യൂത്ത് കോണ്ഗ്രസ് പ്രവര്ത്തകനായ ഷുഹൈബ് വധക്കേസിലെ സി.പി.എം പ്രവര്ത്തകന് ആകാശ് തില്ലങ്കേരി അടക്കമുള്ള നാല് പ്രതികള്ക്ക് ഹൈക്കോടതി ജാമ്യം അനുവദിച്ചു
യൂത്ത് കോണ്ഗ്രസ് പ്രവര്ത്തകനായ ഷുഹൈബ് വധക്കേസിലെ സി.പി.എം പ്രവര്ത്തകന് ആകാശ് തില്ലങ്കേരി അടക്കമുള്ള നാല് പ്രതികള്ക്ക് ഹൈക്കോടതി ജാമ്യം അനുവദിച്ചു. രണ്ടാം പ്രതി രഞ്ജി രാജ്, മൂന്നാം പ്രതി കെ ജിതിന്, നാലാം പ്രതി സി എസ് ദീപ് ചന്ദ് എന്നിവരാണ് ജാമ്യം ലഭിച്ച മറ്റുള്ളവര്. കര്ശനമായ ഉപാധികളോടെയാണ് ജാമ്യം നല്കിയിരിക്കുന്നത്. ഒരു ലക്ഷം രൂപയുടെ ബോണ്ട്, മട്ടന്നൂര് പൊലീസ് സ്റ്റേഷന് പരിധിയില് കടക്കരുത് എന്ന് പറഞ്ഞാണ് കോടതി ജാമ്യം നല്കിയത്. 2018 ഫെബ്രുവരി 12നാണ് രാഷ്ട്രീയ സംഘര്ഷങ്ങളുടെ തുടര്ച്ചയായാണ് ശുഹൈബ് കൊല്ലപ്പെട്ടത്. കണ്ണൂര് തെരൂരിലെ തട്ടുകടയില് അര്ദ്ധരാത്രി ഭക്ഷണം കഴിച്ചുകൊണ്ടിരിക്കെ ബോംബെറിഞ്ഞാണ് ഷുഹൈബിനെ സി.പി.എം അക്രമിസംഘം വെട്ടിക്കൊന്നത്.
ഷുഹൈബിനെയും കൂടെയുള്ളവരെയും ആക്രമിച്ച സംഘം അവരെ മറ്റുള്ളവര് ആശുപത്രിയിലേക്ക് കൊണ്ടുപോകുന്നത് വൈകിപ്പിക്കുകയും ചെയ്തു. ഷുഹൈബിനെ കോഴിക്കോട് മെഡിക്കല് കോളേജിലെത്തിക്കുന്നതിന് മുന്പ് രക്തം വാര്ന്ന് മരിക്കുകയായിരുന്നു. മട്ടന്നൂരിനടുത്തെ സ്കൂളില് കൊടികെട്ടുന്നത് സംബന്ധിച്ചുണ്ടായ തര്ക്കമാണ് ഷുഹൈബ് വധത്തില് കലാശിച്ചത്. പ്രതിയായ ആകാശ് തില്ലങ്കേരി സി.പി.എം പ്രവര്ത്തകനല്ലെന്ന് ആദ്യം പറഞ്ഞെങ്കിലും ജില്ലാ സെക്രട്ടറിയായിരുന്ന പി.ജയരാജനുമായുള്ള അടുപ്പം വെളിവാക്കുന്ന ചിത്രങ്ങള് പുറത്ത് വന്നതോടെ പാര്ട്ടിയില് നിന്ന് പുറത്താക്കി. മട്ടന്നൂരിലെ ശക്തനായ യൂത്ത് കോണ്ഗ്രസ് പ്രവര്ത്തകനായിരുന്നു ഷുഹൈബ്.
സ്കൂളിലുണ്ടായ സംഭവത്തിന് ശേഷം ഷുഹൈബിന്റെ ജീവനെടുക്കുമെന്ന് ആകാശ് തില്ലങ്കേരി വെല്ലുവിളിച്ചതിന്റെ ദൃശ്യങ്ങള് സമൂഹമാധ്യമങ്ങളിലൂടെ പുറത്ത് വന്നിരുന്നു. അതിനെതിരെ കേസെടുക്കാന് പോലും പൊലീസ് തയ്യാറായില്ല. തെളിവുണ്ടായിട്ടും കേസെടുക്കാന് പോലും പൊലീസ് പരാജയപ്പെട്ടതാണ് കണ്ണൂര് സംഘര്ഷങ്ങളുടെ പ്രധാന കാരണം. എല്.ഡി.എഫും യു.ഡി.എഫും ജില്ലാഭരണകൂടത്തിന്റെ സാനിധ്യത്തില് ഉണ്ടാക്കിയ സമാധാന കരാറിലെ പ്രധാന തീരുമാനമായിരുന്നു സോഷ്യല്മീഡിയ ശക്തമായി നിരീക്ഷിക്കുമെന്നത്. ഷുഹൈബിനെതിരായി മുന്പ് പുറത്തുവന്ന കൊലവിളി വീഡിയോയില് പോലും കേസെടുത്തിരുന്നില്ല. തില്ലങ്കേരിയിലെ ആര്.എസ്.എസ് പ്രവര്ത്തകന് വിനീഷിനെ വധിച്ച കേസിലെ പ്രതിയായ ആകാശ് അതിന് ശേഷമുണ്ടായ സംഘര്ഷത്തിനിടെ വിളിക്കുന്ന കൊലവിളി മുദ്രാവാക്യങ്ങള് ആണ് സോഷ്യല് മീഡിയയില് വ്യപകമായി പ്രചരിച്ചത്.
ആകാശ് തില്ലങ്കേരി അറസ്റ്റിലായപ്പോള് പ്രാദേശി സി.പി.എം നേതാക്കള്ക്കെതിരെ മൊഴി നല്കിയിരുന്നു. കേസില് ഡമ്മി പ്രതികളെ നല്കാമെന്ന് പാര്ട്ടി ഉറപ്പു നല്കിയെന്നായിരുന്നു മൊഴി. പ്രാദേശിക നേതൃത്വമാണ് ഇതുസംബന്ധിച്ച ഉറപ്പ് നല്കിയത്. പാര്ട്ടി ഭരിക്കുന്നതിനാല് അന്വേഷണം ഭയക്കേണ്ട. പ്രതികളെ പാര്ട്ടി നല്കുന്നതോടെ പൊലീസ് കൂടുതല് അന്വേഷണം നടത്തില്ലെന്ന് ഉറപ്പ് നല്കിയതായും ആകാശ് മൊഴി നല്കിയിരുന്നു. ആകാശിനെ അറസ്റ്റ് ചെയ്ത ശേഷം കണ്ണൂര് ജില്ലാ കമ്മിറ്റി ഓഫീസിലേക്ക് ആകാശിന്റെ അച്ഛനെ വിളിച്ചുവരുത്തി മുഖ്യമന്ത്രി പിണറായിയും പി. ജയരാജനും എന്.ഷംസീറും ചര്ച്ച നടത്തിയിരുന്നു.
https://www.facebook.com/Malayalivartha
