ഇന്തൊനീഷ്യയില്‍ 250 ഓളം യാത്രക്കാരുമായി സഞ്ചരിച്ച ഫെറിക്ക് തീപിടിച്ച് നിരവധിപേര്‍ മരിച്ചതായി റിപ്പോര്‍ട്ട്. ഇന്തൊനീഷ്യയിലെ സുലവേസി ദ്വീപിലെ മകാസറിലേക്ക് പോവുകയായിരുന്ന ഫെറിയിലാണ് തീപിടിത്തമുണ്ടായത്. അപകടത്തില്‍ 5 പേര്‍ മരിക്കുകയും 41 പേരെ കാണാതാവുകയും ചെയ്‌തെന്നാണ് പ്രാഥമിക വിവരം. യാത്ര ആരംഭിച്ച മണിക്കൂറുകള്‍ കഴിയുമ്പോഴാണ് ഫെറിയില്‍ പുക ഉയര്‍ന്നത്. തുടര്‍ന്ന് ഫെറിക്ക് തീപിടിച്ചതായി ക്യാപ്റ്റന്‍ സന്ദേശം നല്‍കി. ഇതിനു പിന്നാലെ ഫെറിയുമായുള്ള ആശയവിനിമയവും നഷ്ടമായി.

ഇന്തൊനീഷ്യയിലെ ജാവയിലെ സപുഡി ദ്വീപിന് ഏകദേശം 19 നോട്ടിക്കല്‍ മൈല്‍ വടക്ക് മാറിയാണ് ഫെറി നിലവിലുള്ളത്. അപകടത്തില്‍ ഫെറി ഏകദേശം പൂര്‍ണമായും മുങ്ങി. ഈ സമയം അപകടസ്ഥലത്തിനു സമീപത്തുണ്ടായിരുന്ന കപ്പലുകളും ചെറുയാനങ്ങളും രക്ഷാപ്രവര്‍ത്തനത്തില്‍ പങ്കുചേര്‍ന്നു. നാല് കപ്പലുകള്‍ രക്ഷാപ്രവര്‍ത്തനത്തിനായി സ്ഥലത്തുണ്ട്. ഫെറിയില്‍ തീ പടരുന്നതിന്റെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്. ഈ സമയം ലൈഫ് ജാക്കറ്റുകള്‍ ധരിച്ച യാത്രക്കാര്‍ ഫെറിയുടെ മറുവശത്തായി തിങ്ങിനില്‍ക്കുന്നതും വിഡിയോയില്‍ കാണാം. ഇതിനൊപ്പം ചില യാത്രക്കാര്‍ പ്രാണരക്ഷാര്‍ഥം വെള്ളത്തിലേക്ക് ചാടുന്നുമുണ്ട്. അതേസമയം തീപിടിത്തം എങ്ങനെ ഉണ്ടായെന്ന് ഇനിയും വ്യക്തമല്ല. രക്ഷാപ്രവര്‍ത്തനങ്ങള്‍ തുടരുകയാണ്.