ഗുരുഗ്രാമില്‍ രണ്ടാം ക്ലാസുകാരനെ സ്‌കൂളിലെ ബാത്‌റൂമില്‍ കഴുത്തറുത്ത് കൊന്ന കേസില്‍ പ്രതിയായ 16 കാരനെ മുതിര്‍ന്നയാളായി കണക്കാക്കി വിചാരണചെയ്യാമെന്ന് കോടതി. കുട്ടികള്‍ക്കായുള്ള പ്രത്യേക കോടതിയുടെതാണ് വിധി. കഴിഞ്ഞ വര്‍ഷം ഡിസംബര്‍ 20ന് ജുവനൈല്‍ ജസ്റ്റിസ് ബോര്‍ഡ് പുറപ്പെടുവിച്ച വിധി പ്രത്യേക കോടതി അംഗീകരിക്കുകയായിരുന്നു. ജുവനൈല്‍ ജസ്റ്റിസ് ബോര്‍ഡിന്റെ വിധിയെ ചോദ്യം ചെയ്ത് നല്‍കിയ അപ്പീല്‍ കോടതി തള്ളി.

പ്രതിയെ കസ്റ്റഡിയിലെടുക്കാന്‍ സി.ബി.ഐയെ അനുവദിച്ച നടപടിയെ ചോദ്യം ചെയ്ത് നല്‍കിയ രണ്ട് ഹര്‍ജികളും കോടതി തള്ളി. ജുവനൈല്‍ ബോര്‍ഡിന്റെ വിധി നിയമ വ്യവസ്ഥക്ക് ദോഷമാണെന്നും തന്റെ ഭാഗം അവതരിപ്പിക്കാന്‍ പ്രതിക്ക് വേണ്ടത്ര അവസരം നല്‍കാതെയാണ് ബോര്‍ഡ് വിധി പുറപ്പെടുവിച്ചതെന്നും പ്രതിക്ക് വേണ്ടി ഹാജരായ അഭിഭാഷകന്‍ കോടതിയെ അറിയിച്ചു.

എന്നാല്‍ പ്രതി ചെയ്തത് ഹീനമായ കുറ്റകൃത്യമാണെന്ന് ചൂണ്ടിക്കാട്ടിയാണ് പ്രത്യേക കോടതി ജുവനൈല്‍ ബോര്‍ഡിന്റെ വിധി ശരിവെച്ചത്. കുട്ടി കുറ്റകൃത്യത്തിന്റെ അനന്തരഫലങ്ങള്‍ മനസിലാക്കാന്‍ മാത്രം പക്വതയുള്ളവനാണെന്നും ശിക്ഷയില്‍ നിന്ന് രക്ഷനേടുന്നതിനുള്ള വഴികള്‍ സ്വീകരിക്കാന്‍ ബുദ്ധികാണിച്ചുവെന്ന് സാഹചര്യങ്ങളില്‍ നിന്ന് വ്യക്തമാണെന്നും കോടതി നിരീക്ഷിച്ചു.

വിധിക്കെതിരെ ഹൈകോടതിയില്‍ അപ്പീല്‍ നല്‍കുമെന്ന് പ്രതിയുടെ പിതാവ് പറഞ്ഞു. തന്റെ മകന്‍ നിരപരാധിയാണ്. അത് തെളിയിക്കാന്‍ ഏതറ്റംവരെയും പോകുമെന്നും അദ്ദേഹം പറഞ്ഞു. കഴിഞ്ഞ വര്‍ഷം സെപ്തംബര്‍ എട്ടിനായിരുന്നു രാജ്യത്തെ നടുക്കിയ സംഭവം. സ്‌കൂളില്‍ പരീക്ഷയും പി.ടി.എ യോഗവും മാറ്റിവെക്കുന്നതിനാണ് 11ാം ക്ലാസുകാരന്‍ അതേ സ്‌കൂളിലെ രണ്ടാം ക്ലാസ് വിദ്യാര്‍ഥിയുടെ കഴുത്തറുത്ത് കൊന്നത് എന്നാണ് സി.ബി.ഐയുടെ വാദം. സ്‌കൂളിലെ ബാത്‌റൂമില്‍ വെച്ചായിരുന്നു സംഭവം.

ലോക്കല്‍ പൊലീസ് അന്വേഷിച്ചപ്പോള്‍ സ്‌കൂള്‍ ബസ് െ്രെഡവറാണ് പ്രതിയെന്നും ലൈംഗികാതിക്രമം തടഞ്ഞതാണ് കൊലപാതകത്തിനിടയാക്കിയതെന്നുമായിരുന്നു പറഞ്ഞിരുന്നത്. പിന്നീട് കുട്ടിയുടെ രക്ഷിതാക്കള്‍ ആവശ്യപ്പെട്ടതു പ്രകാരം കേസ് സി.ബി.ഐക്ക് കൈമാറുകയായിരുന്നു. തുടര്‍ന്നാണ് പ്രതി 11ാം ക്ലാസുകാരനാണെന്നും സ്‌കൂളിന് അവധി കിട്ടുന്നതിനുവേണ്ടിയാണ് കുറ്റകൃത്യം നടത്തിയതെന്നും കണ്ടെത്തിയത്. സംഭവശേഷം വിരലടയാളം മായ്ക്കാനുള്ള വിദ്യവരെ കുട്ടി നേരത്തെ ഇന്റര്‍നെറ്റില്‍ തെരഞ്ഞിരുന്നതായി സി.ബി.ഐ ആരോപിച്ചിരുന്നു.