടിയില്ലെന്ന്​ ക്രിസ്​റ്റല്‍ പറയുന്നു. അതെ എന്ന്​ മറുപടി നല്‍കി. എന്നാല്‍ ചെലവ്​ വീണ്ടും കൂട്ടാന്‍ 500 ഡോളര്‍ പിഴകൂടി ചുമത്തുന്നുവെന്ന് ഏജന്‍റ്​ അറിയിച്ചു. പിന്നീടാണ്​ വിമാനത്തില്‍ ആപ്പിള്‍ കൊണ്ടുവരാന്‍ പാടില്ല എന്നറിഞ്ഞത്​. 500 ഡോളര്‍ പിഴയടച്ച ശേഷം മാത്രമേ വിട്ടയക്കൂവെന്ന്​ കസ്​റ്റംസ്​ നിര്‍ബന്ധം പിടിച്ചുവെന്ന്​​ ​ക്രിസ്​റ്റല്‍ അറിയച്ചു. ഒരു പഴത്തി​ന്റെ പേരില്‍, അത്​ വിമാനത്തില്‍ നിന്നു തന്നെ ലഭിച്ചതായിട്ടും യാത്രക്കാരോട്​ കുറ്റവാളികളോടെന്നപോലെ പെരുമാറുന്നത്​ നിര്‍ഭാഗ്യകരമാണെന്ന്​ ​ക്രിസ്​റ്റല്‍ ടാഡ്​ലോക്ക്​ പറഞ്ഞു.

എന്നാല്‍ വിമാനത്തില്‍ ഭക്ഷണപദാര്‍ഥങ്ങള്‍ വിതരണം ചെയ്യുന്നത്​ യാത്രക്കിടെ തന്നെ കഴിക്കുമെന്ന്​ കരുതിയാണെന്ന്​ വിമാന അധികൃതര്‍ അറിയിച്ചു. കസ്​റ്റംസ്​-അതിര്‍ത്തി സുരക്ഷാ നയങ്ങളും നിര്‍ദേശങ്ങളും കൃത്യമായി പാലിക്കാന്‍ യാത്രക്കാരോട്​ ആവശ്യപ്പെടു​മെന്നും ഡെല്‍റ്റ എയര്‍ലൈന്‍സ്​ വാര്‍ത്താകുറിപ്പില്‍ അറിയിച്ചു. കാര്‍ഷിക ഉത്​പന്നങ്ങള്‍ ഒരു രാജ്യത്തു നിന്ന്​​ മറ്റൊരു രാജ്യത്തേക്ക്​ കൊണ്ടുവരുന്നത്​ നിരോധിച്ചതാണെന്ന്​ കസ്​റ്റംസ്​ ഏജന്‍റ്​ അറിയിച്ചു.