ജയില് ഉദ്യോഗസ്ഥരുടെ ക്രൂരമര്ദ്ദനത്തെ തുടര്ന്ന് കണ്ണൂര് സെന്ട്രല് ജയിലില് തടവുകാരന്റെ നട്ടെല്ലിന് പരിക്കേറ്റ് ശരീരം തളര്ന്നു
ജയില് ഉദ്യോഗസ്ഥരുടെ മര്ദനത്തില് നട്ടെല്ലിന് ഗുരുതര പരിക്കേറ്റ് കണ്ണൂര് സെന്ട്രല് ജയിലിലെ തടവുകാരന്റെ ശരീരം തളര്ന്നു. മര്ദ്ദനം നടന്ന കാര്യം പുറത്തു പറയുന്നത് തടയാന് ചികിത്സ നിഷേധിച്ചതോടെയാണ് ശരീരം തളര്ന്നതെന്ന് പരിക്കേറ്റ കോഴിക്കോട് സ്വദേശി അല്ത്താഫ് പറഞ്ഞു. അല്ത്താഫിനെ തുടര്ന്നും ജയിലിലിടുന്നത് കടുത്ത മനുഷ്യാവകാശ ലംഘനമാണെന്ന് ചൂണ്ടികാട്ടി ജില്ലാ ജയില് സൂപ്രണ്ട് കത്ത് നല്കിയിട്ടുണ്ട്.
കഴിഞ്ഞ ദിവസം ജയിലില് നിന്ന് മെഡിക്കല് കോളേജിലേക്ക് മാറ്റിയ അല്ത്താഫിന് പരസഹായം കൂടാതെ നില്ക്കാനും നടക്കാനും പ്രാഥമിക കൃത്യങ്ങള്ക്ക് പോലും കഴിയാതായെന്ന് ജില്ലാ ജയില് സൂപ്രണ്ടിന്റെ കത്തില് പറയുന്നു. കാലുകളുടെ നിയന്ത്രണം നഷ്ടമായിരിക്കുന്നു. അടിയന്തിരമായി ശസ്ത്രക്രിയ വേണമെന്നും ഈ നില തുടരുന്നത് മനുഷ്യാവകാശ ലംഘനമാണെന്നും വ്യക്തമാക്കുന്നു. ഗുരുതരമായ പരിക്കുകള് ഉണ്ടെന്ന് മെഡിക്കല് റിപ്പോര്ട്ടും ശരിവെക്കുന്നു. എന്നാല് അനുദിനം നില വഷളാകുന്ന അല്ത്താഫിന് ശസ്ത്രക്രിയക്ക് ദിവസം നല്കിയിരിക്കുന്നതാകട്ടെ 2019 ജനുവരിയിലും.
സെന്ട്രല് ജയിലില് ഉദ്യോഗസ്ഥര് സംഘം ചേര്ന്ന് മര്ദിച്ചുവെന്ന് അല്താഫ് പറയുന്നു.'കഴുത്ത് കാലുകള്ക്കുള്ളില് കുടുക്കി അത്രയും പേര് കൂടിയിട്ട് തല്ലുകയായിരുന്നു. ബൂട്ടിട്ട് കാലു കൊണ്ട് ചവിട്ടിയിരുന്നു. സെന്ട്രല് ജയില് പത്താം ബ്ലോക്കിലെ എ ബ്ലോക്കിന്റെ വരാന്തയിലിട്ട് അത്രയും ആളുകള്ക്ക് മുന്നിലിട്ടാണ് തല്ലിയത്.'' അല്ത്താഫ് പറയുന്നു. മര്ദനമുണ്ടായത് ശരിവെക്കുന്ന ഉദ്യോഗസ്ഥര്, ജയിലില് അച്ചടക്കം പാലിക്കാത്തതിനായിരുന്നു ഇതെന്നും വിശദീകരിക്കുന്നു.
സെന്ട്രല് ജയില് ഡെപ്യൂട്ടി സൂപ്രണ്ട് അടക്കം മുപ്പതിലധികം ഉദ്യോഗസ്ഥരുടെ പേരുകള് സഹിതം ഇയാള് പരാതിയും നല്കിയിരുന്നു. കണിച്ചുകുളങ്ങര കേസിലെ പ്രതിയടക്കമുള്ളവരെ പരാതിയില് ദൃക്സാക്ഷികളായി ചേര്ത്തിട്ടുമുണ്ട്. മര്ദനം പുറത്തറിയാതിരിക്കാന് ചികിത്സ പോലും നിഷേധിച്ചതിനാലാണ് മാസങ്ങള്ക്ക് മുന്പ് നടന്ന സംഭവത്തില് പരാതി നല്കാന് വൈകിയതെന്നും അല്ത്താഫ് വ്യക്തമാക്കുന്നു.
2 മാസം മുന്പ് ജില്ലാ ജയിലിലേക്ക് മാറ്റിയതോടെയാണ് ഒടുവില് അല്ത്താഫിന് ചികിത്സക്ക് വഴി തെളിഞ്ഞത്. നിലവില് ശിക്ഷയനുഭവിക്കുന്ന കേസിന് പുറമെ ഉദ്യോഗസ്ഥരെ എതിര്ത്തതും മോഷണക്കേസുകളുമാണ് ഇയാള്ക്ക് മേലുള്ളത്.
ജയിലില് കിടക്കുന്ന ഒരാള്ക്ക് ദേഹം തളര്ന്നിട്ട് പോലും അധികൃതര് അറിയിക്കാത്തതിനാല് ഇതിനെതിരെ നിയമനടപടിയ്ക്ക് ഒരുങ്ങുകയാണെന്ന് അല്ത്താഫിന്റെ സഹോദരന് പറയുന്നു. ആരോഗ്യനില വഷളാകുന്ന സാഹചര്യത്തില് ഇയാള്ക്ക് കേസുകളിലും ശിക്ഷയിലും ഇളവ് ലഭ്യമാക്കാനുള്ള ശ്രമങ്ങളും സജീവമാണ്.
https://www.facebook.com/Malayalivartha
