നെയ്യാറ്റിൻകരയിൽ ആത്മഹത്യ ചെയ്ത ഭാര്യ ലേഖയുടെയും മകള്‍ വൈഷ്ണവിയുടെയും മൃതദേഹങ്ങള്‍ കാണാനെത്തിയ ചന്ദ്രന്റെ നേരെ ശാപവര്‍ഷങ്ങളുമായി പാഞ്ഞടുത്ത് നാട്ടുകാര്‍. 'കൊച്ചിന്റെ കരിഞ്ഞ മുഖമൊന്നു കാണിച്ചു കൊടുക്ക് സാറേ അവന്'- നൂറോളം പൊലീസുകാരുടെ അകമ്പടിയിൽ സ്വന്തം വീടിനു മുന്നിലെത്തിയ ചന്ദ്രനോട് വികാരം രോഷം അടക്കാനാകാതെ നാട്ടുകാർ പറഞ്ഞത് ഇങ്ങനെയായിരുന്നു. നിർവികാരനായിട്ടാണു പന്തലിലേയ്ക്ക് ചന്ദ്രൻ എത്തിയത്. ഇതോടെയായിരുന്നു നട്ടുകരുടെ രോഷം അണപൊട്ടിയത്.

നിന്റെ കൊച്ചിന്റെ അവസ്ഥ കണ്ടോയെന്ന് ചോദിച്ച് പാഞ്ഞടുത്ത ചിലരെ പൊലീസ് പിന്തിരിപ്പിച്ചു. പൊള്ളലേറ്റതിനാല്‍ ഇരുവരുടെയും ശരീരങ്ങള്‍ പൊതിഞ്ഞ നിലയിലായിരുന്നു. ഇതു തുറന്ന് കുട്ടിയുടെ മുഖം കാണിച്ചുകൊടുക്കണമെന്ന് ചിലര്‍ വിളിച്ച്‌ പറയുന്നുണ്ടായിരുന്നു. രംഗം വഷളായതിനാല്‍ മിനിറ്റുകള്‍ക്കുള്ളില്‍ തന്നെ ചന്ദ്രനെ തിരികെ ജീപ്പില്‍ കയറ്റി സ്‌റ്റേഷനിലേക്ക് മാറ്റി. വന്‍ പൊലീസ് സന്നാഹവും സ്ഥലത്തെത്തിയിരുന്നു. ചന്ദ്രന്‍ ഭാര്യയുടെ മൃതദേഹത്തിനടുത്തേക്കു പോയില്ല.

സംഭവ ദിവസം രാവിലെ മുതല്‍ ബാങ്കില്‍ നിന്ന് നിരന്തരം വിളിച്ച്‌ പണം ചോദിച്ച്‌ സമ്മര്‍ദം ചെലുത്തിയതില്‍ മനം നൊന്താണ് ഭാര്യയും മകളും ആത്മഹത്യയക്ക് ശ്രമിച്ചതെന്നായിരുന്നു ചന്ദ്രന്‍ മാധ്യമങ്ങളോടും അയല്‍വാസികളോടും പറഞ്ഞത്. ഇതോടെ മന്ത്രിമാര്‍ ഉള്‍പ്പടെ ബാങ്കിന്റെ നടപടിക്കെതിരെ രംഗത്തെത്തി. മനുഷ്യത്വരഹിതമായ ഇടപെടലാണ് ബാങ്കിന്റെ ഭാഗത്തുനിന്നുണ്ടായതെന്ന് കാണിച്ച്‌ ബാങ്കിനെതിരെ സാമൂഹികമാധ്യമങ്ങളില്‍ രോഷം ഉയര്‍ന്നുവന്നിരുന്നു.

ഇതിനിടെ അപ്രതീക്ഷിതമായി ലഭിച്ച ആത്മഹത്യാ കുറിപ്പാണ് കേസിന് വഴിത്തിരിവായത്. ഇതോടെ ദുര്‍മന്ത്രവാദത്തിന്റേയും കുടുംബവഴക്കിന്റേയും കഥകള്‍ ഓരോന്നായി ചുരുളഴിഞ്ഞു. വീടിനു പിന്‍വശത്തെ പ്രത്യേകം തയാറാക്കിയ തറയില്‍ മന്ത്രവാദം നടന്നിരുന്നതായി ഉറ്റബന്ധുക്കള്‍ സ്ഥിരീകരിച്ചു.