പച്ച മനുഷ്യനാ ഞാനും... തൃശൂര് പൂരത്തിനിടെ ഒരു വിവാദത്തിനും ഇട നല്കാതെ യുവാക്കളോടൊപ്പം ചെണ്ടമേളം ആസ്വദിച്ച് താളം പിടിച്ച് യതീഷ് ചന്ദ്ര
ശബരിമലയില് എസ്.പി. യതീഷ് ചന്ദ്രന്റെ കൈക്കരുത്ത് ബിജെപി നേതാവ് കെ. സുരേന്ദ്രനും കേന്ദ്രമന്ത്രി പൊന്രാധാകൃഷ്ണനും നന്നായി അറിഞ്ഞതാണ്. അതോടെ കര്മ്മ സമിതി പ്രവര്ത്തകരെല്ലാം യതീഷ് ചന്ദ്രയ്ക്കെതിരായി. എന്നാല് പിന്നീട് അയ്യപ്പനെ കണ്ട് തൊഴുന്ന യതീഷ് ചന്ദ്രയുടെ ചിത്രങ്ങളും പുറത്തു വന്നു. എന്നാല് നരേന്ദ്രമോഡി തൃശൂരിലെത്തിയപ്പോള് യതീഷ് ചന്ദ്രക്ക് കൈ കൊടുത്തത് കൗതുകമായി.
പലപ്പോഴും വിവാദങ്ങളില് നിറഞ്ഞു നില്ക്കുന്ന ഐപിഎസ് ഉദ്യോഗസ്ഥനാണ് യതീഷ് ചന്ദ്ര. പുതുവയ്പ്പിന് സമരക്കാരെ തല്ലിയതും ശബരിമല വിഷയവും അദ്ദേഹത്തെ വിവാദത്തിലാക്കിയിരുന്നു. എന്നാല് പ്രളയ കാലത്തെ അദ്ദേഹത്തിന്റെ പ്രവര്ത്തനങ്ങള്ക്ക് സോഷ്യല് മീഡിയ അദ്ദേഹത്തിന് കൈയ്യടി നേടി കൊടുക്കുകയും ചെയ്തിരുന്നു. ദുരിതാശ്വാസ സാമഗ്രികള് നിറച്ച ചാക്കുകെട്ട് ഒറ്റയ്ക്ക് ചുമലിലേറ്റുന്ന യതീഷ് ചന്ദ്രയുടെ വീഡിയോ അന്ന് വൈറലാവുകയും ചെയ്തു.
അതുപോലെ പൂരാവേശത്തിനിടെ ആര്പ്പോ വിളിക്കുന്ന യതീഷ് ചന്ദ്രയുടെ വീഡിയോയാണ് ഇപ്പോള് സോഷ്യല് മീഡിയയില് വൈറലായിരിക്കുന്നത്. ചെണ്ട മേളം ആസ്വദിച്ച് മേളത്തിനൊപ്പം താളം പിടിച്ച് യതീഷ് ചന്ദ്രയും ജനങ്ങള്ക്കൊപ്പം കൂടി.
കലിപ്പ് ലുക്കില് മാത്രം കാണാറുള്ള ഉദ്യോഗസ്ഥനെ പൂരപ്പറമ്ബില് തികഞ്ഞ ആസ്വാദകനായി എത്തിയതോടെ പൂരപ്രേമികള്ക്ക് കൂടുതല് ആവേശമേറുകയും ചെയ്തു. ചിലര്ക്ക് ഒരു മോഹം. താളത്തില് കൈയ്യടിച്ച് ഒരു ചിയേഴ്സ് പറയണമെന്ന്. കൈ നീട്ടിയ യുവാവിനെ യതീഷ് ചന്ദ്ര നിരാശനാക്കിയില്ല. ഗൗരവം മാറ്റിവച്ച് യുവാക്കള്ക്ക് കൈകൊടുത്ത് പൂരത്തിന്റെ പൂരത്തിനൊപ്പം അദ്ദേഹം കൂടി. ഈ വീഡിയോ സമൂഹമാധ്യമങ്ങളില് വൈറലാവുകയാണ്.
അതേസമയം പൂരത്തിന് ഒരു അനിഷ്ട സംഭവവുമില്ലാതെ നോക്കിയതിന് യതീഷ് ചന്ദ്രയ്ക്കും കളക്ടര് ടിവി അനുപമയ്ക്കും അനുമോദനം ലഭിച്ചു. തൃശ്ശൂര് പൂരത്തിനിടെ, ഒരു അക്രമമോ, തമ്മില് തല്ലോ, പോക്കറ്റടിയോ, മാലമോഷണമോ ഒന്നും തന്നെ ആ വലിയ ജനസാഗരത്തില് നിന്നും റിപ്പോര്ട്ട് ചെയ്യപ്പെട്ടില്ല. ഒരു പിഴവുമില്ലാതെ കൃത്യമായ പ്ലാനിങോടെ നടപ്പാക്കിയ സുരക്ഷാ ക്രമീകരണങ്ങളാണ് എല്ലാത്തിനും കാരണം. ഈ ക്രമീകരണങ്ങള്ക്ക് ജില്ലാ കളക്ടര് ടിവി അനുപമയ്ക്കും ജില്ലാ പോലീസ് സൂപ്രണ്ട് യതീഷ്ചന്ദ്രയ്ക്കും നിറഞ്ഞമനസോടെ നന്ദി പറയുകയാണ് ജനങ്ങള്. കുറ്റകൃത്യങ്ങള് ഒന്നും തന്നെ റിപ്പോര്ട്ട് ചെയ്യപ്പെടാത്തത് പോലീസിനും സര്ക്കാരിനും അഭിമാനിക്കാനുള്ള വകയായി.
തിരക്കിനിടെ കൂട്ടം തെറ്റിപ്പോയ 62 പേരെയാണ് പോലീസ് സുരക്ഷിതമായി തിരിച്ച് വീടുകളിലെത്തിച്ചത്. ഇതില് 12 കുട്ടികളും ഉള്പ്പെടുന്നു. മൊബൈല് ഫോണ് ജാം ആയിരുന്നെങ്കിലും വയര്ലെസ് സെറ്റിലൂടെ അതതു പോലീസ് സ്റ്റേഷനുകളില് ബന്ധപ്പെട്ട് വീട്ടുകാരെ വിവരമറിയിച്ചു. മൈക്കിലൂടെ തുടര്ച്ചയായി അനൗണ്സ്മെന്റ് മുഴങ്ങിയതും ബന്ധുക്കളെ കണ്ടെത്തി എല്ലാവരെയും തിരിച്ചേല്പ്പിക്കുന്നതിനു സഹായകരമായി.
ഗതാഗതം നിയന്ത്രിക്കാനും സുരക്ഷയൊരുക്കാനും 3600 അംഗ പോലീസ് സേനയാണ് അണി നിരന്നത്. 160 അംഗ ബോംബ് ഡിറ്റക്ഷന് ടീം മുഴുവന് സമയവും പൂരപ്പറമ്ബില് ഉണ്ടായിരുന്നു. പൂരത്തിനിടെ ആളൊഴിഞ്ഞ വീടുകളില് മോഷണം നടത്തി വന്നിരുന്ന സംഘത്തിനും ഇത്തവണ കണക്കുകൂട്ടല് തെറ്റി. അത്തരം കുറ്റകൃത്യങ്ങളും നഗരത്തെ പോലീസ് വളഞ്ഞതോടെ ഇക്കുറി നടന്നില്ല. ഏറ്റവും മികച്ച രീതിയില് പൂരത്തിന്റെ സുരക്ഷാ ക്രമീകരണങ്ങള് ഏകോപിപ്പിച്ച കളക്ടര് ടിവി അനുപമയ്ക്ക് നിറഞ്ഞ കൈയ്യടിയാണ് സോഷ്യല്മീഡിയ പേജുകളില് നിറയുന്നത്.
https://www.facebook.com/Malayalivartha
