ശ്രീ പത്മനാഭസ്വാമി ക്ഷേത്രത്തിലെ ആറാട്ടുത്സവത്തിൻ്റെ കൊടിയേറ്റിനുള്ള കൊടിക്കയർ പൂജപ്പുര സെൻട്രൽ ജയിലിൽ നിന്ന് എത്തി. ക്ഷേത്രത്തിലെ പ്രധാന ഉത്സവങ്ങളായ അൽപ്പശി, പൈങ്കുനി മഹോത്സവങ്ങൾക്ക് കൊടിയേറുന്നതിനായി പ്രത്യേക വ്രതശുദ്ധിയോടെയാണ് ജയിൽ അന്തേവാസികൾ ഈ കൊടിക്കയർ നെയ്യുന്നത്.

ശുദ്ധമായ കോട്ടൺ നൂലുകൾ ഉപയോഗിച്ച് നിർമ്മിക്കുന്ന ഈ കയർ, നിർമ്മാണത്തിന് ശേഷം ജയിൽ അധികൃതർ ക്ഷേത്ര ഭാരവാഹികൾക്ക് ചടങ്ങുകളോടെയാണ് കൈമാറുകയാണ് പതിവ്. തുലാമാസ ഉത്സവമായ അൽപ്പശി ഉത്സവത്തിനായുള്ള കൊടിക്കയർ ജയിൽ സൂപ്രണ്ട് രാജേഷ് കുമാറിൽ നിന്ന് ക്ഷേത്രം എക്സിക്യൂട്ടീവ് ഓഫീസർ ബ്രിഗേഡിയർ ആനന്ദ് കുമാറും ക്ഷേത്രം മാനേജർ എൻ കെ അനില്‍ കുമാറും ചേർന്ന് ഏറ്റുവാങ്ങി.
ശുദ്ധിക്രിയകൾക്ക് ശേഷം കൊടിയേറ്റത്തിനുള്ള പൂജിച്ച കൊടിയും കൊടിക്കയറും വലിയ നമ്പിയും പഞ്ചഗവത്ത് നമ്പിയും ചേർന്ന് ക്ഷേത്രം തന്ത്രിക്ക് കൈമാറുകയും ചെയ്യും. ഞായറാഴ്ച രാവിലെ 8:45 നും 9:30 നും ഇടയ്ക്കുള്ള ശുഭമുഹൂർത്തത്തിൽ ക്ഷേത്രം തന്ത്രി ധ്വജാരോഹണം നടത്തുന്നതോടെ ഈ വർഷത്തെ അൽപശി ഉത്സവത്തിന് തുടക്കമാകുകയും ചെയ്യും. 20ന് ശംഖുമുഖം കടപ്പുറത്ത് നടക്കുന്ന ആറാട്ടോടെ 2026ലെ ഉത്സവം സമാപിക്കുന്നതാണ്.