ജി.ഡി.പി.ആര്‍ നിയമം; അമേരിക്കൻ മാധ്യമ വെബ്സൈറ്റുകളടക്കമുള്ള സൈറ്റുകൾ യൂറോപ്പിൽ നിശ്ചലം
ജി.ഡി.പി.ആര്‍ നിയമം പ്രാബല്യത്തില്‍ വന്നതോടെ ചില പ്രധാനപ്പെട്ട മാധ്യമ വെബ്‌സൈറ്റുകള്‍ യൂറോപ്പില്‍ കിട്ടാതായി. വെള്ളിയാഴ്ചയാണ് യൂറോപ്യന്‍ യൂണിയന്റെ ജനറല്‍ ഡാറ്റാ പ്രൊട്ടക്ഷന്‍ റെഗുലേഷന്‍ (ജി.ഡി.പി.ആര്‍) നിലവില്‍ വന്നത്.
ഉപഭോക്തൃ വിവരങ്ങള്‍ ശേഖരിക്കുന്നതിനും കൈകാര്യം ചെയ്യുന്നതിനും ഉപഭോക്താക്കളുടെ പൂര്‍ണസമ്മതം വേണമെന്ന് വ്യവസ്ഥ ചെയ്യുകയും അത് പാലിക്കാത്തവര്‍ക്ക് കനത്ത പിഴ യും നിര്‍ദ്ദേശിക്കുന്ന നിയമമാണ് ജിഡിപിആര്‍.
ജിഡിപിആര്‍ നിയമം നിലവില്‍ വരുന്നതിന് മുന്നോടിയായി നിരവധി സ്ഥാപനങ്ങള്‍ അവരുടെ സേവന വ്യവസ്ഥകളും നിബന്ധനകളും പരിഷ്‌കരിക്കുകയും പ്രവര്‍ത്തന രീതിയില്‍ മാറ്റം വരുത്തുകയും ചെയ്തിരുന്നു. യൂറോപ്യന്‍ യൂണിയനില്‍ സേവനം നല്‍കുന്ന ആഭ്യന്തര/ വിദേശ സ്ഥാപനങ്ങളെല്ലാം തന്നെ ജിഡിപിആര്‍ നിര്‍ദ്ദേശങ്ങള്‍ പാലിക്കണം. ഇത് പാലിക്കാത്ത അമേരിക്കന്‍ വെബ്‌സൈറ്റുകള്‍ക്കാണ് ഇപ്പോള്‍ യൂറോപ്പില്‍ വിലക്ക് വന്നിരിക്കുന്നത്.
ചിക്കാഗോയിലെ ട്രോങ്ക് (Tronc), അമേരിക്കയിലെ പ്രമുഖ പത്രങ്ങളായ എല്‍എ ടൈംസ്, ഷിക്കാഗോ ട്രിബ്യൂണ്‍, ന്യൂയോര്‍ക്ക് ഡെയ്‌ലി ന്യൂസ്, ബാള്‍ടിമോര്‍ സണ്‍ ഉള്‍പ്പടെയുള്ള വെബ്‌സൈറ്റുകളാണ് യൂറോപ്പില്‍ ഓഫ്‌ലൈനിലായത്. ഈ വെബ്‌സൈറ്റില്‍ കയറാന്‍ ശ്രമിക്കുമ്പോൾ ' യൂറോപ്യന്‍ രാജ്യങ്ങളില്‍ ഈ ഇത് ലഭ്യമല്ല' എന്ന അറിയിപ്പാണ് കാണാന്‍ സാധിക്കുക. വെബ്‌സൈറ്റ് ലഭ്യമല്ലാത്തതിന്റെ കാരണമെന്താണെന്ന് റീഡയറക്‌ട് പേജുകളില്‍ വ്യക്തമാക്കിയിട്ടില്ല.
സാങ്കേതിക പ്രശ്‌നം ശ്രദ്ധയില്‍ പെട്ടിട്ടുണ്ടെന്നും അത് പരിഹരിക്കാന്‍ ശ്രമിച്ചുവരികയാണെന്നുമാണ് ഇവയില്‍ ചില മാധ്യമങ്ങളുടെ അധികൃതരില്‍ നിന്നുള്ള പ്രതികരണം.
അതേസമയം ഈ മാധ്യമസ്ഥാപനങ്ങള്‍ക്ക് പുറമെ ജിഡിപിആര്‍ നിയമങ്ങള്‍ പാലിക്കാത്ത നിരവധി വെബ്‌സൈറ്റുകളും യുറോപ്യന്‍ രാജ്യങ്ങളില്‍ ഓഫ്‌ലൈന്‍ ആയിട്ടുണ്ട്. ഒഴിച്ചുകൂടാനാകാത്ത വിപണിയായതിനാല്‍ വിദേശ ഐടി സ്ഥാപനങ്ങളും ജിഡിപിആര്‍ വ്യവസ്ഥ പാലിക്കാനുള്ള ശ്രമത്തിലാണ്.
വ്യക്തി സ്വകാര്യതയ്ക്ക് വേണ്ടി വാദിക്കുന്നവര്‍ ഇന്ന് മാതൃകയായി കാണുന്ന നിയമ സംവിധാനമാണ് ജിഡിപിആര്‍. കര്‍ശന വ്യവസ്ഥകളോടെ ടെക്ക് കമ്പനികളുടെ ആധിപത്യത്തിന് കടിഞ്ഞാണിടാന്‍ ജിഡിപി ആറിന് സാധിക്കുമെന്നാണ് വിലയിരുത്തപ്പെടുന്നത്.
https://www.facebook.com/Malayalivartha
