പാര്ലമെന്റ് ചര്ച്ചയിലെത്താൻ ഒരു മിനുട്ട് വൈകി; ബ്രിട്ടനിലെ മന്ത്രി രാജി സമർപ്പിച്ചു
ലണ്ടൻ: പാര്ലമെന്റ് ചര്ച്ചയില് വൈകിയെത്തിയതിനെത്തുടർന്ന് ബ്രിട്ടീഷ് മന്ത്രി രാജി സമർപ്പിച്ചതായി റിപ്പോർട്ടുകൾ. ബ്രിട്ടന്റെ അന്താരാഷ്ട്ര വികസനകാര്യ മന്ത്രി ലോര്ഡ് മൈക്കിള് ബേറ്റ്സാണ് സഭയെ ഞെട്ടിച്ച് ഇത്തരത്തിലൊരു രാജി മുന്നോട്ട് വച്ചത്. ഒരു മിനിട്ട് മാത്രമാണു താമസിച്ചതെങ്കിലും സംഭവിച്ചത് വലിയ വീഴ്ചയാണെന്ന് അദ്ദേഹം സഭയിൽ പറയുകയായിരുന്നു.
പാർലമെന്റ് അംഗമെന്ന നിലയിലുള്ള അഞ്ചു വര്ഷത്തെ പ്രവര്ത്തനത്തിനിടെ ഇത്തരമൊരു വീഴ്ച ആദ്യമാണെന്ന് അദ്ദേഹം പറഞ്ഞു. ഉത്തരവാദിത്വം നിര്വഹിക്കുന്നതില് വലിയ വീഴ്ച ഉണ്ടായിരിക്കുന്നു. ചര്ച്ചയില് ഉത്തരം നല്കേണ്ട താന് സീറ്റില് ഇല്ലാതിരുന്നതു ലജ്ജാവഹമാണ്. അതിനാല് പ്രധാനമന്ത്രിക്ക് രാജി സമര്പ്പിക്കുന്നു. ഒപ്പം ക്ഷമയും ചോദിക്കുന്നുവെന്നു അദ്ദേഹം പറഞ്ഞു.
ഇദ്ദേഹത്തിന്റെ അപ്രതീക്ഷിത നടപടിയില് സഭാംഗങ്ങള് ഞെട്ടിപ്പോയി. സഭയിലുള്ളവർ ബേറ്റ്സിനെ പിന്തിരിപ്പിക്കാന് ശ്രമിച്ചു. എന്നാൽ ഏതാനും മണിക്കൂറുകള്ക്കുശേഷം ബേറ്റ്സിന്റെ രാജി അംഗീകരിക്കുന്നില്ലെന്ന് പ്രധാനമന്ത്രി തെരേസ മേയുടെ ഓഫീസ് അറിയിച്ചു. സത്യസന്ധനും കഠിനാധ്വാനിയുമായ ബേറ്റ്സിന്റെ നടപടി സ്വാഭാവികം മാത്രമാണെന്നും ഇവർ കൂട്ടിച്ചേര്ത്തു. അതേസമയം സോഷ്യല്മീഡിയയില് ബ്രിട്ടീഷ് മന്ത്രിയുടെ രാജി വലിയ ചര്ച്ചാവിഷയമായി.
https://www.facebook.com/Malayalivartha
