കഴിഞ്ഞ ജനുവരി രണ്ടിനായിരുന്നു കോട്ടയം പേരൂര്‍ പെരുമണ്ണിക്കാലായില്‍ അനൂപ് മാത്യുവിന്റെ ഭാര്യ ബെറ്റിനയെ കോട്ടയം കാരിത്താസ് ആശുപത്രിയില്‍ പ്രവേശിപ്പിച്ചത്. തലച്ചോറിനേറ്റ ക്ഷതം മൂലം അബോധാവസ്ഥയിലായ യുവതിയുടെ ശ്വാസോഛ്വാസംപോലും നിലച്ചമട്ടിലായിരുന്നു. അന്നവള്‍ മൂന്നു മാസം ഗര്‍ഭിണിയായിരുന്നു. അതിവേഗം വെന്റിലേറ്ററിലേക്ക്. പിന്നെ ഒന്നര മാസം അതിനുള്ളില്‍ കിടത്തി. പുറത്തെ വരാന്തയില്‍ ഭര്‍ത്താവ് അനൂപും മൂന്നു വയസുകാരനായ മൂത്ത കുട്ടിയും ഇരുവരുടെയും മാതാപിതാക്കളും കാത്തിരുന്നു. 

ഓരോ തവണയും പുറത്തേക്കെത്തുന്ന ഡോക്ടര്‍മാരോടും നഴ്‌സുമാരോടും അവര്‍ക്കൊന്നേ ചോദിക്കാനുണ്ടായിരുന്നുള്ളു. ബെറ്റിനയ്ക്ക് എന്തെങ്കിലും അനക്കമുണ്ടോ, കണ്ണൊന്നു ചിമ്മിയോ എന്നുള്ള പതിവു ചോദ്യങ്ങള്‍ മാത്രം. ഒന്നും സംഭവിച്ചില്ല. ആന്റിബയോട്ടിക്കുകളും കടുത്ത മരുന്നുകളും തുടര്‍ച്ചയായി കൊടുത്തുകൊണ്ടിരുന്നു. ദിവസം പതിനയ്യായിരം രൂപയുടെ മരുന്നുകള്‍വരെ നല്‌കേണ്ടിവന്നു. അയര്‍ക്കുന്നത്ത് കെഎസ്ഇബി ജീവനക്കാരനായ അനൂപ് സ്വര്‍ണം പണയം വച്ചും കടംവാങ്ങിയും ചികിത്സയ്ക്ക് ഒരു കുറവും വരാതെ നോക്കി. ബെറ്റിനയുടെ മാതാപിതാക്കളും ആവുന്നതെല്ലാം ചെയ്തു. കെഎസ്ഇബിയില്‍നിന്നും സഹായമുണ്ടായി. കാരിത്താസ് ആശുപത്രി ബില്ലില്‍ ആവുന്നത്ര ഇളവുചെയ്തു. 

യന്ത്രസഹായമില്ലാതെ ജീവന്‍ നിലനിര്‍ത്താമെന്നായപ്പോള്‍ ഒന്നര മാസംകഴിഞ്ഞ് ബെറ്റിനയെ വെന്റിലേറ്ററില്‍നിന്നും മാറ്റി. അപ്പോഴേക്കും ചലനമറ്റുകിടന്ന ബെറ്റിനയുടെ ഉദരത്തിലെ കുഞ്ഞുജീവന്റെചലനം പുറത്തറിഞ്ഞുതുടങ്ങി. അമ്മയെ രക്ഷിക്കാനുള്ള ശ്രമത്തിനിടെ ആന്റിബയോട്ടിക്കുകള്‍ ഉള്‍പ്പെടെ കടുത്ത മരുന്നുകള്‍ നല്കുന്നതിനാല്‍ സ്വാഭാവികമായും അബോര്‍ഷന്‍ സംഭവിക്കാന്‍ സാധ്യതയുണ്ടെന്നായിരുന്നു ഡോക്ടര്‍മാരുടെ അഭിപ്രായം. അമ്മയെ എങ്ങനെയെങ്കിലും രക്ഷിക്കണമെന്നായിരുന്നു വീട്ടുകാര്‍ക്ക്. അമ്മ അബോധാവസ്ഥയില്‍നിന്ന് എന്ന് ഉണരുമെന്നുപോലും ഉറപ്പില്ലാത്ത അവസ്ഥയില്‍ കുഞ്ഞിനെ അബോര്‍ഷന്‍ നടത്തി കളയുന്നതാണ് നല്ലതെന്നും അഭിപ്രായമുയര്‍ന്നു.

കാരിത്താസില്‍ അബോര്‍ഷന്‍ ചെയ്യില്ല. ബെറ്റിനയെ ആംബുലന്‍സില്‍ കോട്ടയം മെഡിക്കല്‍ കോളജിലെത്തിച്ചു. പരിശോധനയ്ക്കു ശേഷം ഡോക്ടര്‍മാരും പറഞ്ഞു. അബോര്‍ഷന്‍ തനിയെ സംഭവിക്കാനിടയുണ്ട്. അതിനു വേണ്ടി ഒന്നും ചെയ്യണ്ട. മാത്രമല്ല, ആ സ്ഥിതിയില്‍ അബോര്‍ഷന്‍ നടത്തിയാല്‍ അമ്മയുടെ ആരോഗ്യത്തിനും അപകടമാണ് തീരുമാനമായി. അബോര്‍ഷന്‍ വേണ്ട. നീട്ടിക്കിട്ടിയ ആയുസിന്റെ വിധികേട്ടു കണ്‍മണി അമ്മയുടെ ഉദരത്തോട് ഒന്നുകൂടി ചേര്‍ന്നുകിടന്നു. ആംബുലന്‍സ് വീണ്ടും കാരിത്താസിലേക്ക്. ഐസിയുവില്‍ കിടത്തിയ ബെറ്റിനയ്ക്കു ഗൈനക്കോളജിയിലെ ഡോ. റെജിയും എമര്‍ജന്‍സി കണ്‍സള്‍ട്ടന്റ് ഡോ. വിവേകും ഉള്‍പ്പെടെയുള്ള ഡോക്ടര്‍മാര്‍ കാവലായി നിന്നു. 

അബോര്‍ഷന്‍ തനിയെ നടക്കുമെന്ന കണക്കുകൂട്ടലുകള്‍ക്കുമീതെ സ്‌കാനിംഗ് റിസള്‍ട്ടുകള്‍ മാലാഖമാരെപ്പോലെ പാറിപ്പറന്നു. സ്വാഭാവിക അബോര്‍ഷന്‍ നടന്നില്ലെന്നു മാത്രമല്ല, ഉദരത്തിലെ കുഞ്ഞിനു കുഴപ്പമൊന്നുമില്ല. അത്രയും നാള്‍ ഏതുവിധേനയും അമ്മയെ രക്ഷിക്കാന്‍ ശ്രമിച്ചിരുന്ന ഡോക്ടര്‍മാര്‍ കുഞ്ഞിനെയും രക്ഷിക്കാനുള്ള ശ്രമത്തിലായി. കുഞ്ഞിനു ഹാനികരമാകുന്ന മരുന്നുകള്‍ നിര്‍ത്തലാക്കി. എങ്കിലും പിറക്കുന്ന കുഞ്ഞിനു ശാരീരികവും മാനസികവുമായ ന്യൂനതകള്‍ ഉണ്ടായിരിക്കുമെന്ന സാധ്യതകള്‍ നിലനിന്നു. ഐസിയുവിനു പുറത്തെ ചാരുബഞ്ചിലിരുന്ന് ബെറ്റിനയുടെ പ്രിയപ്പെട്ടവര്‍ പ്രാര്‍ഥിച്ചുകൊണ്ടിരുന്നു. 

അപ്പോഴും നിശ്ചലാവസ്ഥയിലായിരുന്ന ബെറ്റിനയെ സിസേറിയന്‍ ഓപ്പറേഷനു കയറ്റി. ഉത്കണ്ഠാകുലമായ നിമിഷങ്ങള്‍ക്കൊടുവില്‍ അവന്‍ പിറന്നു. എല്ലാ പരിശോധനകളിലും ജേതാവായി. ശാരീരികമോ മാനസികമോ ആയ യാതൊരു പ്രശ്‌നങ്ങളുമില്ല. പിന്നീടു നടന്നത് അതിശയങ്ങളുടെ വേലിയറ്റങ്ങളായിരുന്നു. അമ്മയുടെ അരികില്‍ കിടത്തിയ കുഞ്ഞിന്റെ കരച്ചില്‍ കേട്ട് ബെറ്റിന ആദ്യമായി കണ്‍പീലികള്‍ ചലിപ്പിച്ചു. കുഞ്ഞിനെ മാറിലേക്കു ചേര്‍ത്തപ്പോള്‍ കണ്ണുനീര്‍ വന്നു. കുഞ്ഞിനെ എടുക്കാനുള്ള ആഗ്രഹത്താല്‍ കൈകള്‍ നീട്ടി. അങ്ങനെ കൈകളും ചലിച്ചു. കുഞ്ഞിന്റെ നെറുകയില്‍ ചുംബിച്ചു. ഇതെല്ലാം കണ്ട് അദ്ഭുതപരതന്ത്രരായി ബെറ്റിനയെ ശുശ്രൂഷിച്ചവരെല്ലാം നില്‍പ്പുണ്ടായിരുന്നു.

അപ്പോള്‍ പൊട്ടിക്കരഞ്ഞവരില്‍ അനൂപുമുണ്ടായിരുന്നു. ഇന്നിപ്പോള്‍ അമ്മയും കുഞ്ഞും വാഴൂരിലുള്ള വീട്ടില്‍ സുഖമായിരിക്കുന്നു. എല്‍വിന്‍ എന്നു പേരിട്ട കുഞ്ഞ് ഇപ്പോള്‍ പൂര്‍ണ ആരോഗ്യത്തോടെ അമ്മയ്‌ക്കൊപ്പമുണ്ട്.ആശുപത്രി ജീവിതം അവസാനിപ്പിച്ച് ബെറ്റിനയുടെ ആരോഗ്യത്തിലും പുരോഗതിയുണ്ട്. വൈറ്റമിന്‍ ഗുളികകള്‍ മാത്രമാണ് ഇപ്പോള്‍ നല്‍കുന്നത്. ഒപ്പം ഫിസിയോതെറപ്പിയുമുണ്ട്. മാസങ്ങള്‍ക്കം പൂര്‍ണ ആരോഗ്യത്തിലേക്കു ബെറ്റിന തിരിച്ചെത്തുമെന്ന ഉറച്ച വിശ്വാസം ഡോക്ടര്‍മാര്‍ക്കുണ്ട്.