മണ്ഡലകാലം തുടങ്ങി പതിന്നാലുദിവസം പിന്നിടുമ്പോള്‍ ശബരിമലയിലെ സ്ഥിതി ശാന്തമാകുന്നു. യുവതികളാരും ദര്‍ശനമാവശ്യപ്പെട്ട് എത്താത്തതും പ്രതിഷേധക്കാര്‍ താത്കാലികമായി പിന്‍വലിഞ്ഞതും ഇതിന് കാരണമായി. എല്ലാ ദിവസവും രാത്രി പത്തിന് നാമജപ പ്രതിഷേധം നടക്കുന്നുണ്ടെങ്കിലും നിയന്ത്രണം പ്രഖ്യാപിച്ചിരിക്കുന്ന സ്ഥലത്തിനു പുറത്താണ്.

150 മുതല്‍ 200 വരെ പ്രവര്‍ത്തകര്‍ ഇതില്‍ പങ്കെടുക്കുന്നുണ്ട്. ഇവര്‍ ശാന്തമായാണ് നാമജപം നടത്തുന്നത്. ഹരിവരാസനം കഴിയുമ്പോള്‍ പിരിഞ്ഞു പോകുകയും ചെയ്യുന്നു. ആചാരലംഘനത്തിന് സ്ത്രീകളെത്തിയതാണ് പ്രതിഷേധമുയരാന്‍ കാരണമെന്ന് പ്രതിഷേധക്കാരും അതിരുകടന്ന പ്രതിഷേധമാണ് പ്രശ്‌നങ്ങളുണ്ടാക്കിയതെന്ന് സര്‍ക്കാരും പരസ്പരം പഴിചാരുന്നു. സ്ഥിതി ശാന്തമായതോടെ ആയിരങ്ങളാണ് മല ചവിട്ടാനെത്തുന്നത്. വെള്ളിയാഴ്ച ഭക്തരുടെ വലിയ തിരക്ക് സന്നിധാനത്ത് അനുഭവപ്പെട്ടു. തമിഴ്‌നാട്, ആന്ധ്രാപ്രദേശ് എന്നിവിടങ്ങളില്‍നിന്നുള്ളവരാണ് കൂടുതലായും എത്തുന്നത്.

മലയാളികളുടെ എണ്ണം ഇപ്പോഴും കുറവാണ്. തിരക്ക് കൂടുന്നതനുസരിച്ച് വരുമാനം വര്‍ധിക്കുന്നില്ലെന്നത് ദേവസ്വം ബോര്‍ഡിനെ കുഴക്കുന്നുണ്ട്. അപ്പം, അരവണ വില്‍പ്പനയും കാണിക്കവരവും കുറവാണ്. അരവണ, അപ്പം വില്‍പ്പന കൗണ്ടറുകള്‍ പലപ്പോഴും ഒഴിഞ്ഞുകിടക്കുകയാണ്. പോലീസ് നിയന്ത്രണങ്ങളില്‍ ചിലത് ഭക്തരെ ഇപ്പോഴും ബുദ്ധിമുട്ടിലാക്കുന്നുണ്ട്. വലിയ നടപ്പന്തലില്‍ വിരിവെക്കാനാകാത്തതും വാവരുനട, വലിയകാണിക്ക എന്നീ പ്രദേശങ്ങളിലെ ബാരിക്കേഡ് നീക്കാത്തതും ബുദ്ധിമുട്ടുണ്ടാക്കുന്നു.