ബി.ജെ.പിയുടെ ശബരിമല സമരത്തിന് കരുത്ത് പകര്‍ന്ന സംസ്ഥാന ജനറല്‍ സെക്രട്ടറി കെ.സുരേന്ദ്രന് ഇനി പത്തനംതിട്ടയില്‍ പ്രവേശിക്കാം. ജില്ലയില്‍ പ്രവേശിക്കരുതെന്ന ഹൈകോടതിയുടെ ഉത്തരവിന്റെ കാലാവധി അവസാനിച്ചു. റാന്നി കോടതി രണ്ട് മാസത്തെ വിലക്കാണ് ഏര്‍പ്പെടുത്തിയിരുന്നത്. വിലക്ക് നീക്കണമെന്നും ജാമ്യം നല്‍കണമെന്നും ആവശ്യപ്പെട്ട് സുരേന്ദ്രന്‍ ഹൈക്കോടതിയെ സമീപിച്ചിരുന്നു. ജാമ്യം അനുവദിച്ച കോടതി മൂന്ന് മാസത്തേക്ക് പത്തനംതിട്ട ജില്ലയില്‍ പ്രവേശിക്കരുതെന്ന ഉപാധിയും മുന്നോട്ട് വച്ചിരുന്നു. ചിത്തിര ആട്ട വിശേഷത്തിന് ശബരിമലയിലെത്തിയ തൃശൂര്‍ സ്വദേശിയായ വീട്ടമ്മ ശ്യാമളയെ നെയ്‌ത്തേങ്ങയ്ക്ക് എറിഞ്ഞ കേസിന്റെ ഗൂഢാലോചനയിലാണ് സുരേന്ദ്രന്‍ അറസ്റ്റിലായത്. മണ്ഡലകലാത്ത് ദര്‍ശനത്തിനെത്തിയ സുരേന്ദ്രനെ നിലയ്ക്കലില്‍ നിന്നാണ് അറസ്റ്റ് ചെയ്തത്. 

23 ദിവസത്തെ ജയില്‍ വാസത്തിന് ശേഷമാണ് ജാമ്യം ലഭിച്ചത്. തുലാമാസ പൂജകള്‍ക്ക് നട തുറന്നപ്പോള്‍ മുതല്‍ കെ.സുരേന്ദ്രനും സംഘവും സന്നിധാനത്ത് തമ്പടിത്താണ് ആക്രമണങ്ങള്‍ക്ക് നേതൃത്വം നല്‍കിയതെന്ന് പൊലീസ് ആരോപിച്ചിരുന്നു. ചിത്തിര ആട്ടവിശേഷത്തിനും ഇത് തന്നെ ആവര്‍ത്തിച്ചു. തുടര്‍ന്നാണ് മുന്‍കരുതല്‍ നടപടി എന്നനിലയില്‍ സുരേന്ദ്രനെ അറസ്റ്റ് ചെയ്തത്. ജാമ്യത്തിനായി സുരേന്ദ്രന്‍ ഹൈക്കോടതിയെ സമീപിച്ചെങ്കിലും എ്ന്തിനാണ് ശബരിമലയില്‍ പോയതെന്നും സമരം നടത്താനുള്ള ഇടമല്ല അവിടമെന്നും കോടതി വിമര്‍ശിച്ചിരുന്നു. അറസ്റ്റിലായ സുരേന്ദ്രനെതിരെ മുമ്പ് ഉണ്ടായിരുന്ന കേസുകളെല്ലാം പൊലീസ് പൊടിതട്ടി എടുക്കുകയായിരുന്നു. അതിനെതിരെ വ്യാപക പ്രതിഷേധം ഉയര്‍ന്നിരുന്നു. 

നിലയ്ക്കലില്‍ നിന്ന് എസ്.പി യതീഷ് ചന്ദ്രയുടെ നേതൃത്വത്തില്‍ അറസ്റ്റ് ചെയ്ത സുരേന്ദ്രനെ ചിറ്റാര്‍ പൊലീസ് സ്റ്റേഷനിലെത്തിച്ചു. ആര്‍.എസ്.എസ് പ്രവര്‍ത്തകര്‍ അവിടെ നാമജപവുമായി എത്തിയിരുന്നു. സ്റ്റേഷനില്‍ വെച്ച് സുരേന്ദ്രന്‍ ഇരുമുടിക്കെട്ട് താഴെയിട്ടത് വലിയ വിവാദമായിരുന്നു. അതിന്റെ ദൃശ്യങ്ങള്‍ ദേവസ്വം മന്ത്രി കടകംപള്ളി സുരേന്ദ്രന്‍ പുറത്ത് വിടുകയായിരുന്നു. പൊലീസ് തന്റെ ഇരുമുടിക്കെട്ട് താഴെയിട്ടെന്നായിരുന്നു സുരേന്ദ്രന്റെ ആരോപണം. രാത്രി മൂന്ന് മണിക്ക് സുരേന്ദ്രനെ പത്തനംതിട്ട ജില്ലാ ആശുപത്രിയിലെത്തിച്ച് വൈദ്യപരിശോധന നടത്തിയ ശേഷം കൊട്ടാരക്കര സബ്ജയിലില്‍ എത്തിച്ചു. പൊലീസ് തന്നെ ക്രൂരമായി മര്‍ദ്ദിച്ചെന്നും ഗുളിക കഴിക്കാനോ, വെള്ളം കുടിക്കാനോ പോലും അനുവദിച്ചില്ലെന്നും സുരേന്ദ്രന്‍ ആരോപിച്ചു. 

സുരേന്ദ്രനെ കണ്ണൂര്‍ സെന്‍ട്രല്‍ ജയിലിലേക്ക് മാറ്റാന്‍ നീക്കം നടക്കുന്നുണ്ടെന്നും അതിനാല്‍ തിരുവനന്തപുരം സെന്‍ട്രല്‍ ജയിലിലേക്ക് മാറ്റണമെന്ന് ആവശ്യപ്പെട്ട് ഹൈക്കോടതിയെ സമീപിച്ചിരുന്നു. കൊട്ടാരക്കര ജയിലില്‍ കഴിഞ്ഞ സുരേന്ദ്രനെതിരെ, കണ്ണൂര്‍ ഡിവൈഎസ്പിയെ ഭീഷണിപ്പെടുത്തിയ കേസ് വീണ്ടും കുത്തിപ്പൊക്കിയതോടെയാണ് ഇത് വിവാദമായത്. കണ്ണൂരിലേക്ക് കൊണ്ടുപോയ സുരേന്ദ്രനെ, രാത്രി വൈകിയതിനാല്‍ സുരക്ഷാകാരണങ്ങളാല്‍ കോഴിക്കോട് ജയിലില്‍ പാര്‍പ്പിച്ചിരുന്നു. തന്റെ ജീവന്‍ അപായപ്പെടുത്താന്‍ സി.പി.എമ്മുകാര്‍ നോക്കിയെന്നും അതിനാണ് കണ്ണൂര്‍ ജയിലിലാക്കാന്‍ ശ്രമിച്ചതെന്നും എന്നാല്‍ ഭാഗ്യം കൊണ്ട് കോഴിക്കോട് എത്തിയപ്പോള്‍ രാത്രിയായെന്നും സുരേന്ദ്രന്‍ ആരോപിച്ചിരുന്നു. അവസാനം എല്ലാ കേസുകളിലും ജാമ്യം ലഭിച്ചെങ്കിലും ശബരിമലയില്‍ പോകാന്‍ അനുമതി നല്‍കിയില്ല. മകരവിളക്കിന് തൊണ്ട് മുന്‍പും ദര്‍ശനത്തിന് അനുമതി തേടി ഹൈക്കോടതിയെ സമീപിച്ചിരുന്നു. പക്ഷെ, അനുവദിച്ചിരുന്നില്ല.