തൃശൂർ പൂരത്തിന്റെ ഇലഞ്ഞിത്തറ മേളം, പഞ്ചവാദ്യം അടക്കമുള്ള ചടങ്ങുകളുടെ പകർപ്പവകാശം ആർക്കും വിട്ടുകൊടുത്തിട്ടില്ലെന്ന് വ്യക്തമാക്കി സംഘാടകരായ തിരുവമ്പാടി, പാറമേക്കാവ് ദേവസ്വങ്ങൾ രംഗത്തെത്തി. തൃശൂർ പൂരത്തിന്റെ ഇലഞ്ഞിത്തറ മേളവും മഠത്തിൽ വരവ് പഞ്ചവാദ്യവും മറ്റും ഫെയ്സ് ബുക്കിലും യുട്യൂബിലും അപ്ലോഡ് ചെയ്യുമ്പോൾ സോണി ഗ്രൂപ്പിന് പകർപ്പവകാശമുണ്ടെന്ന സന്ദേശമാണ് കിട്ടുന്നതെന്ന വിവാദത്തെതുടർന്നാണ് വിശദീകരണം.

“ഒരു ചടങ്ങിന്റെയും പകർപ്പവകാശം ആർക്കും വിട്ടുകൊടുത്തിട്ടില്ല. യൂ ട്യൂബിലും മറ്റും മേളങ്ങളുടെ വീഡിയോ അപ്ലോഡ് ചെയ്യാനാകുന്നില്ലെന്നതാണ് പൂരപ്രേമികളുടെ പരാതി. റസൂൽ പൂക്കുട്ടിയുടെ “സൗണ്ട് സ്റ്റോറി’യുടെ ഓഡിയോ പകർപ്പവകാശം സോണി മ്യൂസിക്കിന് ലഭിച്ചതിനാൽ സമൂഹമാധ്യമങ്ങളിൽ പൂരച്ചടങ്ങുകൾ പങ്കുവയ്ക്കു ന്നതിന് തടസ്സങ്ങൾ ഉണ്ടായിട്ടുണ്ടെങ്കിൽ നിയമനടപടികൾ സ്വീകരിച്ച് പരിഹാരം കാണുമെന്ന് തിരുവമ്പാടി ദേവസ്വം സെക്രട്ടറി പ്രൊഫ. എം മാധവൻകുട്ടിയും പാറമേക്കാവ് ദേവസ്വം സെക്രട്ടറി ജി രാജേഷും പറഞ്ഞു. എന്നാൽ തൃശൂർ പൂരച്ചടങ്ങുകളുടെ പകർപ്പവകാശവുമായി തനിക്ക് ബന്ധമൊന്നുമില്ലെന്ന് റസൂൽ പൂക്കുട്ടി പ്രതികരിച്ചു.