ദുരൂഹ സാഹചര്യത്തില്‍ വെഞ്ഞാറമൂട്ടില്‍ നിന്നും വെള്ളിയാഴ്ച കാണാതാകുകയും അടുത്തദിവസം പൊട്ടക്കിണറ്റില്‍ മരിച്ച നിലയില്‍ കണ്ടെത്തുകയും ചെയ്ത യുവാവ് ധരിച്ചിരുന്ന ഷര്‍ട്ട് വീടിനു സമീപത്തെ മരച്ചുവട്ടില്‍ കണ്ടെത്തി.

വെള്ളാണിക്കല്‍ പത്തേക്കര്‍ രാജേഷ് ഭവനില്‍ രാജേഷി(35)നെ ശനിയാഴ്ച വീട്ടില്‍ നിന്നും അകലെയുള്ള ഒരു കിണറ്റില്‍ മരിച്ച നിലയില്‍ കാണുകയായിരുന്നു. മൃതദേഹത്തില്‍ അടിവസ്ത്രം മാത്രമാണ് അപ്പോള്‍ ഉണ്ടായിരുന്നത്. കിണറ്റില്‍ നിന്ന് വസ്ത്രങ്ങള്‍ അന്ന് കണ്ടെത്താനുമായില്ല.

കാണാതായപ്പോള്‍ ധരിച്ചിരുന്നതെന്ന് കരുതുന്ന ഷര്‍ട്ടാണ് ഇന്നലെ രാവിലെ രാജേഷിനെ സംസ്‌കരിച്ചതിനു എതിര്‍വശത്തുള്ള പൊതു വഴിക്കു സമീപത്തെ മരച്ചുവട്ടില്‍ കണ്ടെത്തിയത്.

ഇതോടെ രാജേഷിന്റെ മരണത്തില്‍ ദുരൂഹത വര്‍ദ്ധിക്കുകയാണെന്ന് നാട്ടുകാര്‍ പറയുന്നു. ഇന്നലെ ഇത് ഇവിടെ കൊണ്ടു വന്നു വച്ചതാണെന്നാണ് നാട്ടുകാര്‍ ആരോപിക്കുന്നത്. വെഞ്ഞാറമൂട് പൊലീസ് എത്തി ഷര്‍ട്ട് സ്റ്റേഷനിലേക്ക് മാറ്റി.