ജവഹര്‍ സ്‌കൂള്‍ തുറക്കുന്നത് കുട്ടിയുടെ അമ്മയുടെ പരാതിയെ തുടര്‍ന്ന് ഹൈക്കോടതി സ്‌റ്റേ ചെയ്തു
കുട്ടിയെ പട്ടിക്കൂട്ടിലടച്ചെന്ന പരാതിയെത്തുടര്‍ന്ന് അടച്ച് പൂട്ടിയ കുടപ്പനക്കുന്ന് ജവഹര്‍ ഇംഗ്ലീഷ് മീഡിയം സ്‌കൂള്‍ തുറന്ന സര്‍ക്കാര്‍ നടപടിക്ക് ഹൈക്കോടതി സ്‌റ്റേ ചെയ്തു. കുട്ടിയുടെ അമ്മ സിമി നല്‍കിയ പരാതിയിലാണ് ഹൈക്കോടതിയുടെ ഉത്തരവ്. സ്‌കൂളിന് അടിസ്ഥാന സൗകര്യങ്ങളില്ലെന്ന ഡിപിഐയുടെ നിര്‍ദേശം സര്‍ക്കാര്‍ അവഗണിച്ചുവെന്ന് കോടതി കുറ്റപ്പെടുത്തി. കുട്ടിയെ പട്ടിക്കൂട്ടിലടച്ചെന്ന ആരോപണത്തെത്തുടര്‍ന്ന് പരിശോധിക്കാനെത്തിയ ഡിപിഐ അടിസ്ഥാന സൗകര്യങ്ങളുടെ അഭാവത്തെത്തുടര്‍ന്ന് സ്‌കൂള്‍ അടച്ച് പൂട്ടണമെന്ന് ഉത്തരവിട്ടിട്ടും സര്‍ക്കാര്‍ നിസംഗത പാലിച്ചെന്ന് ഹൈക്കോടതി കുറ്റപ്പെടുത്തി. വിഷയത്തില്‍ ഏതെങ്കിലും തരത്തിലുള്ള സമ്മര്‍ദ്ദം സര്‍ക്കാരിന് ഉണ്ടായൊയെന്നും ഹൈക്കോടതി ആരാഞ്ഞു. ജസ്റ്റ് കെ ടി ശേഷാദ്രി നായിഡു അധ്യക്ഷനായ സിംഗിള്‍ ബഞ്ചാണ് സ്‌കൂള്‍ തുറന്ന് പ്രവര്‍ത്തിപ്പിച്ച സര്‍ക്കാര്‍ ഉത്തരവ് സ്‌റ്റേ ചെയ്തത്. സ്‌കൂളിന് ആവശ്യത്തിന് അടിസ്ഥാന സൗകര്യങ്ങള്‍ ഉണ്ടൊയെന്ന് പരിശോധിക്കാന്‍ ഹൈക്കോടതി സര്‍ക്കാരിന് നിര്‍ദേശം നല്‍കി.
കഴിഞ്ഞ മാസം മുപ്പതിനാണ് ഡിപിഐയുടെ നിര്‍ദേശത്തെത്തുടര്‍ന്ന് സ്‌കൂള്‍ അടച്ച് പൂട്ടിയത്.പിന്നീട് സ്‌കൂള്‍ മാനേജ്‌മെന്റ് വിദ്യാഭ്യാസ വകുപ്പിന് നല്‍കിയ അപ്പീലിനെത്തുടര്‍ന്ന് കഴിഞ്ഞ വ്യാഴാഴ്ച പൊതുവിദ്യാഭ്യാസ സെക്രട്ടറിയാണ് സ്‌കൂള്‍ തുറക്കാന്‍ ഉത്തരവിട്ടത്.കോടതി ഉത്തരവിന്റെ പകര്‍പ്പ് കിട്ടിയതിന് ശേഷം തുടര്‍നടപടികളെക്കുറിച്ച് ആലോചിക്കുമെന്ന് ജവഹര്‍ ഇംഗ്ലീഷ് മീഡിയം സ്‌കൂള്‍ പ്രിന്‍സിപ്പാള്‍ ശശികല പറഞ്ഞു. ഇപ്പോള്‍ നടക്കുന്ന പൊലീസ് അന്വേഷണത്തില്‍ തൃപ്തിയില്ലെന്നും ഹൈക്കോടതിയില്‍ നിന്നും നീതി ലഭിച്ചതില്‍ സന്തോഷമുണ്ടെന്നും കുട്ടിയുടെ അമ്മ പറഞ്ഞു.
https://www.facebook.com/Malayalivartha
