ബ്രൂവറി ഇടപാടില്‍ അന്വേഷണം വേണ്ടെന്ന് ഗവര്‍ണര്‍ പി.സദാശിവം. അന്വേഷണം ആവശ്യപ്പെട്ട് കത്ത് നല്‍കിയ പ്രതിപക്ഷനേതാവ് രമേശ് ചെന്നിത്തലയ്ക്ക് നല്‍കിയ മറുപടിയിലാണ് അദ്ദേഹം ഇക്കാര്യം വ്യക്തമാക്കിയത്. ഇടപാടില്‍ അഴിമതി നടന്നെന്ന് ആരോപിച്ച് നിരവധി ഹര്‍ജികള്‍ ഹൈക്കോടതിയില്‍ എത്തിയിരുന്നു. ലൈസന്‍സ് നല്‍കിയത് വിവാദമായതോടെ സര്‍ക്കാര്‍ അനുമതി റദ്ദാക്കിയിരുന്നു. ഇക്കാര്യം കോടതിയെ അറിയിച്ചതിനെ തുടര്‍ന്ന് ഹര്‍ജികള്‍ തീര്‍പ്പാക്കിയിരുന്നു. തെറ്റ് പറ്റിയെങ്കിലും സര്‍ക്കാരത് തിരുത്തിയല്ലോ എന്ന് കോടതി അന്ന് വ്യക്തമാക്കിയിരുന്നു. അത് കൂടി പരിഗണിച്ചാണ് ഗവര്‍ണര്‍ അന്വേഷണം വേണ്ടെന്ന് നിര്‍ദ്ദേശിച്ചത്. 

ചട്ടംലംഘിച്ച് ഡിസ്റ്റലറി ബ്രൂവറി അനുവദിച്ചതിന് പിന്നില്‍ അഴിമതിയുണ്ടെന്ന് പ്രതിപക്ഷനേതാവാണ് ആദ്യം വെളിപ്പെടുത്തിയത്. ബിനാമി കടലാസ് കമ്പനികളാണെന്നും കരിമ്പട്ടികയില്‍ പെട്ട ശ്രീചക്ര ഡിസ്റ്റലറീസിനും വ്യാജ മേല്‍വിലാസമുള്ള പവര്‍ ഇന്‍ഫ്രാടെകിനും അനുമതി നല്‍കിയത് ദുരിദ്ദേശത്തോടെയാണ്. മന്ത്രി സഭയുടെ പരിഗണനക്ക് അയക്കണമെന്ന ഉദ്യേഗസ്ഥരുടെ ശുപാര്‍ശ മറികടന്നാണ് എക്‌സൈസ് മന്ത്രി ഏഴ് മാസം ഫയല്‍ സ്വന്തം ഓഫീസില്‍ പിടിച്ച് വച്ചത്. ഇത് ദുരൂഹത ഉണര്‍ത്തുന്നതാണ്. ഇതിന്റെ പിന്നില്‍ സി.പി.എമ്മിന് പങ്കുണ്ടെന്നും ആരോപണം ഉയര്‍ന്നിരുന്നു.

1999ന് ശേഷം വിവിധ സര്‍ക്കാരുകള്‍ പിന്തുടര്‍ന്ന നയങ്ങളും ചട്ടങ്ങളും ഒന്നാകെ തള്ളിക്കളഞ്ഞാണ് മുഖ്യമന്ത്രി പിണറായി വിജയനും എക്‌സൈസ് മന്ത്രി ടി.പി രാമകൃഷ്ണനും ബ്രൂവറി ഇടപാട് നടത്തിയതെന്നായിരുന്നു ചെന്നിത്തലയുടെ ആരോപണം. ഇതിലൂടെ കോടികള്‍ കൈമറിഞ്ഞിട്ടുണ്ടെന്നാണ് പെട്ടിക്കട പോലും തുടങ്ങാന്‍ സാമ്പത്തിക ശേഷിയില്ലാത്തവര്‍ക്കാണ് ഡിസ്റ്റലറിയും, ബ്രൂവറികളും സര്‍ക്കാര്‍ അനുവദിച്ചിരിക്കുയാണെന്നും ഇവര്‍ ബിനാമികളാണെന്ന് വ്യക്തമാണെന്നും അദ്ദേഹം ആരോപിച്ചു. ആ സമയത്ത് ചികില്‍സയ്ക്കായി അമേരിക്കയില്‍ പോയിരുന്നു മുഖ്യമന്ത്രി നാട്ടിലെത്തിയ ശേഷമാണ് അനുമതി റദ്ദാക്കിയത്. തുടര്‍ന്ന് ആരോപണ വിധേയരായ മുഖ്യമന്ത്രിക്കും, എക്‌സൈസ് മന്ത്രിക്കും എതിരെ അന്വേഷണത്തിന് അനുമതി തേടി പ്രതിപക്ഷനേതാവ് ഗവര്‍ണ്ണറെ സമീപിക്കുകയായിരുന്നു.