വല്ലാര്‍പാടത്ത് നാലുകോടിയുടെ രക്തചന്ദനം പിടി കൂടി
കണ്ടെയ്‌നര്‍ ടെര്‍മിനലില്‍ നാലുകോടിയുടെ രക്തചന്ദനവേട്ട. ഷാര്‍ജയിലേക്കു കടത്താന്‍ ശ്രമിച്ച 12.5 ടണ്‍ രക്തചന്ദനമാണു രഹസ്യവിവരത്തെത്തുടര്‍ന്ന് ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡിആര്‍ഐ) പിടികൂടിയത്. കസ്റ്റംസ് ക്ലിയറന്‍സ് കഴിഞ്ഞ കണ്ടെയ്‌നറിന്റെ പൂട്ടില്‍ കൃത്രിമം കാണിച്ചായിരുന്നു കള്ളക്കടത്ത് ശ്രമം.
മുംബൈയിലെ ലിബര്‍ട്ടി മാര്‍ക്കറ്റിങ് സ്ഥാപനത്തിന്റെ പേരില്‍ ഷാര്‍ജയിലെ അല്‍ഹമൂദ് ജനറല്‍ ട്രേഡിങ് കമ്പനിയിലേയ്ക്കായിരുന്നു പ്ലൈവുഡ് എന്ന വ്യാജേന ചരക്ക് ബുക്ക് ചെയ്തിരുന്നത്. ഈ വിലാസം വ്യാജമാണെന്ന് ഡിആര്‍ഐ സംശയിക്കുന്നു. പിടിച്ചെടുത്ത ചന്ദനത്തിന് വിദേശത്ത് നാലുകോടിയോളം രൂപ മൂല്യമുണ്ടെന്നു ഡിആര്‍ഐ ഉദ്യോഗസ്ഥര്‍ പറഞ്ഞു.
കണ്ടെയ്‌നറില്‍ 12.5 ടണ്‍ പ്ലൈവുഡ് നിറച്ച് വ്യാഴാഴ്ച ഉച്ചയ്ക്കാണു കളമശേരിയിലെ കേരള സ്‌റ്റേറ്റ് ഇന്‍ഡസ്ട്രിയല്‍ എന്റര്‍പ്രൈസസില്‍ വച്ച് കസ്റ്റംസ് ക്ലിയറന്‍സ് വാങ്ങിയത്. എന്നാല്‍ സീല്‍ ചെയ്യുന്ന താഴ് ഘടിപ്പിച്ചിരുന്ന ബോള്‍ട്ടില്‍ നേരത്തേ തന്നെ കൃത്രിമം നടത്തിയിരുന്നു. സീല്‍ പൊട്ടാതെ ബോള്‍ട്ട് അഴിച്ചെടുത്ത് താഴ് തുറക്കാവുന്ന തരത്തിലായിരുന്നു ഇത്. സീല്‍ ചെയ്തു ലഭിച്ച കണ്ടെയ്‌നര്‍ വ്യാഴാഴ്ച രാത്രി തന്നെ രഹസ്യകേന്ദ്രത്തിലേക്കു മാറ്റി പ്ലൈവുഡിനു പകരം രക്തചന്ദനമുട്ടികള്‍ നിറയ്ക്കുകയുമായിരുന്നു.
12 പെട്ടികളിലായി ആയിരത്തിലേറെ ചന്ദനമുട്ടികള്‍ നിറച്ച് രാത്രിതന്നെ ടെര്‍മിനലില്‍ എത്തിച്ചു. വിവരംകിട്ടിയ ഡിആര്‍ഐ ഉദ്യോഗസ്ഥര്‍ കണ്ടെയ്‌നറില്‍ രക്തചന്ദനമാണെന്നു സ്ഥിരീകരിച്ചു. ഇന്നലെ രാവിലെ കസ്റ്റഡിയിലെടുത്ത് യാഡിലേക്കു മാറ്റി. പ്രീമിയര്‍ ഷിപ്പിങ് ഏജന്‍സി വഴി ഇന്നലെ രാത്രി ഷാര്‍ജയ്ക്കുള്ള കപ്പലില്‍ കയറ്റി അയക്കുകയായിരുന്നു.
രക്തചന്ദനം സുലഭമായ ആന്ധ്രയില്‍നിന്നു റോഡ് മാര്‍ഗം കൊച്ചിയിലെത്തിച്ചതാണെന്നാണു വിവരം. ഒട്ടേറെ ചെക്‌പോസ്റ്റുകള്‍ പിന്നിട്ട് റോഡ് മാര്‍ഗം കടത്തിയിട്ടും പരിശോധന നടന്നില്ലെന്നതു സംശയകരമാണ്. കണ്ടെയ്‌നറിലെ ചരക്ക് മാറ്റി രാത്രിയോടെ ടെര്‍മിനലില്‍ എത്തിക്കാനായത് ഗോഡൗണ്‍ കൊച്ചിയുടെ പരിസരത്തായതുകൊണ്ടാണെന്നു ഡിആര്‍ഐ കണക്കുകൂട്ടുന്നു.
ഗോഡൗണ്‍ കണ്ടെത്താനുള്ള ശ്രമം തുടങ്ങി. കണ്ടെയ്‌നര്‍ കയറ്റിയയ്ക്കാന്‍ സഹായിച്ച ഷിപ്പിങ് ഏജന്‍സി അധികൃതരെ ഇന്നലെ ചോദ്യം ചെയ്തതായാണ് അറിവ്. ഏജന്‍സിയുടെ ലൈസന്‍സ് റദ്ദാക്കിയേക്കും. ഷാര്‍ജ വഴി മറ്റേതെങ്കിലും വിദേശരാജ്യത്തേക്കു കടത്താനാണോ ശ്രമിച്ചതെന്നും അന്വേഷിക്കുന്നുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്Likeചെയ്യുക
https://www.facebook.com/Malayalivartha
