യുവാവിനെ കാറിന് മുമ്പില്‍ തള്ളിയിട്ട് കൊന്ന ഡിവൈഎസ്പിയെ ഇനിയും പിടികൂടിയിട്ടില്ല. അതേസമയം വാക്കേറ്റത്തിനിടയില്‍ യുവാവിനെ വാഹനത്തിന് മുന്നിലേക്ക് തള്ളിയിട്ടു കൊലപ്പെടുത്തിയ സംഭവത്തില്‍ കൊല്ലപ്പെട്ട സനല്‍കുമാറും ഹരികുമാറും തമ്മിലുള്ള വഴക്കിന് കാരണം കൂട്ടുകാരിയുടെ വീട്ടിലെത്തിയ ഹരികുമാറിന്റെ കാറിന് തടസ്സമായി സനല്‍കുമാര്‍ സ്വന്തം കാര്‍ നിര്‍ത്തിയിട്ടതാണെന്ന് വ്യക്തമായി. ഇതു സംബന്ധിച്ച വാക്കേറ്റത്തെ തുടര്‍ന്നായിരുന്നു നെയ്യാറ്റിന്‍കര ഡിവൈഎസ്പി ഹരികുമാര്‍ സനല്‍കുമാറിനെ മറ്റൊരു വാഹനത്തിന് മുന്നിലേക്ക് തള്ളിയിട്ടത്. സ്വകാര്യവാഹനത്തില്‍ യൂണിഫോമില്ലാതെ എത്തിയ ഡിവൈഎസ്പിയെ സനലിനു തിരിച്ചറിയാന്‍ കഴിഞ്ഞിരുന്നില്ല. വാഹനം മാറ്റിയിട്ട സനലിനെ പിന്നാലെയെത്തിയ ഹരികുമാര്‍ റോഡിലേക്ക് തള്ളിയിടുകയും എതിരേ വന്ന വാഹനം ഇടിച്ചു തെറുപ്പിക്കുകയും ആയിരുന്നു.

സ്ഥലത്തെത്തിയ നാട്ടുകാര്‍ ഡിവൈഎസ്പിയെ കൈകാര്യം ചെയ്‌തെന്നുള്ള റിപ്പോര്‍ട്ടുകളുമുണ്ട്. പരിസരവാസിയായ സുഹൃത്താണ് ഇയാളെ രപ്പെടുത്തിയത്. സംഭവത്തിന്റെ വീഡിയോ ദൃശ്യങ്ങളും പുറത്തു വന്നിട്ടുണ്ട്. എന്തിനാണ് ഹരികുമാര്‍ ഈ പെണ്‍സുഹൃത്തിന്റെ വീട്ടിലേക്ക വരുന്നതെന്ന ചോദ്യവും നാട്ടുകാര്‍ക്കിടയില്‍ ശക്തമായിട്ടുണ്ട്. ഈ വീട്ടിലേക്കു ഹരികുമാറിന്റെ വരവ് നേരത്തേയും ചോദ്യംചെയ്യപ്പെട്ടിട്ടുണ്ട്. മുമ്പു പാറശാല എസ്.ഐയായിരുന്നപ്പോള്‍ തുടങ്ങിയ ബന്ധമാണെന്നു നാട്ടുകാര്‍ ആരോപിക്കുന്നു. അന്നു പതിവുസന്ദര്‍ശകനായിരുന്ന ഹരികുമാറിനെ നാട്ടുകാര്‍ മര്‍ദിച്ചിരുന്നതായി പോലീസുകാര്‍ പറഞ്ഞു. എന്നാല്‍, മണല്‍ മാഫിയയുടെ ആക്രമണമായി ചിത്രീകരിക്കാനാണു ഹരികുമാര്‍ ശ്രമിച്ചത്. അന്വേഷണത്തെത്തുടര്‍ന്നു സ്ഥലംമാറ്റുകയും ചെയ്തു.

അതേസമയം സനല്‍കുമാറിന്റെ മരണത്തോടെ ഭാര്യയും രണ്ടുമക്കളും അമ്മയുമടങ്ങുന്ന കുടുംബമാണ് അനാഥമായത്. തീര്‍ത്തും കുട്ടികളായ സനല്‍കുമാറിന്റെ മക്കള്‍ക്കും മാതാവിനും ജീവിക്കാനുള്ള സാഹചര്യം ഒരുക്കണമെന്നാണ് നാട്ടുകാരുടെ സര്‍ക്കാരിനോടുള്ള ആവശ്യം. സര്‍ക്കാര്‍ പ്രസില്‍ താല്‍ക്കാലിക ജീവനക്കാരനായ പിതാവ് മരിച്ചിട്ട് ഒരു വര്‍ഷമേ ആയിട്ടുള്ളൂ. ഇലക്ട്രീഷ്യനായ സനലായിരുന്നു വീടിന്റെ ഏക ആശ്രയം. അടുത്തിടെ കടം വാങ്ങിയാണ് വീടിന്റെ പണി പൂര്‍ത്തിയാക്കിയത്. സംഭവത്തിന് പിന്നാലെ ഒളിവില്‍പോയ ഹരികുമാറിന് വേണ്ടിയുള്ള അന്വേഷണം തുടരുകയാണ്. ഇയാളുടെ രണ്ടു മൊബൈല്‍ ഫോണുകളും ഓഫായ നിലയിലാണ്. നെടുമങ്ങാട് പോലീസിന്റെ നേതൃത്വത്തിലാണ് അന്വേഷണം.