നീനുവിന്റെ വീട്ടുകാര്‍ കെവിന്റെ ജീവന്‍ എടുത്തതിനു പകരം ചെയ്യാന്‍ നമുക്കാകില്ലല്ലോയെന്ന് അമ്മ മേരി. നീനുവിനെ ഇത്രയധികം സ്നേഹിക്കാന്‍ മേരിക്കെങ്ങനെ കഴിയുന്നുവെന്നത് കേരളത്തിലെ ഓരോരുത്തരം ചോദിച്ചിട്ടുണ്ട്. അതിനുള്ള ഉത്തരം കൂടിയാണ് മേരി ഇപ്പോള്‍ നല്‍കുന്നത്.

'എന്റെ കുഞ്ഞിനെ ഇല്ലാതാക്കിയവരെ വെറുക്കാന്‍ എനിക്ക് എളുപ്പം കഴിയും. പക്ഷേ അവരെ സ്നേഹിക്കാനാണ് ബുദ്ധിമുട്ട്. മരണം വരെ അവനെയോര്‍ത്ത് കണ്ണീരൊഴുക്കാനാണ് എന്റെ വിധി. എന്റെ കുഞ്ഞിനെ കൊന്നവന്റെ മകളായി നീനുവിനെ ഞാന്‍ ഒരിക്കലും ചിന്തിച്ചിട്ടില്ല. പകരത്തിന് പകരം ചെയ്യാന്‍ നമുക്കെന്ത് അവകാശമാണ്?'

നീനുവിനും ഇപ്പോള്‍ ഇത് സ്വന്തം വീടാണ്. 'ഈ അമ്മയുടെ മരുമകളായി സ്വപ്നംകണ്ടിരുന്നതാണ് ഞാന്‍. പക്ഷേ, ഇപ്പം ഞാനവര്‍ക്ക് മകളാണ്. ഇതുപോലൊരു അച്ഛനും അമ്മയും ഭാഗ്യമാണ്. പക്ഷേ, ഇതൊന്നും കാണേണ്ടയാള്‍ ഒപ്പമില്ലാതെയായി'- നീനു കണ്ണീരോടെ പറയുന്നു.