ലോക്‌സഭ തെരഞ്ഞെടുപ്പില്‍ കള്ളവോട്ട് നടന്നുവെന്ന് കണ്ടെത്തിയ കാസര്‍കോട് മണ്ഡലത്തിലെ നാല് ബൂത്തുകളില്‍ റീപോളിംഗ് നടത്തും. കല്യാശ്ശേരി,പയ്യന്നൂര്‍ നിയമസഭാ മണ്ഡലങ്ങളിലെ ബൂത്തുകളിലാണ് റീപോളിംഗ് നടത്തുക..കല്യാശ്ശേരിയിലെ 19, 69, 70 നമ്ബര്‍ ബൂത്തുകളിലും പയ്യന്നൂരിലെ 48ാംമത് ബൂത്തിലുമാണ് റീപോളിംഗ് നടത്തുന്നത്. റീപോളിംഗ് സംബന്ധിച്ച് തെരഞ്ഞെടുപ്പ് കമ്മീഷന്‍ ഇന്ന് പ്രഖ്യാപനം നടത്തും.

കള്ളവോട്ട് പരാതികളില്‍ വിട്ടുവീഴ്ചയില്ലെന്ന് മുഖ്യ തിരഞ്ഞെടുപ്പ് ഓഫീസര്‍ ടീക്കാറാം മീണ നേരത്തെ വ്യക്തമാക്കിയിരുന്നു. ഈ സംഭവത്തെ ഗൗരവത്തോടെയാണ് കാണുന്നതെന്നും അദേഹം വ്യക്തമാക്കി. 

മറ്റ് പരാതികളില്‍ സ്വീകരിച്ച അതേ നടപടികള്‍ ഇതിലും സ്വീകരിക്കും. കള്ളവോട്ട് പരാതികളുയര്‍ന്ന ബൂത്തുകളിലെ വെബ് ക്യാമറകള്‍ പരിശോധിക്കാനും തെരഞ്ഞെടുപ്പ് കമ്മീഷന്‍ തീരുമാനിച്ചതായും അദേഹം പറഞ്ഞു.

കാസര്‍കോട് പാര്‍ലമെന്റ് മണ്ഡലത്തില്‍ തെരെഞ്ഞെടുപ്പ് ദിവസം സി.പി.എം കള്ളവോട്ട് നടന്നുവെന്ന പരാതിയാണ് തുടക്കം. പാര്‍ലമെന്റ് മണ്ഡലത്തിലെ വിവിധ അസംബ്ലി മണ്ഡലങ്ങളില്‍ ഉള്‍പ്പെടുന്ന 110 പോളിംഗ് ബൂത്തുകളില്‍ റീപോളിംഗ് നടത്തണമെന്ന് ആവശ്യപ്പെട്ട് യു.ഡി.എഫ് സ്ഥാനാര്‍ഥി രാജ്‌മോഹന്‍ ഉണ്ണിത്താന്റെ മുഖ്യ പോളിംഗ് ഏജന്റ് അഡ്വ. സി.കെ ശ്രീധരന് പരാതി നല്‍കിയിരുന്നു.

കല്യാശേരി, പയ്യന്നൂര്‍ മണ്ഡലങ്ങള്‍ക്കു പുറമെ തൃക്കരിപ്പൂര്‍, കാഞ്ഞങ്ങാട്, ഉദുമ മണ്ഡലങ്ങളിലെ വിവിധ ബൂത്തുകളിലാണ് റീപോളിംഗ് നടത്തണമെന്ന ആവശ്യം ഉന്നയിച്ചിട്ടുള്ളത്.

തൃക്കരിപ്പൂര്‍, കാഞ്ഞങ്ങാട് മണ്ഡലങ്ങളിലെ കിനാനൂര്‍ കരിന്തളം, മടിക്കൈ, കോടോം, ഉദുമ മണ്ഡലത്തിലെ പനയാല്‍, പാക്കം, കൂട്ടക്കനി, ബേഡകം, കുറ്റിക്കോല്‍ തുടങ്ങി പാര്‍ലമെന്റ് മണ്ഡലത്തിലെ 110 ബൂത്തുകളില്‍ റീപോളിംഗ് നടത്തണമെന്നാണ് ആവശ്യം. സി.പി.എമ്മിനു ആധിപത്യമുള്ള പ്രദേശങ്ങളില്‍ വ്യാപകമായി കള്ളവോട്ട് ചെയ്യാന്‍ തെരെഞ്ഞെടുപ്പ് ഉദ്യോഗസ്ഥര്‍ കൂട്ട് നിന്നതായും യു.ഡി.എഫ് നേതാക്കള്‍ പറയുന്നു.

റീപോളിംഗ് ആവശ്യപ്പെട്ട ബൂത്തുകളില്‍ സി.സി.ടി.വി ക്യാമറകള്‍ സ്ഥാപിക്കണം. കേന്ദ്ര സേനയെ സുരക്ഷക്ക് നിയമിക്കണം, റീപോളിംഗ് നടത്തേണ്ട ബൂത്തുകള്‍ നിരീക്ഷിക്കുന്നതിന് കേന്ദ്ര നിരീക്ഷകരെ ഏര്‍പ്പെടുത്തണം തുടങ്ങിയ ആവശ്യങ്ങളും പരാതിയില്‍ ഉന്നയിച്ചിട്ടുണ്ട്.

സി.പി.എം.കേന്ദ്രങ്ങളില്‍ വ്യാപകമായി കള്ളവോട്ട് നടക്കുമെന്ന് മുന്‍കൂട്ടി തന്നെ ജില്ലാ വരണാധികാരിക്ക് പരാതി നല്‍കിയിരുന്നെങ്കിലും ഇത് ഗൗരവമായി എടുക്കാതെ വന്നതിനെ തുടര്‍ന്നാണ് വ്യാപകമായി കള്ളവോട്ട് നടന്നതെന്ന് യു.ഡി.എഫ് നേതാക്കളുടെ ആവശ്യം. അതിനിടെ മുസ്ലീം ലീഗ് പ്രവര്‍ത്തകരും കള്ള വോട്ടില്‍ കുടുങ്ങിയിരുന്നു. അവസാനമായി മുഖ്യമന്ത്രിയുടെ മണ്ഡലത്തിലും കള്ള വോട്ട് നടന്നെന്ന് കണ്ടെത്തി. ഇതിന് പിന്നാലെയാണ് റീപോളിംഗിന് തെരഞ്ഞെടുപ്പ് കമ്മീഷന്‍ ഒരുങ്ങുന്നത്.