മണ്ഡലകാലം അടുത്തെത്തിനില്‍ക്കെ വ്രതശുദ്ധിയോടെ മലകയറാന്‍ എത്തുന്ന അയ്യപ്പന്‍മാരുടെ ആരോഗ്യത്തിന്‌ വന്‍ഭീഷണിയുമായി ശബരിമലയിലെ ഹോട്ടലുകള്‍. മാസപൂജയ്‌ക്ക്‌ നടതുറക്കുമ്പോള്‍ ഇവിടുത്തെ ഹോട്ടലുകളില്‍ ആഹാരം പാചകം ചെയ്യുകയും ഭക്തര്‍ക്ക്‌ വിളമ്പി ഉപയോഗിക്കുകയും ചെയ്‌ത ശേഷം ഈ പാത്രങ്ങള്‍ എല്ലാം സൂക്ഷിക്കുന്നത്‌ പൊതു കക്കൂസുകളിലാണ്‌.
ലഘുഭക്ഷണവസ്‌തുക്കള്‍ വില്‍ക്കുന്ന കച്ചവടക്കാര്‍ ഭക്ഷ്യസാധനങ്ങള്‍ വില്‍ക്കാന്‍ പരുവത്തിലാക്കി സൂക്ഷിച്ചുവയ്‌ക്കുന്നതും കക്കൂസുകളില്‍ത്തന്നെ. പമ്പ മുതല്‍ സന്നിധാനം വരെയുള്ള പാതയില്‍ മൂന്ന്‌ പൊതുശൗചാലയബ്ലോക്കുകളില്‍ ഇത്തരത്തില്‍ പാത്രങ്ങളും ഭക്ഷ്യവസ്‌തുക്കളും സൂക്ഷിച്ചിട്ടുണ്ട്‌.
തണ്ണിമത്തന്‍, കൈതച്ചക്ക തുടങ്ങിയവ ശൗചാലയബ്ലോക്കുകള്‍ക്കുള്ളില്‍ മുറിച്ച്‌ പെട്ടിയിലാക്കി സൂക്ഷിച്ചിട്ടുണ്ട്‌. കച്ചവടത്തിനുള്ള എളുപ്പത്തിനാണ്‌ ഇവ മുറിച്ചു സൂക്ഷിക്കുന്നത്‌. അപ്പാച്ചിമേട്ടില്‍ കാര്‍ഡിയോളജി സെന്ററിനു സമീപത്തെ കക്കൂസ്‌ ബ്ലോക്കുകളിലാണ്‌ പാചകവാതകസിലിന്‍ണ്ടര്‍, ഫ്രിഡ്‌ജ്‌ എന്നിവ വച്ചിരിക്കുന്നത്‌. മിക്ക ശൗചാലയബ്ലോക്കുകളുടെയും പൂട്ടും താക്കോലും കച്ചവടക്കാരുടെ കൈയിലാണുള്ളത്‌.
ആരോഗ്യവകുപ്പ്‌ അധികൃതരും മണ്ഡലമകരവിളക്കുകാലത്തു മാത്രമാണ്‌ ശബരിമലയിലും തീര്‍ഥാടനപാതയിലും പരിശോധന നടത്തുന്നത്‌. വൃത്തിഹീനമായ അന്തരീക്ഷമാണ്‌ പമ്പയിലും സന്നിധാനത്തുമുള്ള കച്ചവടസ്ഥാപനങ്ങളിലുള്ളത്‌. ലക്ഷോപലക്ഷം ഭക്തര്‍വരുന്ന്‌ ഈ തീര്‍ത്ഥാടനകേന്ദ്രത്തിന്റെ അവസ്ഥ ഇതാണെങ്കില്‍ അസുഖങ്ങള്‍ വരാന്‍ ഇനി പ്രത്യേകിച്ച്‌ കാരണങ്ങള്‍ ഒന്നും തന്നെ വേണ്ട.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha