പൊതുയിടങ്ങളില് അനധികൃതമായി സ്ഥാപിച്ച പരസ്യബോര്ഡുകളും ഫ്ലക്സുകളും പത്ത് ദിവസത്തിനകം എടുത്തുമാറ്റണമെന്ന ഹൈക്കോടതി ഉത്തരവിനെ തുടര്ന്ന് കര്ശന നടപടികളുമായി സര്ക്കാര് രംഗത്ത്
പത്ത് ദിവസത്തിനകം പൊതുയിടങ്ങളില് അനധികൃതമായി സ്ഥാപിച്ച പരസ്യബോര്ഡുകളും ഫ്ലക്സുകളും മറ്റും എടുത്തുമാറ്റണമെന്ന ഹൈകോടതി ഉത്തരവിനെ തുടര്ന്ന് കര്ശന നടപടികളുമായി സര്ക്കാര്. കോടതി നിര്ദേശത്തെ തുടര്ന്ന് എല്ലാ ജില്ലകളിലെയും പഞ്ചായത്ത് ഡെപ്യൂട്ടി ഡയറക്ടര്മാരെയും നഗരകാര്യ വകുപ്പ് റീജനല് ജോയന്റ് ഡയറക്ടര്മാരെയും അനധികൃത പരസ്യബോര്ഡുകളും ബാനറുകളും കൊടികളും മറ്റും നീക്കം ചെയ്യുന്നതിന് മേല്നോട്ടം വഹിക്കാനും പുരോഗതി വിലയിരുത്താനുമായി നോഡല് ഓഫിസര്മാരായി നിയമിച്ചു. ഈ വിഷയത്തില് പൊതുജനങ്ങള്ക്കുള്ള പരാതി അറിയിക്കുന്നതിന് നോഡല് ഓഫിസര്മാരുടെ വിവരങ്ങളും ഫോണ്വാട്സ്ആപ് നമ്പറുകളും ഇമെയില് വിലാസവും പ്രസിദ്ധീകരിക്കും. ഇതുസംബന്ധിച്ച കോടതി, സര്ക്കാര് ഉത്തരവുകള് പാലിക്കുന്നതിന് നോഡല് ഓഫിസര്മാര് മേല്നോട്ടം വഹിക്കണം.
അനധികൃത പരസ്യബോര്ഡുകളും മറ്റും നീക്കം ചെയ്യുന്നതിലുണ്ടായ പുരോഗതി വിലയിരുത്തുകളും തദ്ദേശ സ്ഥാപനങ്ങളിലെ സെക്രട്ടറിമാര്ക്ക് ആവശ്യമായ മാര്ഗനിര്ദേശങ്ങള് നല്കുകയും വേണം. സംസ്ഥാനത്ത് തദ്ദേശ സ്ഥാപനങ്ങളുടെ അനുമതിയില്ലാതെ വിവിധ ഏജന്സികളും രാഷ്ട്രീയ സംഘടനകളും സ്ഥാപനങ്ങളും ബോര്ഡുകളും ഫ്ലക്സുകളും മറ്റും സ്ഥാപിച്ചത് അപകടങ്ങള്ക്ക് കാരണമാകുന്നതിനാല് അനധികൃതമായവ എടുത്തുമാറ്റാന് ഹൈകോടതി ആവശ്യപ്പെട്ടിരുന്നു.
എന്നാല്, ഇവ എടുത്തുമാറ്റാന് തദ്ദേശസ്ഥാപനങ്ങള് നിര്ദേശം നല്കിയിട്ടും കാര്യമുണ്ടായില്ല. ഈ സാഹചര്യത്തിലാണ് 10 ദിവസത്തിനുള്ളില് ഇവ നീക്കം ചെയ്തില്ലെങ്കില് തദ്ദേശസ്ഥാപനങ്ങളിലെ സെക്രട്ടറിമാര്ക്കും ഫീല്ഡ് ജീവനക്കാര്ക്കുമെതിരെ നടപടിയെടുക്കാന് കോടതി നിര്ദേശിച്ചത്. അനധികൃതമായി ബോര്ഡ് സ്ഥാപിക്കുന്നവര്ക്കെതിരെ പിഴ ചുമത്താനും ക്രിമിനല് കേസെടുക്കാനും ഉത്തരവിട്ടിരുന്നു. പാതയോരങ്ങളിലെയും പൊതുസ്ഥലങ്ങളിലെയും അനധികൃത ഫ്ലക്സ് ബോര്ഡുകള് നീക്കണമെന്ന് ഉത്തരവ് നടപ്പാക്കുന്നതില് സര്ക്കാര് പരാജയപ്പെട്ടെന്ന് അമിക്കസ്ക്യൂറി ഹൈകോടതിയില് അറിയിച്ചിരുന്നു.
https://www.facebook.com/Malayalivartha
