സുനന്ദയും താനും തമ്മില്‍ ചെറിയ തെറ്റിധാരണകളുണ്ടായിരുന്നുവെന്ന് ശശി തരൂര്‍ പൊലീസിന് മൊഴി നല്‍കിയതായി റിപ്പോര്‍ട്ട്. ഒരു ദേശീയ പത്രത്തിലാണ് ഇത് സംബന്ധിച്ചുള്ള വാര്‍ത്ത വന്നത്. സുനന്ദ പുഷ്‌കറുടെ മരണം സംഭവിച്ച് രണ്ട് ദിവസങ്ങള്‍ക്ക് ശേഷം നടന്ന പൊലീസ് ചോദ്യം ചെയ്യലിലാണ് തരൂര്‍ ഇക്കാര്യം വെളിപ്പെടുത്തിയത്. ചാണക്യപുരിയിലെ ഹോട്ടല്‍ ലീലാ പാലസില്‍ സുനന്ദയെ ജനുവരി 17ന് മരിച്ച നിലയില്‍ കണ്ടെത്തിയ ശേഷം ജനുവരി 19ന് തരൂരിനെ ചോദ്യം ചെയ്തതിന്റെ റിപ്പോര്‍ട്ടുകളാണ് സുനന്ദയുടെ മരണം കൊലപാതകമാണെന്ന് പൊലീസ് റിപ്പോര്‍ട്ടിനെ തുടര്‍ന്ന് ഇപ്പോള്‍ ദേശീയ പത്രം പുറത്തുവിട്ടിരിക്കുന്നത്.
തങ്ങള്‍ തമ്മില്‍ ചെറിയ പ്രശ്‌നങ്ങള്‍ ഉണ്ടായിരുന്നുവെങ്കിലും വിവാഹജീവിതം സന്തോഷകരമായിരുന്നു എന്നാണ് ശശി തരൂര്‍ മൊഴി നല്‍കിയിരിക്കുന്നത്. സുനന്ദയ്ക്ക് ആരോഗ്യ പ്രശ്‌നങ്ങള്‍ ഉണ്ടായിരുന്നുവെന്നും ഇന്‍സൊംനിയ ബാധിച്ച് ഉറക്കമില്ലാത്തതിനാല്‍ അല്‍പ്രാക്‌സ് മരുന്നുകഴിച്ചാണ് ഉറങ്ങിയിരുന്നതെന്നും തരൂര്‍ പറയുന്നു. മരിക്കുന്നതിന് രണ്ടുദിവസം മുമ്പുമുതല്‍ സുനന്ദ ആഹാരം കഴിച്ചില്ലെന്നും തരൂരിന്റെ മൊഴിയിലുണ്ട്.
രാത്രി ഉറങ്ങാന്‍ കഴിയാതെ സുനന്ദ ബുദ്ധിമുട്ടിയിരുന്നു. അല്‍പ്രാക്‌സാണ് സുനന്ദ ഉറങ്ങാന്‍ വേണ്ടി കഴിച്ചിരുന്നത്. മരിക്കുന്നതിന് രണ്ടുദിവസം മുമ്പ് മുതല്‍ സുനന്ദ കാര്യമായി ഒന്നും കഴിച്ചിരുന്നില്ല. തലേ ദിവസം ഒരു മഷ്‌റൂം സൂപ്പും തന്റെ കൈ കൊണ്ട് നല്‍കിയ ഉച്ചഭക്ഷണവും മാത്രമാണ് കഴിച്ചത്. കരിക്കിന്‍ വെള്ളവും കുടിച്ചു. ഭക്ഷണ കാര്യം പറയുമ്പോഴെല്ലാം ഛര്‍ദ്ദിക്കാന്‍ തൊന്നുമെന്ന് സുനന്ദ പറഞ്ഞതായും മൊഴിയിലുണ്ട്.
പ്രിയേ, നിനക്ക് എങ്ങനെയുണ്ട്? എന്നു ചോദിച്ചാണ് കട്ടിലില്‍ കിടന്ന സുനന്ദയുടെ അരികില്‍ താനെത്തിയതെന്നു തരൂരിന്റെ മൊഴിയിലുണ്ട്. എന്നാല്‍ സുനന്ദ പ്രതികരിച്ചില്ല. അതില്‍ പന്തികേടു തോന്നിയ താന്‍ സുനന്ദയുടെ ശരീരത്തില്‍ സ്പര്‍ശിച്ചപ്പോള്‍ തണുത്തുറഞ്ഞതായി കണ്ടെത്തുകയായിരുന്നു. ഉടന്‍ തന്നെ പൊലീസില്‍ അറിയിക്കുകയും ചെയ്തുവെന്നാണ് തരൂരിന്റെ മൊഴി.
മരിക്കുന്നതിന് ഒരാഴ്ച മുമ്പ് കിംസ് ആശുപത്രിയില്‍ സുനന്ദയെ പ്രവേശിപ്പിച്ച കാര്യവും തരൂരിന്റെ മൊഴിയിലുണ്ട്. ഡിസംബര്‍ 15ന് ഡല്‍ഹിയിലെത്തിയ തരൂരും സുനന്ദയും വീട്ടില്‍ അറ്റകുറ്റപ്പണി നടക്കുന്നതിനാലാണ് ഹോട്ടലില്‍ താമസിച്ചത് എന്നും തരൂര്‍ മൊഴിനല്‍കി.
വിവാഹജീവിതം സന്തോഷകരമായിരുന്നു. ചെറിയ തെറ്റിധാരണകള്‍ തിരുത്തിയാണ് മുന്നോട്ട് പോയത്. ഒരു വലിയ വഴക്ക് ഇടയ്ക്ക് നടന്നിരുന്നു. ഉച്ചത്തില്‍ സുനന്ദ വഴക്കിട്ടെങ്കിലും വളെരെ പെട്ടെന്ന് തണുക്കുകയും സാധാരണപോലെ സംസാരം തുടരുകയുമായിരുന്നു എന്നും തരൂരിന്റെ മൊഴിയില്‍ പറയുന്നു.
തരൂരിനെ പൊലീസ് എത്രയും വേഗം ചോദ്യം ചെയ്യുമെന്നാണ് സൂചന. തരൂരിന്റെ പരിചാരകന്‍ നാരായണ്‍ സിംഗിന്റെ വെളിപ്പെടുത്തലുകളുടെ അടിസ്ഥാനത്തിലാകും തരൂരിനെ ചോദ്യം ചെയ്യുക. തരൂരും സുനന്ദയും തമ്മില്‍ മരിക്കുന്നതിന് മുമ്പ് വഴക്കു നടന്നതായും സുനന്ദയെ കാണാന്‍ സുനില്‍ തക്രു എന്നൊരാള്‍ വന്നിരുന്നുവെന്നും നാരായണന്‍ പൊലീസിന് മൊഴി നല്‍കിയിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha